ནོ་སྦེལ་ཞི་བདེའི་གཟེངས་རྟགས་དེ་ཨ་རིའི་སྲིད་འཛིན་ཊོམ་ལ་ཐུགས་རྗེ་ལེགས་འབུལ་ཆེད་ཕུལ་འདུག
ཝེ་ནེ་ཛུ་ལའི་སྲིད་འཛིན་ཉེ་ཆར་ཨ་རིའི་གཞུང་གིས་འཛིན་བཟུང་བྱས་ནས་ད་ལྟ་ཨ་རིའི་ནང་ཡོད་པ་དང་། ཝེ་ནེ་ཛུ་ལའི་ཕྱོགས་འགལ་ཚོགས་པའི་འགོ་ཁྲིད་མཱ་རི་ཡ་(María Corina Machado)ཡིས་ཁ་སང་ཨ་རིའི་ཕོ་བྲང་དཀར་པོར་ཕྱིན་ནས་སྲིད་འཛིན་ཊོམ་ལ་དེ་སྔོན་མོ་རང་ལ་ཐོབ་པའི་ཞི་བདེའི་གཟེངས་རྟགས་དེ་ཕུལ་ཡོད་འདུག
ཕྱི་ལོ་༢༠༢༦ ཟླ་༡ ཚེས་༡༦ ཉིན་བྷི་བྷི་སི་(BBC)གསར་ཁང་གིས་གནས་ཚུལ་སྤེལ་དོན་ལ། ཁ་སང་གཟའ་ཕུར་བུའི་ཉིན་ཝེ་ནེ་ཛུ་ལའི་ཕྱོགས་འགལ་ཚོགས་པའི་འགོ་ཁྲིད་དང་འདི་ལོ་ཕྱི་ལོ་༢༠༢༦ ལོའི་ཞི་བདེའི་གཟེངས་རྟགས་ཐོབ་མཁན་མཱ་རི་ཡ་(María Corina Machado)ཡིས་ཁོང་རང་ལ་ཐོབ་པའི་ཞི་བདེའི་གཟེངས་རྟགས་དེ་ཨ་རིའི་སྲིད་འཛིན་ཊོམ་ལ་ཕུལ་འདུག རྒྱུ་མཚན་ནི་ཉེ་ཆར་ཨ་རིའི་དམིགས་བསལ་དམག་དཔུང་བཏང་ནས་ཕྱི་ལོ་༢༠༢༤ ལོར་ཝེ་ནེ་ཛུ་ལའི་འོས་བསྡུའི་ཁྲོད་རྒྱལ་ཁ་ཐོབ་ཡོད་ཚུལ་བརྗོད་དང་། བཙན་དབང་ཐོག་ནས་ལོ་མང་པོ་རིང་སྲིད་འཛིན་བྱེད་བཞིན་པའི(Maduro)ཞེས་པ་ཁོང་ཉེ་ཆར་ཨ་རི་ནང་དུག་རྫས་ཚོང་འབྲེལ་བྱེད་ཀྱི་ཡོད་པའི་ཉེས་མིང་འོག་འཛིན་བཟུང་བཙན་ཁྲིད་བྱས་ཟིན་ཡོད་པར་བརྟེན། སྐབས་དེ་དུས་ཕྱོགས་འགལ་སྲིད་དོན་ཚོགས་པའི་འགོ་ཁྲིད་ཡིན་པའི་བུད་མེད་མཱ་རི་ཡ་ཞེས་པ་ཁོང་ལ་མི་མང་ཕོན་ཆེན་པོའི་རྒྱབ་སྐྱོར་ཐོབ་ནས་འོས་བསྡུའི་ཁྲོད་རྒྱལ་ཁ་ཐོབ་ཡོད་པ་བརྗོད་ཀྱི་ཡོད་ཀྱང་། དྲང་བདེན་མ་བྱུང་བར་དཀའ་ངལ་ཆེན་པོ་འཕྲད་ཡོད་འདུག
བུད་མེད་དེ་ལ་འདི་ལོའི་ནོ་སྦེལ་ཞི་བདེ་གཟེངས་རྟགས་དེ་ཐོབ་ཡོད་པ་རེད། ཁ་སང་གཟེངས་རྟགས་དེ་སྲིད་འཛིན་ཊོམ་ལ་ཕུལ་དུས་སྲིད་འཛིན་ཊོམ་ནས་བྱེད་སྟངས་འདི་ནི་ཕྱོགས་གཉིས་བར་གུས་བཀུར་མཚོན་པའི་རྣམ་པ་ཡག་པོ་ཞིག་རེད་ཅེས་དང་། ཕྱོགས་འགལ་ཚོགས་པའི་འགོ་ཁྲིད་བུད་མེད་ཁོང་ནི་ཧ་ཅང་སྙིང་སྟོབས་ལྡན་པ་ཞིག་ཡིན་པ་མ་ཟད། དཀའ་སྡུག་མང་པོ་ཞིག་ལ་གདོང་ལེན་བྱས་ཡོད་པ་རེད་ཅེས་སྲིད་འཛིན་རང་ཉིད་ཀྱི་སྤྱི་ཚོགས་དྲ་ལམ་ཐོག་ཏུ་གནས་ཚུལ་སྤེལ་གནང་ཡོད་འདུག
ཕྱོགས་འགལ་ཚོགས་པའི་འགོ་ཁྲིད་བུད་མེད་ཁོང་ནས་དེ་རིང་ནི་ཝེ་ནེ་ཛུ་ལའི་མི་མང་ལ་མཚོན་ན་ལོ་རྒྱུས་རང་བཞིན་ལྡན་པའི་ཉིན་མོ་ཞིག་ཡིན་པ་དང་། ངས་ནོ་སྦེལ་ཞི་བདེའི་གཟེངས་རྟགས་འདི་སྲིད་འཛིན་ཊོམ་ལ་ཕུལ་བ་ཡིན། ཁོང་གིས་ང་ཚོའི་རང་དབང་ཆེད་དུ་བློས་བཏང་ཆེན་པོ་བྱས་པར་ངོས་འཛིན་བྱེད་ཆེད་དུ་ཡིན་ཞེས་ཕོ་བྲང་དཀར་པོའི་ཕྱི་རོལ་དུ་གསར་འགོད་པ་རྣམས་ལ་བརྗོད་འདུག་ལ། སྐབས་དེ་དུས་མོ་ལ་རྒྱབ་སྐྱོར་གནང་མཁན་མི་མང་རྣམས་ལ་ཡང་གཏམ་བཤད་གནང་འདུག
སྤྱིར་བཏང་འདི་ལོ་ནོ་སྦེལ་ཞི་བདེ་གཟེངས་རྟགས་དེ་སྲིད་འཛིན་ཊོམ་ཁོང་རང་ཉིད་ལ་ཐོབ་འདོད་ཆེན་པོ་ཡོད་ཀྱང་། ནོ་སྦེལ་ཚོགས་ཆུང་གིས་ཝེ་ནེ་ཛུ་ལའི་ཕྱོགས་འགལ་སྲིད་དོན་ཚོགས་པའི་འགོ་ཁྲིད་བུད་མེད་དེ་ལ་གནང་ཡོད་ཀྱང་། བུད་མེད་དེ་ཡིས་ཉེ་ཆར་ཝེ་ནེ་ཛུ་ལའི་ལས་ཐོག་སྲིད་འཛིན་ཨ་རིས་བཙན་ཁྲིད་བྱས་རྗེས་མོས་ཞི་བདེ་གཟེངས་རྟགས་དེ་སྲིད་འཛིན་ཊོམ་ལ་སྤྲོད་འདོད་ཡོད་སྐོར་རྒྱལ་སྤྱིའི་གསར་ཁང་ཆེ་ཁག་ནས་གནས་ཚུལ་ཐོན་ཡོད་པ་དང་། བདུན་ཕྲག་སྔོན་མར་ནོ་སྦེལ་ཚོགས་ཆུང་ནས་ཞི་བདེའི་གཟེངས་རྟགས་དེ་གཞན་ལ་སྤྲོད་ཆོག་གི་མེད་སྐོར་བརྗོད་འདུག
ཕོ་བྲང་དཀར་པོའི་མགྲིན་ཚབ་པ་ཁཱ་རོ་ལིན་ལེ་ཝིཊ་(Karoline Leavitt)ཡིས་གསར་འགོད་པ་ལ་གཟའ་ཕུར་བུའི་ཉིན་ཨ་རིའི་སྲིད་འཛིན་ཊོམ་དང་ཝེ་ནེ་ཛུ་ལའི་ཕྱོགས་འགལ་ཚོགས་པའི་འགོ་ཁྲིད་གཉིས་ཚོགས་འདུ་ཞིག་འཚོགས་ཡོད་པ་དང་། སྲིད་འཛིན་ཊོམ་གྱིས་བུད་མེད་ཁོང་ནི་རང་དབང་འཐབ་རྩོད་པ་ཞིག་ཡིན་ཞིང་། མ་འོངས་པར་ཝེ་ནེ་ཛུ་ལའི་དང་འབྲེལ་བའི་སྐོར་ལ་གྲོས་མོལ་ཡང་ཡང་བྱེད་རྒྱུ་ཡིན་སྐོར་བརྗོད་པ་བཤད་འདུག འོན་ཀྱང་། སྲིད་འཛིན་ཊོམ་གྱིས་མ་འོངས་པར་ཕྱོགས་འགལ་ཚོགས་པའི་འགོ་ཁྲིད་བུད་མེད་ཁོང་ཝེ་ནེ་ཛུ་ལའི་འགོ་ཁྲིད་དུ་བསྐོ་རྒྱུར་འདོད་མོས་མེད་པ་དང་། རྒྱུ་མཚན་ནི་བུད་མེད་དེ་ལ་ཝེ་ནེ་ཛུ་ལའི་ནང་དུ་ཡོད་པའི་མི་མང་གིས་རྒྱབ་སྐྱོར་དེ་ཙམ་མེད་ཚུལ་བརྗོད་ཡོད་འདུག།
གསར་འགོད་པ། བསོད་ནམས་ཕུན་ཚོགས།
