རླུང་དམར་འཚུབ་པའི་ཉིན་མོ་འདི།
སུ་ཞིག་ལ་སྡང་ཁ་དང་ཁོང་ཁྲོ་སློང་བའམ།
ཡང་ན། ————————–
ཅི་ཞིག་ལ་འཁྲུག་ཆ་དང་དགོད་ཁ་སློང་བ་མི་ཤེས་མོད།
འོན་ཀྱང་ལྷིང་འཇགས་ཀྱི་གནས་པའི་ཞིང་ཁམས་འདིར།
འུར་གྱིས་དཀྲོགས་ཐལ།
དེའི་ཚེ་ང་ཡང་སྐྲག་ཅིང་།
འདར་སིག་སིག་གི་མིག་ཟུང་།
དེའི་ཕྱོགས་སུ་ཅེར་དགོས་བྱུང་།
ཐལ་རྡུལ་དང་འུར་ཟིང་གི་ཁྲོད་ན།
ནམ་ཡང་།—————-
མགོ་བོ་ཡར་ལ་བཏེགས་མི་ནུས་པའི།
བྱིས་པ་ཆུང་ཆུང་འགའ་ཞིག་གིས།
ངུ་འབོད་ཀྱི་ཚུགས་ཀ་སྟོན་མི་ནུས་ཤིང་།
ནམ་ཡང་རང་ཉིད་འོག་ཏུ་ལྟུང་ཟིན་སྣང་བ་སྟེར།
ཨ་ཁ་བྱིས་པ་འདི་དག་གིས།
ཅི་ཞིག་ལ་ནོར་སོང་བའི་ཉེས་ཅན་པ་བཞིན།
ཕྲེད་ལ་འགྲེང་གིན།————–
མིག་ཟུང་རང་གི་རྐང་པར་ཅེར་ནས་།
འཚུབ་ཆ་ཆེ་བའི་ཆར་ཤོད་ཀྱིས།
ཁོ་ཚོར་ནམ་ཡང་ཐར་པ་གཏོང་མི་སྲིད།
ད་དུང་།—————-
བྱིས་པ་འདི་དག་ནི།
ངུ་མ་དགོད་ཀྱི་ཀྲོང་ངེར་འགྲེང་བ་ལས།
ཅི་ཞིག་གིས་གསལ་བཤད་བྱ་རྒྱུའི་སྣང་བའང་།
ཡེ་ནས་བོར་ཟིན་པ་འདྲ།
དཀོན་མཆོག་གི་མཁྱེན།—————-
ད་ནི་ཅི་ཞི་ལ་ཐུག་ཀྱང་བྱ་ཐབས་ཡོད་ཚད།
དྲག་ཆར་དང་རླུང་བུས་སྤུར་ཟིན་པའི་སྣང་བ་འདིས།
ཡིད་ཐང་རྦད་དེ་ཆད་སོང་བ་འདྲ།
༢༠༡༡། ༧། ༢༦ ཉིན།