རྒྱ་གར་གྱི་རང་བཙན་དུས་དྲན་ ༦༤ སྲུང་བརྩི།
སྐབས་དེར་སྲིད་བློན་གྱིས་མི་མང་ཚོར་རང་བཙན་དུས་དྲན་གྱི་འཚམས་དྲི་ཞུས་པ་དང་སྦྲགས་གསུང་དོན། “མི་ངན་ཁ་ཤས་ཀྱིས་རྒྱལ་ཁབ་ནང་ཟིང་འཁྲུག་བསླངས་ཏེ་ལུང་པའི་ཡར་རྒྱས་འགོག་ཐབས་བྱེད་མཁན་ཚོ་བཀག་འགོག་དང་། དུས་འདིར་ཚང་མས་སྒེར་དོན་རྣམས་དོར་ནས་སྤྱི་པའི་དགོས་དོན་རྣམས་སྒྲུབ་ཐབས་བྱེད་རྒྱུ་གལ་ཆེན་པོ་རེད་”ཅེས་གསུངས་ཡོད་པ་རེད།
སྲིད་བློན་མཆོག་གིས། ཁོང་གིས་སྣེ་ཁྲིད་པའི་གཞུང་གི་ཆབ་སྲིད་ཀྱི་ལྷིང་འཇགས་དང་དཔལ་འབྱོར་གྱི་ཡར་རྒྱས་གཉིས་གོང་འཕེལ་དུ་བཏང་ཡོད་པ་དང། རྒྱལ་ཁབ་གྱི་མི་རིགས་འདྲ་མིན་དབར་མཐུན་ལམ་གྱི་ཁོར་ཡུག་བསྐྲུན་ཡོད། འདས་པའི་ལོ་བདུན་ནང་དཔལ་འབྱོར་གྱི་ཡར་རྒྱས་དེ་མྱུར་ཚད་ལྡན་པའི་ངང་གོང་དུ་བཏང་ཡོད་པ། རྗེས་ལུས་ཐེབས་པའི་མི་རིགས་དང། གྲངས་ཉུང་མི་རིགས། བུད་མེད། ཕྲུ་གུ་བཅས་ཀྱི་དགོས་འདུན་རྣམས་བསྒྲུབ་ཀྱི་ཡོད་པ་རེད། ཁ་ཟས་ཀྱི་རྒྱུ་ཆ་ནང་བསྲེ་སླད་མི་ཡོང་ཆེད་གང་མགྱོགས་ཁྲིམས་གཞི་གསར་པ་ཞིག་བཟོ་རྒྱུ། ལྐོག་ཟ་རུལ་སུངས་ནི་རྒྱལ་ཁབ་གྱི་ཡར་རྒྱས་ལ་དོ་ཕོག་གཏོང་བའི་རྩ་བ་ཡིན་ཡང་། རུལ་སུངས་འགོག་ཆེད་ཡར་རྒྱས་ལ་འགོག་རྐྱེན་མི་བཟོ་རྒྱུ་གལ་ཆེ་ཡིན་པ། ཞིང་པ་ཚོ་ནས་ས་ཞིང་གི་ཐོན་སྐྱེད་ཧ་ཅང་མང་དུ་བཏང་བ་དེར་བསྔགས་བརྗོད་དང་ས་ཞིང་གི་ཐོན་སྐྱེད་དེ་སླར་ཡང་གོང་དུ་གཏོང་ཆེད་གསར་བརྗེ་རིམ་པ་གཉིས་པ་ལག་བསྟར་བྱ་རྒྱུ་ཡིན། རྒྱལ་ཁབ་ནང་ཟས་རིགས་ཀྱི་རིན་གོང་རྣམས་ཇེ་ཆེར་འགྲོ་བར་བློ་འཚབ་ཡོད་པ་དང། རིན་གོང་ཆེར་རུ་ཕྱིན་པ་འགོག་ཐབས་བྱ་རྒྱུ་དེ་ནི་ཁོང་གི་སྲིད་གཞུང་གྱི་ལས་འགན་ཡིན་པ་ངེས་ཤེས་ཡོད་པ། ཡོང་རྒྱུའི་ཟླ་ཤེས་ནང་རིན་གོང་ཕར་ཚད་འགོག་པའི་ཐབས་ཤེས་འཚོལ་རྒྱུ་དེ་ལས་དོན་གལ་ཆེ་ཤོས་ཡིན། ས་ཆའི་བདག་དབང་ལ་ཕྱི་གསལ་ནང་གསལ་ཐུབ་པའི་ཁྲིམས་གཞི་གསར་པ་བཟོ་བཞིན་པ་དང། རྒྱལ་ཡོངས་སུ་ཤེས་ཡོན་ཡར་རྒྱས་གཏོང་ཆེད་ཤེས་ཡོན་ལྷན་ཚོགས་གསར་པ་ཞིག་འཛུགས་རྒྱུ། ལོ་ལྔའི་འཆར་གཞི་ཐེངས་བཅུ་གཉིས་པ་དེ་འཕྲོད་བརྟེན་ཐོག་གཙོ་བོར་དམིགས་རྒྱུ། འཇིགས་སྐུལ་རིང་ལུགས་ལ་འཐབ་རྒོལ་བྱ་རྒྱུར་ཐུས་ཤོར་བྱ་མི་ཉན་པ་དང། དེ་ནི་དུས་རྒྱུན་ལས་དོན་གལ་ཆེན་ཞིག་ཡིན་པས། དབུས་གཞུང་དང། མངའ་སྡེ་གཞུང། མི་མང་བཅས་ནས་མཉམ་འབྲེལ་ཐོག་དོ་སྣང་བྱ་དགོས། རྒྱལ་ཁབ་ཀྱི་ནང་དུ་མའོ་ཚོགས་པའི་བྱ་སྤྱོད་འཕེལ་བའི་རྐྱེན་རྩ་རྣམས་མེད་པར་བཟོ་རྒྱུ་བཅས་ཡིན་སྐོར་སོགས་གསུངས་ཡོད་པ་རེད།
དེ་བཞིན་དུ་རྒྱ་གར་གྱི་མངའ་སྡེ་སོ་སོའི་ནང་མངའ་སྡེ་བློན་ཆེན་སོ་སོས་སྣེ་ཁྲིད་དེ་རང་བཙན་གྱི་དུས་དྲན་སྲུང་བརྩི་བྱས་ཡོད་པ་རེད།།
