བཙན་བྱོལ་བོད་མིའི་སྤྱི་ཚོགས་ནང་ཏོག་ནད་མང་དུ་འགྲོ་བཞིན་པའི་ཉེན་བརྡ་བཏང་གནང་སོང་།
རྒྱ་གར་ནང་ཏོག་ནད་ཀྱི་གནས་སྟངས་ཛ་དྲག་ཏུ་འགྲོ་བཞིན་པ་དང་། བཙན་བྱོལ་བོད་མིའི་སྤྱི་ཚོགས་སུ་ཡང་ནད་པའི་ཁ་གྲངས་འཕར་བཞིན་ཡོད་པས་གཟབ་ནན་གནང་རྒྱུ་གལ་ཆེན་ཆགས་ཡོད་སྐོར་གསུངས་སོང་།
ཟླ་༤ པའི་ཚེས་༨ ཉིན་བོད་མིའི་སྒྲིག་འཛུགས་ཀྱི་ཏོག་དབྱིབས་ནད་དུག་ཛ་དྲག་ལས་དོན་ཚོགས་ཆུང་གིས་གསལ་བསྒྲགས་ཐེངས་༥༤ པ་དེ་སྤེལ་བ་ལྟར་ན། འདས་པའི་གཟའ་འཁོར་གཅིག་གི་རིང་རྒྱ་གར་དང་བལ་ཡུལ་ནང་བོད་པ་༣༧ ལ་ཏོག་ནད་འགོས་པ་དང། རང་ལོ་༨༤ ཅན་གྱི་སྐྱེས་པ་གཅིག་ལ་ཏོག་དབྱིབས་ནད་དུག་ཕོག་སྟེ་ཚེ་སྲོག་ཤོར་ཡོད་པ་རེད་འདུག དེ་ཡང་ཏོག་ནད་ཕོག་མཁན་ལོ་ན་ཆེ་ཤོས་༨༤ དང་ཆུང་ཤོས་དེ་རང་ལོ་༡༨ ཡིན་པ། དེ་བཞིན་ནད་རྟགས་ཡོད་མཁན་༢༣ དང་མེད་མཁན་༡༤། སྐྱེས་པ་༡༥ དང་བུད་མེད་༢༢ ལ་ནད་དུག་ཕོག་ཡོད་འདུག
ད་ལྟའི་བར་དུ་འཕྲོད་བསྟེན་ལས་ཁུངས་སུ་ཐོ་བཀོད་བྱུང་བར་གཞིགས་ན། བོད་པ་༡༧༥༧ ལ་ཏོག་དབྱིབས་ནད་དུག་ཕོག་པ་དང་མི་༡༦༢༨ དྲག་སྐྱེད། མི་༤༨ ལ་འཆི་སྐྱོན་དང་མི་༨༡ ལ་སྨན་བཅོས་བྱེད་བཞིན་ཡོད་འདུག
དེ་བཞིན་ནད་རྟགས་མ་ཐོན་པར་ཟུར་བཀག་འོག་ཡོད་པ་ཚོས་རང་སྣང་གང་དྲན་དང་འཕྲོད་བསྟེན་ལས་བྱེད་པའི་བཀོད་འདོམས་ལ་ཉན་འཇོག་མི་བྱེད་པའི་དཀའ་ངལ་འཕྲད་ཀྱི་འདུག བོད་པ་ཚོས་གནས་ཡུལ་རྒྱལ་ཁབ་ཀྱི་ཁྲིམས་ལ་བརྩི་དགོས་པ་དང་རང་གཞན་གཉིས་ཀྱི་འཕྲོད་བསྟེན་ལ་འགན་ཁུར་ལེན་དགོས་པའི་དྲན་སྐུལ་ནན་པོ་བཏང་གནང་སོང་།
གསལ་བསྒྲགས་སྐབས་སུ། རེས་གཟའ་ཉི་མའི་ཉིན་བོད་པ་བཙན་བྱོལ་བ་གནས་ཡུལ་ཀུན་ཏུ་༢༠༢༡ ལོའི་སྲིད་སྤྱི་གཉིས་ཀྱི་དངོས་གཞིའི་འོས་བསྡུ་བྱེད་ཀྱི་ཡོད་པས། ཚང་མས་ནད་དུག་ལ་འཛེམས་ཟོན་བྱ་དགོས་པ་དང་ནད་ཡམས་སྔོན་འགོག་གི་ཐབས་ལམ་ཁག་ངེས་པར་དུ་བསྟེན་དགོས་པ་དང་། ད་ལྟའི་དུས་སྐབས་སུ་རྒྱ་གར་གྱི་མའང་སྡེ་མཱ་ཧཱ་ར་ཤི་ཀྲེ ཀཱེ་རེ་ལ། ཀར་ན་ཀྲ་ཀ ཨན་ཌེ་ར། ཏཱ་མིལ་ན་རྡུ་སོགས་ནང་ཏོག་ནད་ཁ་གྲངས་ཤིན་ཏུ་མང་པོ་ཐོན་བཞིན་ཡོད་པས། མཚན་འགྲུལ་བཀག་སྡོམ་གྱི་བཀོད་ཁྱབ་བྱེད་ཀྱི་ཡོད་པས་མངའ་སྡེ་ཁག་ཏུ་གནས་འཁོད་བོད་པ་ཚོས་དམིགས་བསལ་གྱིས་ཡིད་གཟབ་བྱ་དགོས་པའི་ནན་བརྗོད་གནང་སོང་།
ད་ལྟ་རྒྱ་གར་ལ་ནད་ཡམས་ཁྱབ་གདལ་ཐེངས་གཉིས་པ་འགྲོ་བཞིན་ཡོད་པས་ཉེ་སྔོན་སློབ་ཁྲིད་འགོ་ཚུགས་པའི་སློབ་གྲྭ་ཁག་ཀྱང་བསྐྱར་དུ་སྒོ་བརྒྱབ་། རྒྱལ་ཡོངས་ཡིག་རྒྱུགས་ཆེན་མོ་ཕྱིར་འཐེན་བྱ་དགོས་པའི་འབོད་སྐུལ་གྱི་ལས་འགུལ་གཞི་རྒྱ་ཆེན་པོ་ཞིག་སྤེལ་བཞིན་ཡོད་ཅིང་། ནད་དུག་སྔོན་འགོག་གི་ཐབས་ལམ་གཙོ་བོ་གསུམ་ནི་འགོག་ཁབ་རྒྱག་རྒྱུ་དང་ཁ་རས་གྱོན་རྒྱུ། སྤྱི་ཚོགས་རྒྱང་བཀྱེད་ཀྱི་སྒྲིག་ཁྲིམས་བསྲུང་རྒྱུ། རྒྱ་གར་གཞུང་གིས་ལོ་ན་༤༥ ཡན་ཆད་ཀྱི་མི་ཚོར་འགོག་ཁབ་རྒྱག་གི་ཡོད་པས་དེ་ལ་དོ་སྣང་བྱ་དགོས་པའི་ལམ་སྟོན། བདེ་ལེགས་སྨན་ཁང་དུ་དུས་ཚོད་བཟོ་ཕྱོགས་དང་སྨན་ཁབ་ལ་དོགས་སེལ་གྱི་བརྙན་པར་ཞིག་བཟོ་སྐྲུན་བྱ་འཆར་ཡོད་ཅེས་གསུངས་སོང་།
དེ་བཞིན་ཚེས་༨ བར་སྨན་ཁབ་ཀྱི་རིམ་པ་འདྲ་མིན་འོག བོད་མི་༡༢,༡༤༠ ལ་སྔོན་འགོག་སྨན་ཁབ་བརྒྱབ་ཐུབ་ཡོད་པ་དང་། དེ་བཞིན་ལོ་ན་ཆུང་བ་རྣམས་ལ་ནད་དུག་དེས་གནོད་འཚེ་ཆེན་པོ་གཏོང་ཐུབ་ཀྱི་མེད་པའི་བསམ་ཚུལ་འཛིན་ན་ཉེན་ཁ་ཡོད་པ་དང་། དེང་སང་ཁྱབ་བཞིན་པའི་ཏོག་ནད་རིགས་གསར་པ་དེ་ཚོ་འགོ་སླ་བ་དང་རྒན་གཞོན་ཚང་མར་ཉེན་ཁ་ཡོད་སྐོར་གསུངས་སོང་།
གསར་འགོད་པ་སྐལ་བཟང་དོན་གྲུབ།
