མཁན་པོ་ཨ་ཁྱིག་སང་སྐུ་གཤེགས་པའི་སྐོར་གྱི་གནས་ཕྲིན་ཁུངས་ལྡན།
མཐར་བོད་ཟླ༥བའི་ཚེས་༢༢དགུང་མོ་ཆུ་ཚོད་༢་དང་སྐར་མ་༤༠སྟེང་དགོངས་པ་ཆོས་དབྱིངས་སུ་གཤེགས། ཁོང་འདའ་ཁར་སྤྲུལ་སྐུ་ཨ་གསང་སོགས་ཐུགས་སྲས་རྣམས་ལ། དང་པོ་བུ་ཆེན་རྣམས་ཐུགས་མཐུན་པོ་གནང་རྒྱུ། གཉིས་པ་བུ་སློབ་ཡོངས་ནས་ཚེ་འདི་ལས་ཕྱི་མ་གལ་ཆེན་དུ་འཛིན་རྒྱུ་བཅས་ཀྱི་ཞལ་ཆེམས་གཙོ་བོ་གཉིས་བཞག སྤྲུལ་པ་བྱེ་བ་ཕྲག་བརྒྱས་སེམས་ཅན་གྱི་དོན་མཛད་པ་རྒྱལ་སྲས་སྤྱིའི་ངང་ཚུལ་ཡིན་པ་ལས་དམིགས་སུ་ཡང་སྲིད་མེད་ཅེས་གསུངས་པར་ཐུགས་སྲས་སྤྲུལ་སྐུ་ཨ་གསང་མཆོག་ནས་ནན་ཞུས་གནང་བར་ཕར་ཆེད་དུ་འཚོལ་མི་དགོས་ཚུལ་འཚོལ་མཁན་ཞིག་ཡོང་གི་རེད་ཅེས་ཕེབས། འདས་རྗེས་ཀྱི་སྐོར་ལ་སྐུ་གདུང་ཞུགས་འབུལ་གྱིས་སྐུ་རུས་ཆུ་བོ་ཆེན་པོ་བཞིའི་ནང་དུ་གཤེགས་གསོལ་ཞུ་དགོས་པའི་བཀའ་གནང་། སྐུ་གདུང་གནས་སྐབས་རིང་རྒྱུན་རིང་ཙམ་བཞག་ནའང་ཆོག་པ་དང་། གདུང་འཆོས་ཞབས་ཏོག་མཁན་པོ་ཡེ་ཤེས་དོན་རྟོགས་ནས་གནང་དགོས་པའི་ཞལ་བཀོད་མཛད། ཕྱི་ནང་གི་དགོས་པ་དུ་མའི་དབང་གིས་བུ་ཆེན་རྣམས་ཐུགས་གྲོས་ཀྱིས་ཉིན་བདུན་རིང་གསང་རྒྱ་གནང་། གནམ་གང་གི་ཉིན་གསང་རྒྱ་བཀྲོལ་ཏེ། མཁན་པོ་ཡེ་ཤེས་དོན་རྟོགས་དང་སྤྲུལ་སྐུ་ཨ་གསང་། སྐུ་ཚ་ཆོས་གྲགས་བཅས་ནས་སྐུ་གདུང་ལོངས་སྐུར་ཞལ་བསྒྱུར། བོད་ཟླ་༦་པའི་ཚེས་གཅིག་ཉིན་བླ་རུང་ནས་མཁན་པོ་ཚུལ་ཁྲིམས་བློ་གྲོས་སོགས་མཁན་སྤྲུལ་རླངས་འཁོར་གསུམ་ཆེད་ཕེབས་ཐོག་མཁན་པོ་ཚུལ་ཁྲིམས་བློ་གྲོས་མཆོག་ནས་བླ་རུང་ནང་བསྟན་སློབ་གླིང་དང་སྒར་འདི་ཕན་ཚུན་ཁྱད་མེད་དུ་གཟིགས་པའི་ཞལ་བཞེས་དང་། ཤུལ་ལུས་བུ་སློབ་རྣམས་ཀྱིས་ཀྱང་བླ་མ་བཞུགས་དུས་ལས་མི་དམན་པའི་ཕྱི་ནང་གི་འཛིན་སྐྱོང་ཚགས་ཚུད་དགོས་པ་སོགས་ཀྱི་ལམ་སྟོན་དང་ཐུགས་གསོའི་བཀའ་སློབ་གནང་།
ཚེས་༢ཉིན་བྲག་མགོ་དགོན་གྱི་ཁྲི་པ་ཨོ་རྒྱན་སྐྱབས་ཀྱིས་དབུས་པའི་བྲག་མགོའི་དགོན་པ་ཉེར་བཞིའི་རིས་མེད་དགེ་འདུན་མཐུན་ཚོགས་ཀྱི་སྐུ་ཚབ། ཉག་རོང་མཁན་པོ་ཚུལ་ཁྲིམས་ཀྱིས་དབུས་པའི་ཉག་རོང་གི་དགེ་འདུན་མཐུན་ཚོགས་ཀྱི་སྐུ་ཚབ། དཀར་མཛེས་རང་སྐྱོང་ཁུལ་ཆོས་དོན་ལས་ཁུངས་དང་། དཔལ་ཡུལ་རྫོང་གི་རྫོང་དཔོན་སོགས་ཀྱང་སྔ་ཕྱིར་མྱ་ངན་གྱི་འཚམ་ཞུར་བཅར། གདུང་མཇལ་དབུ་ཚུགས་པའི་ཉིན་ནས་ཚེས་གསུམ་གྱི་བར་ཉིན་གསུམ་གྱི་རིང་གདུང་མཇལ་བ་ཁྲི་ལྔ་ལས་བརྒལ། དེ་རིང་ཡང་ཉེ་འཁོར་གྱི་ཉེན་རྟོག་ལས་ཁུངས་ཀྱིས་ཐོབ་དཔང་ཞིབ་གཤེར་སོགས་ནན་ཙམ་བྱེད་བཞིན་ཡོད་མེད་ལ་མ་ལྟོས་པར་གདུང་མཇལ་བ་ཟམ་མི་ཆད་དུ་འབྱོར་མུས་དང་། ཁྱད་པར་རྒྱ་རིགས་དག་གདུང་མཇལ་དུ་ཡོང་རྒྱུར་གཞུང་ཕྱོགས་ནས་བཀག་རྒྱ་ཆེ་ཙམ་ཡོད་འདུག་ཀྱང་ཐབས་སྣ་ཚོགས་ཀྱིས་མཚན་མོ་ཚུན་ཆད་ལ་ཡོང་མཁན་ཤིན་ཏུ་མང་། ཚེས་༣ཉིན་འདིར་སྒར་གྱི་ཉེ་འཁོར་དུ་ཕྱོགས་ཀྱི་མཇལ་བའི་རླངས་འཁོར་ཤིན་ཏུ་མང་ཞིང་དཀར་མཛེས་དང་གསེར་རྟ་སོགས་ཀྱི་འཁོར་རིགས་ཀྱི་ལམ་གླ་ཡང་འཕར། བོད་ཚེས་གསུམ་གྱི་ཉིན་འདི་ཁོ་ནར་ཡང་མཇལ་བ་ཁྲི་ཚོ་བརྒལ། འོན་ཀྱང་སྒར་རང་གི་གླིང་སོ་སོའི་བསྟན་བདག་དང་སྒྲིག་ཁྲིམས་མི་སྣའི་རྩ་འཛུགས་ཀྱི་སྒྲིག་གཞི་ཧ་ཅང་མཐུས་ཚང་གིས་ལྟ་རྟོག་གནང་གིན་ཡོད་འདུག དཔེར་ན་བླ་མའི་གཟིམ་ཁང་གི་ཕྱིའི་ར་བའི་ནང་དུ་མི་སྟོང་གཅིག་ཙམ་ཤོང་བ་དེར་མིག་སྔར་ཇོ་མོ་བང་བསྒྲིགས་ནས་གདུང་མཇལ་ལ་གཏོང་གིན་ཡོད་ཅིང་། ཇོ་མོ་རྣམ་པས་བླ་མའི་རྣལ་འབྱོར་དང་བཟང་སྤྱོད་ཚར་ལྔ་ཡར་མར་འདོན་གྱིན་ར་བའི་ནང་དུ་འཚོགས་པའི་རིང་ལ། མི་སྐྱ་ཕོ་མོ་སྟོང་རེ་ཙམ་མཇལ་ཁ་གཏོང་ཞིང་། མི་སྐྱ་སྟོང་རེ་ཙམ་ལོངས་པ་དང་། ཡང་བསྐྱར་ཁོང་ཚོས་སྔར་གྱི་གནས་དེ་ནས་སྨོན་ལམ་འདེབས་སུ་འཇུག་ཅིང་ཇོ་མོའི་གླིང་ཚོམ་གཞན་གྱི་བཙུན་མ་སྟོང་རེ་ཙམ་གཏོང་བ་སོགས་ཚགས་ཚུད་གནང་གིན་ཡོད་པས་ད་ལྟའི་ཆར་གདུང་མཇལ་སོགས་ལ་བར་ཆད་དང་འགྲིམ་འགྲུལ་སོགས་ལ་གནས་ཚུལ་མི་ལེགས་པ་ཁབ་རྩེ་ཙམ་ཡང་བྱུང་མེད།
ཁོང་གིས་ཕྱག་བཏབ་པའི་གདན་སའི་ཆོས་སྒར་སྤྱིའི་མིང་ལ་ཡ་ཆེན་ཨོ་རྒྱན་བསམ་གཏན་གླིང་ཞུ་ཞིང་། ཕྱག་བཏབ་ནས་ལོ་༢༧་ཟིན། ཆོས་སྒར་ཧྲིལ་པོ་གླིང་ཆེན་པོ་བཅུ་ལས་གྲུབ་ཡོད་ཅིང་། གླིང་རེ་ལ་བསྟན་བདག་གཉིས་རེ། གླིང་དང་པོ་རིག་པ་རང་གྲོལ་གླིང་། གླིང་རྟགས་འཁོར་ལོ། གཉིས་པ་ཆོས་ཉིད་འོད་གསལ་གླིང་། གླིང་རྟགས་རྡོ་རྗེ། གསུམ་པ་འཁོར་འདས་ཆོས་ཉིད་གླིང་། གླིང་རྟགས་ནོར་བུ། བཞི་པ་ཀུན་བཟང་བསམ་གཏན་གླིང་། གླིང་རྟགས་པདྨ། ལྔ་པ་བདེ་ཆེན་ཐར་ལམ་གླིང་། གླིང་རྟགས་རལ་གྲི་སྟེ། དཔའ་བོའི་གླིང་ལྔ།
ཡང་། ཀུན་བཟང་བདེ་ཆེན་གླིང་། གླིང་རྟགས་པདྨ། བདེ་སྟོང་ཟུང་འཇུག་གླིང་། གླིང་རྟགས་རྡོ་རྗེ། བདེན་གཉིས་ཟུང་འཇུག་གླིང་། གླིང་རྟགས་འཁོར་ལོ། པདྨ་མཁའ་འགྲོའི་གླིང་། གླིང་རྟགས་ཆོས་འབྱུང་སྣོལ་མ་སྟེ། དཔའ་མོའི་གླིང་བཞི་བཅས་ཁྱོན་གླིང་དགུ། དགེ་བསྙེན་གྱི་གླིང་གཅིག་སྟེ། གླིང་བཅུར་མཛད། མིག་སྔར་རྒྱུན་བཞུགས་དགེ་འདུན་པ་བཞི་སྟོང་དང་། བཙུན་མ་བདུན་སྟོང་ལ་ཉེ་བ། དགེ་བསྙེན་སྟོང་ལ་ཉེ་བ་བཅས་ཁྱོན་གྲྭ་བཙུན་དགེ་བསྙེན་དང་བཅས་གཅིག་ཁྲི་སུམ་སྟོང་མ་ཟིན་ཙམ་རྒྱུན་དུ་བཞུགས་བཞིན་ཡོད། བཤད་པ་ལས་སྒྲུབ་པ་གཙོ་བོར་བྱེད་ཅིང་། སྔོན་འགྲོ་ཐུན་མོང་ཕྱི་ནང་ནས་དངོས་གཞི་ཁྲེགས་ཆོད་ཐོད་བརྒལ་གྱི་བར་ཁྲིད་རྐང་གི་རིམ་པ་ལྟར་ཉམས་ལེན་བྱེད་པའི་གངས་ཅན་གྱི་མིག་སྔའི་སྒྲུབ་པ་ཉམས་ལེན་གྱི་བསྟི་གནས་ཆེ་ཤོས་གཅིག་པུ་ཡིན། བསྟན་བདག་སྐུའི་ཐུགས་སྲས་སྤྲུལ་སྐུ་ཨ་གསང་རིན་པོ་ཆེ་དང་། སྐུ་ཉིད་ཀྱིས་བརྒྱུད་འཛིན་དུ་ངོས་འཛིན་གནང་བའི་མཁན་སྤྲུལ་བུ་ཆེན་རྣམས་ཀྱིས་འཛིན་སྐྱོང་གནང་རྒྱུ་ཡིན་པ་བཅས་ཀྱི་གནས་ཕྲིན་དུ། ་གནས་ཚུལ་དངོས་མཁྱེན་པ་འདོད་མཁན་རྣམས་ཀྱི་ཆེད། ད་ལྟ་སྒར་རང་དུ་བཞུགས་བཞིན་པ་རྗེ་ཉིད་ཀྱི་ཐུགས་སྲས་བུ་ཆེན་གཙོ་གྲས་མཁན་པོ་ཡེ་ཤེས་དོན་རྟོགས་ལ་བཀའ་འདྲི་ཞུས་ཏེ་ཤིན་ཏུ་དག་པར་བྲིས་པ་ཡིན་ནོ།།
