༧གོང་ས་མཆོག་ནས་བདེན་པ་བཞི་དང་བདེན་པ་གཉིས་ཐོག་གསུང་ཆོས་གནང་སོང་།
ཟླ་༤ པའི་ཚེས་༧ ཉིན་༸གོང་ས་མཆོག་གིས་ཨི་ཊ་ལིའི་ནང་པའི་ཚོགས་པ་ནས་ཇི་ལྟར་གསོལ་བ་བཏབ་པ་ལྟར་དྲ་ལམ་བརྒྱུད་བདེན་པ་བཞི་དང་བདེན་པ་གཉིས་ཀྱི་ཐོག་གསུང་ཆོས་བཀའ་དྲིན་བསྩལ་གནང་སོང་།
དེ་ཡང་ཁོང་གིས་བཀའ་སློབ་བསྩལ་དོན། དེ་རིང་ངོས་ཀྱིས་བདེན་བཞི་དང་བདེན་གཉིས་སྐོར་འགྲེལ་བཤད་བྱུང་ན་ཞེས་རེ་འདུན་བཏོན་པ་རེད། འཛམ་གླིང་འདིའི་སྟེང་ཆོས་ལུགས་མི་འདྲ་བ་མང་པོ་ཡོད་པ་དེ་དག་ཚང་མས་བྱམས་བརྩེའི་སྐོར་བཤད་ཀྱི་ཡོད། ཆོས་ལུགས་ཚང་མར་ལྟ་གྲུབ་མི་འདྲ་བ་ཡོད་ཀྱང་ཚང་མས་བྱམས་པ་དང་བརྩེ་བ་ཞེས་གསུང་གི་ཡོད་པར་བརྟེན་འཛམ་གླིང་འདིའི་སྟེང་ལོ་ངོ་སྟོང་ཕྲག་ཁ་ཤས་རིང་ཐོག་མར་སངས་རྒྱས་པའི་ཆོས་མ་དར་གོང་མུ་སྟེགས་པའི་ཆོས་ལུགས་འདྲ་མིན་ཡོད། རྒྱ་གར་ནང་གི་ཆོས་ལུགས་ཚང་མའི་རྩ་བ་འཚེ་བ་མེད་པ་དང་བྱམས་བརྩེ་ཞེས་པ་འདི་གསུང་བཞིན་འདུག གང་ལྟར་འཛམ་གླིང་འདིའི་སྟེང་ཆོས་ལུགས་འདྲ་མིན་ཡོད་པ་ཕལ་ཆེར་རྒྱ་གར་རེད་འདུག བར་སྐབས་ནས་ནུབ་ཕྱོགས་རྒྱལ་ཁབ་ཚོ་ཤར་ཕྱོགས་རྒྱལ་ཁབ་དང་འབྲེལ་བ་ཕྲན་བུ་ཤུགས་ཆེ་རུ་ཕྱིན་པ་དང་། དེ་བཞིན་སངས་རྒྱས་པའི་ཆོས་ལ་དོ་སྣང་བྱེད་མཁན་མང་དུ་འགྲོ་བཞིན་འདུག སངས་རྒྱས་པའི་ཆོས་ལ་པཱ་ལིའི་ཆོས་བརྒྱུད་དང་རིམ་པས་རྒྱ་གར་ནང་ནཱ་ལེནྡྲ་ཤེས་ཡོན་གྱི་བསྟི་གནས་ཤིག་ལ་བརྩི་ཡི་ཡོད། དེའི་ནང་དུ་ནཱ་ལེནྡྲའི་མཁས་པ་མང་པོས་ནང་ཆོས་ལ་དོ་སྣང་བྱས་ནས་དེ་ལྟར་ལེགས་སྦྱར་གྱི་ཆོས་བརྒྱུད་དར་ཁྱབ་ཆེ་རུ་ཕྱིན་པ་རེད།
བོད་ལ་ཡོད་པའི་སངས་རྒྱས་པའི་ཆོས་འདི་ཁྲི་སྲོང་ལྡེའུ་བཙན་གྱིས་མཁན་ཆེན་ཞི་བ་འཚོ་བོད་ལ་གདན་ཞུ་གནང་སྟེ། མཁན་ཆེན་ཞི་བ་འཚོས་བོད་ལ་ནཱ་ལེནྡྲའི་ཕྱག་སྲོལ་ནང་བཞིན་བཙུགས་གནང་བ་ཡིན་པ་རེད། མཁན་ཆེན་ཞི་བ་འཚོས་ང་ཚོར་ངོ་སྤྲོད་གནང་བ་དང་། ཚད་ཆེན་བརྩམས་ནས་ཚད་མ་རིག་པའི་སྐོར་ཧ་ཅང་མཁས་པ་རེད། དབུ་མའི་སྐོར་དབུ་མ་རྒྱན་བརྩམས་པ་རེད། དེར་བརྟེན་མཁན་ཆེན་ཞི་བ་འཚོ་དབུ་མ་བ་དང་། གཙོ་ཆེ་ཤོས་ཚད་མ་རིག་པའི་སྐོར་མཁས་པ་ཆེན་པོ་ཆགས་པ་དེ་ལྟར་རེད། བོད་ལ་དབུ་ཚད་སེང་གེ་མཇིང་བསྣོལ་ཞེས་བཤད་སྲོལ་ཡོད་པ་རེད། བོད་གངས་ཅན་གྱི་ལྗོངས་སུ་འདས་པའི་ལོ་དུས་རབས་བརྒྱད་པ་ནས་བཟུང་དུས་ད་ལྟ་བར་དུ་དབུ་ཚད་སེང་གེ་མཇིང་བསྣོལ་ཟེར་རྒྱུའི་ཐོག་སློབ་སྦྱོང་བྱེད་རྒྱུ་དང་སྒོམ་རྒྱག་རྒྱུ་བཅས་གཙོ་བོ་འདི་གཉིས་ཐོག་འགྲོ་བཞིན་འདུག
དབུ་ཚད་ཀྱི་འགྲོ་སྟངས་བཤད་ཡོང་དུས་ལུང་ཙམ་ལ་སྐྱབས་སུ་མཆི་བ་མིན་པར་རིགས་པས་དཔྱད་པ་བྱེད་རྒྱུ་ཞིག་བཅོམ་ལྡན་འདས་རང་ཉིད་ཀྱིས། དགེ་སློང་དག་གམ་མཁས་རྣམས་ཀྱིས། །སྲེག་བཅད་བརྡར་བའི་གསེར་བཞིན་དུ། །ལེགས་པར་བརྟག་ལ་ང་ཡི་བཀའ། །བླང་བར་བྱ་ཡི་གུས་ཕྱིར་མིན། །ཞེས་བཅོམ་ལྡན་འདས་རང་ཉིད་ཀྱིས་གསུངས་འདུག བོད་གངས་ཅན་ལྗོངས་ལ་སངས་རྒྱས་པའི་ཆོས་འདི་རིགས་པས་ལམ་ནས་དཔྱད་པ་བྱས་ནས་འགྲོ་རྒྱུ་ཞིག་འདུག་སྟབས། དེང་སྐབས་སངས་རྒྱས་པའི་ཆོས་དང་འབྲེལ་བའི་སངས་རྒྱས་པའི་ལྟ་གྲུབ་སྐོར་དོ་སྣང་གསར་པ་ཞིག་སླེབ་བཞིན་ཡོད། དེ་བཞིན་ཚན་རིག་པའི་ནང་ནས་སེམས་ཁམས་རིག་པ་དང་ལྟ་གྲུབ་སྐོར་དོ་སྣང་བྱེད་པའི་གནས་ཚུལ་ཆགས་འདུག
དེ་རིང་ཨི་ཊ་ལིའི་ཆོས་གྲོགས་ཚོས་བདེན་བཞི་དང་བདེན་གཉིས་སྐོར་འགྲེལ་བཤད་བྱེད་རོགས་ཞེས་གསུངས་པ་རེད། བདེན་པ་བཞི་ཟེར་རྒྱུ་འདི་སངས་རྒྱས་པའི་ཆོས་ཀྱི་རྨང་གཞི་ཆགས་ཡོད། བཅོམ་ལྡན་འདས་མངོན་པར་རྫོགས་པར་སངས་རྒྱས་མ་ཐག་ཏུ་ཟབ་ཞི་སྤྲོས་བྲལ་འོད་གསལ་འདུས་མ་བྱས། །བདུད་རྩི་ལྟ་བུའི་ཆོས་ཤིག་ཁོ་བོས་རྙེད། །སུ་ལ་བསྟན་ཀྱང་གོ་བར་མི་ནུས་པས། །མི་སྨྲ་ནགས་ཀྱི་འདབས་སུ་གནས་པར་བྱ། །ཞེས་བཅོམ་ལྡན་འདས་ཁོ་རང་གི་ཉམས་མྱོང་ཐོག་ནས་ཆོས་ཚུལ་དམིགས་བསལ་ཟབ་མོ་ཞིག་བྱུང་། འོན་ཀྱང་དེའི་ཚེ་དེའི་དུས་ཀྱི་རྒྱ་གར་ནང་གི་མི་ཚོའི་བློ་ལ་ཆུད་རྒྱུ་ཕལ་ཆེར་ཁག་པོ་རེད་འདུག དེར་བརྟེན་བཅོམ་ལྡན་འདས་རང་ཉིད་སྒོམ་བརྒྱབ་ནས་བཞུགས་ཀྱི་ཡིན། ཞེས་མངོན་པར་རྫོགས་པར་སངས་རྒྱས་ནས་ཕལ་ཆེར་ཞག་ཞེ་དགུ་ཙམ་གྱི་རིང་ཆོས་དམིགས་བསལ་མ་གསུང་བར་བཞུགས་པ་རེད།
མཁན་ཆེན་ཞི་བ་འཚོའི་ཐུགས་རྗེ་བཀའ་དྲིན་ལས་ཚད་མ་རིག་པའི་སྟེང་ནས་དཔྱད་པ་བྱེད་པ་ལ་འདི་ལྟར་འགྲོ་ཡོང་དུས། དེང་འཛམ་གླིང་འདིར་ཚན་རིག་པའི་རིག་གནས་དག་ཡར་རྒྱས་འགྲོ་བཞིན་ཡོད། འོན་ཀྱང་ཕྱི་དངོས་པོ་རྐྱང་པ་ལས་སེམས་ཁམས་རིག་པའི་སྐོར་ནུབ་ཕྱོགས་ནས་དར་བའི་ཚན་རིག་ནང་དེ་ཚོའི་སྐོར་མི་འདུག ཚན་རིག་པ་ཚོས་གཞི་ནས་སེམས་ཀྱི་བདེ་སྐྱིད་ཅེས་པ་དེར་གཙོ་བོ་སེམས་ཀྱི་ཞི་བདེ་དགོས་པ། སེམས་ཞི་བདེ་ཡོང་བར་ཞི་བདེ་དཀྲུག་མཁན་དེ་ཉོན་མོངས་དང་ཆགས་སྡང་གིས་དཀྲུགས་ཀྱི་ཡོད་པ་དང་། དེ་ལ་གཉེན་པོ་བསྟེན་དགོས་པའི་དོ་སྣང་གསར་བ་ཞིག་ཡོང་བཞིན་འདུག ཆགས་སྡང་ལ་གཉེན་པོ་བསྟེན་སྟངས་སྤྱིར་ཆོས་ལུགས་ཚང་མའི་ནང་ཡོང་གི་ཡོད་ནའང་སངས་རྒྱས་པའི་གཞུང་གིས་ཆགས་སྡང་ལ་གཉེན་པོ་བསྟེན་སྟངས་ཧ་ཅང་གསལ་པོ་ཡིན་སྐོར་གསུངས་སོང་།
དེ་བཞིན་༧གོང་ས་མཆོག་ནས་ཆོས་ཞུ་བ་ཚོའི་དྲི་བར་བཀའ་ལན་བརྩལ་སྐབས། མིའི་སྤྱི་ཚོགས་ནང་རབ་བྱུང་དང་ཁྱིམ་པའི་སྡོམ་པ་བླངས་ཏེ་ནང་ཆོས་ཉམས་ལེན་གནང་མཁན་དང་། དམིགས་བསལ་ཆོས་ལ་དད་པ་མེད་ནའང་མི་ཚེ་བཟང་པོ་སྐྱེལ་པ་དང་། མིའི་སྤྱི་ཚོགས་སྤྱི་ལ་ཕན་ཐོགས་བྱ་ཐུབ་པའི་རིགས་བཅས་གཉིས་ཀ་ཡོང་ཐུབ་ཀྱི་ཡོད་ཅིང་། དམིགས་བསལ་ཆོས་པ་དང་ནང་པ་བྱ་དགོས་པའི་སྐད་ཆ་མེད་པར། དེང་དུས་ཀྱི་ཤེས་ཡོན་ནང་སེམས་ཁམས་རིག་པ་དང་སེམས་བཟང་པོ་བྱ་དགོས་པའི་བསླབ་བྱ་ཡར་རྒྱས་སུ་གཏོང་ཐུབ་ན་ཕན་ཐོགས་ཡོང་གི་རེད་ཅེས་དང་། སྤྱིར་ཆོས་ཟེར་བ་དེ་འདི་བྱེད་འདི་མ་བྱེད་ཅེས་མར་བཀའ་གཏོང་རྒྱུ་མིན་པར། སྒེར་སོ་སོའི་རང་མོས་ཀྱི་ཐོག་ནས་འགྲོ་རྒྱུ་ཡིན། ཆོས་ལུགས་ཚང་མས་སེམས་པ་བཟང་པོ་དང་ཡ་རབས་བྱེད་དགོས་པའི་བསླབ་བྱ་གནང་གི་ཡོད་པས། ཆོས་ལུགས་ཚང་མ་ལ་ང་ཚོས་བརྩི་བཀུར་དང་གུས་ཞབས་བྱེད་པ། ངོས་ཀྱི་ལས་འགན་གཅིག་དེ་ཡང་ཆོས་ལུགས་ཚང་མ་མཐུན་སྒྲིལ་ཡོང་ཐབས་བྱེད་བཞིན་ཡོད། ལྟ་གྲུབ་ཀྱི་ཐོག་ནས་ཡེ་ཤུ་དང་ཁ་ཆེ། ནང་པ་བཅས་ཧ་ཅང་མི་འདྲ་བ་ཆགས་ཡོང་གི་ཡོད་ནའང་། དེ་ཚོ་མི་སྒེར་སོ་སོའི་ཁམས་དང་མོས་པ་དང་བསྟུན་ནས་འགྲོ་རྒྱུ་རེད། རྩ་བ་ཚང་མས་བྱམས་བརྩེ་ཉམས་ལེན་དང་གཞན་ལ་ཕན་ཐོགས་བྱ་དགོས་པར་གསུང་གི་ཡོད་ཅེས་བཀའ་གནང་བ་དང་འབྲེལ། སེམས་མ་སྐྱིད་པ་དང་གཙོ་བོ་ལུས་ཀྱི་སྡུག་བསྔལ་དེ་འདྲ་ཡོང་སྐབས། སྡུག་བསྔལ་དང་ལེན་གྱི་བཟོད་པ་དང་སེམས་བསྐྱེད་ཡོང་ན། སེམས་ལ་ཞི་བདེ་ཡོང་གི་ཡོད་པ་ཡིན་སྐོར་གསུངས་གནང་སོང་། །
གསར་འགོད་པ་སྐལ་བཟང་དོན་གྲུབ།
