རྒྱ་ནག་གིས་“ཏཱ་ལའི་རུ་ཚོགས་ཀྱི་མ་འོངས་པ་མུན་ནག་རེད་”ཅེས་དམའ་འབེབས་བྱས་འདུག

རྒྱ་ནག་གི་བོད་དོན་ཉམས་ཞིབ་པ་ཡིན་ཟེར་མཁན་ཚོས་“བཙན་བྱོལ་བོད་གཞུང་གསར་པས་རྩ་བའི་རང་བཙན་གྱི་ལངས་ཕྱོགས་ལ་འགྱུར་བ་གཏོང་མི་སྲིད་”པ་དང་། འདི་ལོའི་“འོས་བསྡུའི་མཇུག་འབྲས་ཀྱིས་ཏཱ་ལའི་རུ་ཚོགས་ཀྱི་དྲག་ཏུ་གྱུར་བའི་ནང་འཁྲུག་བསྟན་ཡོད་ཅིང་། དེས་ཁ་བྲལ་བ་ཚོ་མུན་ནག་གི་མ་འོངས་པ་ཞིག་ཏུ་འཁྲིད་ངེས་”ཞེས་དམའ་འབེབས་བྱས་འདུག

བཙན་བྱོལ་བོད་གཞུང་ངམ་བོད་མིའི་སྒྲིག་འཛུགས་ཀྱིས་འདས་པའི་ལོ་ངོ་བཅུ་ཕྲག་འགའི་རིང་ཁ་ཞེ་གཉིས་མེད་ཀྱིས་“དབུ་མའི་ལམ་”རྩོད་བཞིན་ཡོད་རུང་། རྒྱ་ནག་གིས་བོད་རྒྱལ་ཁབ་དང་། བོད་མིའི་ངོ་བོ་མཚོན་བྱེད་ཀྱི་སྐད་དང་རིག་གཞུང་ཡོངས་སུ་རྩ་མེད་བཟོས་ཏེ་བོད་ཡུལ་རྒྱ་ཡུལ་དང་། བོད་མི་རྒྱ་མིར་སྒྱུར་བའི་དམིགས་ཡུལ་ཁོ་ན་འཆང་བཞིན་པ་ལས། བོད་ཀྱི་གནད་དོན་གཏན་ནས་སེལ་འདོད་མེད་པར། དེ་ནི་མངོན་པ་མི་གསལ་བའི་རང་བཙན་རེད་ཅེས་ཁ་གཡོར་ས་ཞིག་བཙལ་ནས་བོད་རྒྱའི་གནད་དོན་སེལ་མི་ཐུབ་པའི་རྒྱུ་མཚན་བཙན་བྱོལ་གྱི་འགོ་ཁྲིད་ཚོར་ཐུག་ཡོད་པ་སྟོན་ཐབས་བྱེད་ཀྱི་ཡོད་པ་རེད།

ཕྱི་ཟླ་ ༥ ཚེས་ ༡༦ རེས་གཟའ་ཉི་མའི་ཉིན་རྒྱ་ནག་གི་གཞུང་འབྲེལ་དབྱིན་ཇིའི་གསར་ཁང་<<གོ་ལའི་དུས་བབ་>>ཀྱིས་བསླེབ་ལ་ཉེ་བའི་བོད་མིའི་སྒྲིག་འཛུགས་ཀྱི་སྲིད་གཞུང་གསར་པ་དང་འབྲེལ་བའི་རྩོམ་ཡིག་ཅིག་སྤེལ་བའི་ནང་། རྒྱ་ནག་གི་བོད་དོན་ཉམས་ཞིབ་པ་ཡིན་ཟེར་མཁན་ཚོས་“བཙན་བྱོལ་བོད་གཞུང་ཟེར་བས་ཆབ་སྲིད་ཀྱི་འགོ་ཁྲིད་གསར་པ་འདེམས་ཐོན་བྱུང་བའི་གསལ་བསྒྲགས་སྤེལ་ཡོད། འོན་ཀྱང་། སྲིད་གཞུང་གསར་པས་‘རང་བཙན་རྩོད་པའི་’རྩ་བའི་ལངས་ཕྱོགས་ལ་འགྱུར་བ་གཏོང་གི་མ་རེད་”ཅེས་བཤད་པ་མ་ཟད། “བཙན་བྱོལ་བོད་གཞུང་གི་ནང་དུ་འགྱུར་བ་ཅི་འདྲ་ཞིག་བྱུང་རུང་། རྒྱ་ནག་གིས་ཀྲུང་གོའི་བོད་ལྗོངས་ཀྱི་བརྟན་ལྷིང་དང་ཡར་རྒྱས་ལ་རིག་པ་བསྒྲིམས་ནས་ཏཱ་ལའི་རུ་ཚོགས་དང་འབྲེལ་བའི་སྟོང་བསམ་དང་རེ་བ་གང་ཡང་རྒྱག་གི་མ་རེད་”ཅེས་བཤད་འདུག

བདུན་གོང་མའི་རེས་གཟའ་པ་སངས་ཉིན་དབུས་འོས་བསྡུ་ལས་ཁང་གིས་ཚོགས་ཟུར་སྤེན་པ་ཚེ་རིང་ ༢༠༢༡ ལོའི་སྲིད་སྐྱོང་དུ་འདེམས་ཐོན་བྱུང་བའི་གཞུང་འབྲེལ་གསལ་བསྒྲགས་གནང་བ་དང་། ད་ལོའི་བཙན་བྱོལ་བོད་མིའི་འོས་བསྡུ་ཆེན་མོའི་ནང་དུ་འཛམ་གླིང་གི་རྒྱལ་ཁབ་མི་འདྲ་བ་ ༢༦ ནས་སྲིད་སྐྱོང་གི་དངོས་གཞིའི་འོས་བསྡུ་ཆེན་མོར་དེབ་སྐྱེལ་བྱེད་མཁན་ ༨༣,༠༨༠ བྱུང་བ་ལས་དངོས་སུ་འོས་འཕེན་མཁན་ ༦༣,༩༩༡ བྱུང་བ་དང་། དེ་ནི་“འདས་པའི་འོས་བསྡུའི་ལས་རིམ་ནང་སྔོན་འགྲོ་དང་དངོས་གཞི་གཉིས་ཀར་འོས་འཕེན་མཁན་གྲངས་འབོར་མང་ཤོས་དེ་ཆགས་ཡོད་”སྐོར་བསྒྲགས།

<<གསར་དུ་འདེམས་ཐོན་བྱུང་བའི་བཙན་བྱོལ་བོད་གཞུང་གིས་རང་བཙན་གྱི་ལངས་ཕྱོགས་ལ་འགྱུར་བ་གཏོང་གི་མ་རེད།>>ཅེས་པའི་རྩོམ་ཡིག་དེའི་ནང་། རྒྱ་ནག་གི་ཉམས་ཞིབ་པ་ཚོས་འདི་ལོའི་འོས་བསྡུས་བཙན་བྱོལ་བོད་མི་ཚོའི་ཁྲོད་དུ་འབྱུང་བཞིན་པའི་ནང་འཁྲུག་དྲག་པོ་དེ་གསལ་རྗེན་དུ་བསྟན་ཡོད་སྐོར་དང་། “བཙན་བྱོལ་བོད་གཞུང་གི་དབང་ཆ་སུས་བཟུང་ན་ཡང་། ཏཱ་ལའི་རུ་ཚོགས་ཀྱིས་རང་བཙན་རྔམ་པའི་རང་བཞིན་དེ་འགྱུར་བ་གཏོང་གི་མ་རེད་”ཅེས་བཤད་པ་མ་ཟད། རྒྱ་ནག་གིས་ད་ལྟའི་ཆར་“བཙན་བྱོལ་བོད་གཞུང་”ལ་འབྲེལ་ལམ་འཛུགས་མི་སྲིད་པ་དང་། བོད་ཏུ་བཟུང་བའི་སྲིད་བྱུས་མུ་མཐུད་ལག་བསྟར་བྱ་ངེས་སྐོར་བཤད་འདུག

ཉེ་བའི་ཆར་ཧོང་ཀོང་གི་“རྒྱལ་ཁབ་གཅིག་ལ་ལམ་ལུགས་གཉིས་”ཀྱི་སྲིད་བྱུས་རྩིས་མེད་བཏང་བ་དང་། ཁྱིམ་མཚེས་རྒྱལ་ཁབ་ཚོའི་ས་ཆ་ཧམ་བཟུན། ཡུ་གུར་མི་རིགས་རྩ་མེད། ཐའེ་ཝན་བཙན་འཛུལ་བྱེད་རྒྱུར་འཇིགས་སྐུལ། ཚོང་དང་འཕྲུལ་ཆའི་ལག་རྩལ་རྐུ་བ་ལ་སོགས་པའི་རྒྱ་ནག་གི་བྱ་སྤྱོད་མང་པོ་ཞིག་ལ་བརྟེན་ནས་འཛམ་གླིང་གི་སྟོབས་ཆེན་རྒྱལ་ཁབ་ཚོས་རྒྱ་ནག་ལ་བཟུང་བའི་སྲིད་བྱུས་འགྱུར་བ་གཏོང་བཞིན་ཡོད་པ་དང་། ཨ་རིས་འདས་པའི་ལོ་ངོ་བཞི་བཅུའི་སྲིད་བྱུས་དེ་ནོར་ཡོད་པའི་ཁས་ལེན་བྱས་ཏེ་སྲིད་བྱུས་གསར་པ་འཛིན་འགོ་བརྩམས་ཡོད་པ་རེད། བཙན་བྱོལ་བོད་གཞུང་གིས་འདས་པའི་དབུ་མའི་ལམ་གྱི་སྲིད་བྱུས་ལ་འགྱུར་བ་མེད་པར་མུ་མཐུད་གནས་ཡོད་པ་རེད། །

གསར་འགོད་པ་དཀོན་མཆོག་རབ་བརྟན།