རྒྱ་ནག་གི་དམག་སྤྱི་མཐོ་ཤོས་ཤིག་གནས་དབྱུང་བཏང་འདུག
ཕྱི་ལོ་༢༠༢༦ ཟླ་༡ ཚེས་༢༥ ཉིན། རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་སྤེལ་གསལ་ལྟར་ན། རྒྱ་ནག་གི་རྒྱལ་སྲུང་ལྷན་ཁང་གིས་བདུན་ཕྲག་སྔོན་མའི་རེས་གཟའ་སྤེན་པའི་ཉིན། རྒྱ་ནག་དབུས་དམག་དོན་ལྷན་ཁང་གི་དམག་སྤྱི་ཆེན་མོ་ཀྲང་ཡིའུ་ཞཱ་(Zhang Youxia)ཡིས་ཁྲིམས་དང་སྒྲིག་གཞི་ཚབས་ཆེན་འགལ་བའི་ཉེས་མིང་འོག་རྟོག་ཞིབ་བྱེད་བཞིན་ཡོད་ཅེས་བསྒྲགས་འདུག
དམག་སྤྱི་ཀྲང་ནི་སྲིད་འཛིན་ཞི་ཅིན་ཕིང་གི་འོག་གི་དམག་དོན་དབང་ཆ་ཆེ་ཤོས་ཡོད་མཁན་ཏེ། རྒྱ་ནག་གི་དྲག་པོའི་དམག་དཔུང་ལ་སྟངས་འཛིན་བྱེད་མཁན་དབུས་དམག་དོན་ལྷན་ཁང་(Central Military Commission)གི་ཚོགས་གཞོན་ཡིན་པ་མ་ཟད། ལོ་མང་པོའི་རིང་ཞི་ཅིན་ཕིང་གི་གྲོགས་པོ་ཉེ་པོ་ཞིག་ཀྱང་ཆགས་ཡོད་པར་བརྟེན། ཁོང་ཕམ་ཉེས་སུ་བཏང་བ་དེ་ནི་ཧང་སང་དགོས་པའི་གནད་དོན་ཞིག་ཆགས་ཡོད་འདུག
གནས་ཚུལ་དབྱེ་ཞིབ་པ་འགས། ཞི་ཅིན་ཕིང་གིས་ཐ་ན་ཆུང་དུས་ཀྱི་གྲོགས་པོ་ཡིན་ཡང་གནས་དབྱུང་བཏང་བ་དེས་ཞི་ཅིན་ཕིང་གི་རུལ་སུངས་རྒོལ་རྡུང་གི་ལས་འགུལ་ལ་མཚམས་ཐིག་མེད་པ་དང་། ལྷག་པར་དུ་ཞི་ཅིན་ཕིང་གིས་དམག་གི་འགོ་ཁྲིད་རྙིང་པ་ཚོར་ཡིད་ཆེས་བྱེད་ཐུབ་ཀྱི་མེད་པ་མཚོན་གྱི་ཡོད་ཅེས་བརྗོད་འདུག
དེ་བཞིན་དམག་དོན་མཉམ་འབྲེལ་ལས་ཁུངས་ཀྱི་འགོ་གཙོ་དམག་སྤྱི་ལིའུ་ཀྲེན་ལི་(Liu Zhenli)ལ་ཡང་རྟོག་ཞིབ་བྱེད་བཞིན་ཡོད་པ་བསྒྲགས་འདུག
ད་ཆར་ཞི་ཅིན་ཕིང་གིས་ཆེས་མཐོའི་དམག་སྤྱི་གཉིས་གནས་དབྱུང་བཏང་ཟིན་པར་བརྟེན། རྒྱ་ནག་གི་དབུས་དམག་དོན་ལྷན་ཁང་དུ་ཚོགས་གཙོ་སྲིད་འཛིན་ཞི་ཅིན་ཕིང་དང་། གཙང་བཤེར་ལ་སྟངས་འཛིན་བྱེད་མཁན་དམག་སྤྱི་ཀྲང་ཧྲིན་མིན་གཉིས་ལས་ལྷག་མེད་པ་དང་། ཞི་ཅིན་ཕིང་གིས་ཕྱི་ལོ་༢༠༢༢ ལོར་བསྐོས་པའི་ཚོགས་མི་དྲུག་གི་ནང་ནས་ད་ཆ་ལྔ་གནས་དབྱུང་བཏང་ཟིན་པ་བརྗོད་འདུག
དེ་བཞིན་(RAND)ཞིབ་འཇུག་ཁང་གི་མཁས་པ་མེ་ཧྲན་ཧྲན་(Shanshan Mei)གྱིས། དམག་དཔོན་འདི་གཉིས་ནི་རྒྱ་ནག་མི་དམངས་བཅིང་འགྲོལ་དམག་གི་དམག་འཐབ་ནང་དངོས་སུ་ཞུགས་མྱོང་ཡོད་པའི་དམག་སྤྱི་གཉིས་ཡིན་པས་ཁོང་གཉིས་མེད་པར་བཟོས་པ་དེས་དམག་དོན་གྱི་ཉམས་མྱོང་ལ་སྟོང་ཆ་ཆེན་པོ་ཞིག་བཟོས་ཡོད་ཅེས་དང་། ད་ཆ་འགོ་ཁྲིད་མཐོ་ཤོས་ཀྱི་ནང་དུ་དངོས་སུ་དམག་རྒྱག་པའི་ཉམས་མྱོང་ཡོད་མཁན་སུ་ཡང་མེད་ཅེས་དང་། དག་ཐེར་འདིས་རྒྱ་ནག་དམག་མིའི་ནང་རུལ་སུངས་རྩ་མེད་བཟོ་བར་ཕན་ཐོགས་སྲིད་ཀྱང་། དུས་གཅིག་ཏུ་ཉམས་མྱོང་ཅན་གྱི་དམག་དཔོན་མང་པོ་མེད་པ་བཟོས་པས། རྒྱ་ནག་གི་དམག་འཐབ་ཀྱི་ནུས་པར་གནོད་སྲིད་པ་བརྗོད་འདུག
ཞི་ཅིན་ཕིང་གིས་སྟག་དང་སྦྲང་མ་མཉམ་གསོད་ཀྱི་སྲིད་ཇུས་བརྒྱུད་ནས་ཐོག་མ་སྲིད་གཞུང་གི་ལས་ཁུངས་ཁག་ཏུ་ལྐོག་ཟ་རུལ་ཟུངས་བྱེད་མཁན་རྣམས་གཙང་མ་བཟོས་ཡོད་པ་མ་ཟད། ཉེ་བའི་ཆར་དམག་དོན་ལས་ཁུངས་ཁག་ལ་དམིགས་བསལ་གྱིས་གཞི་རྒྱ་ཆེ་བའི་དག་ཐེར་བྱེད་བཞིན་ཡོད་འདུག
ཞི་ཅིན་ཕིང་གིས་དཔོན་རིགས་རུལ་སུངས་ཅན་གྱིས་མི་དམངས་ཀྱི་ཁྲལ་དངུལ་ཟོས་ན་ཚོགས་པར་ཡིད་ཆེས་བརླག་སྲིད་པ་དང་། གལ་སྲིད་དམག་དཔོན་ཚོས་དངུལ་སྤྲད་ནས་གོ་གནས་ཉོ་བ་དང་། གོ་ལག་ཉོ་བའི་དངུལ་ཟོས་ན་དངོས་སུ་དམག་འཐབ་བྱེད་སྐབས་རྒྱ་ནག་གི་དམག་མིར་ནུས་པ་གང་ཡང་མེད་པ་ཆགས་རྒྱུ་ཡིན་པ་རྒྱུ་མཚན་དུ་བྱས་ནས། ཞི་ཅིན་ཕིང་གིས་རུལ་སུངས་ནི་དམར་ཤོག་ཚོགས་པའི་ཉེན་ཁ་ཆེ་ཤོས་ཡིན་པར་ངོས་འཛིན་བྱེད་ཀྱི་ཡོད་པ་བརྗོད་འདུག
སྤྱི་ཚོགས་ཁྲོད་ལྐོག་ཟ་རུལ་སུངས་བྱེད་མཁན་ལ་རྡུང་རྡེག་བཏང་བ་དེས་དམར་ཤོག་ཚོགས་པ་སྲ་བརྟན་དུ་གཏོང་བཞིན་ཡོད་པ་རྗོད་མཁན་ཞིག་དང་། ཕྱོགས་གཞན་ཞིག་ནས་ཞི་ཅིན་ཕིང་གིས་ལྐོག་ཟ་རུལ་སུངས་ལ་ཁ་གཡར་ནས་ཁ་གཏད་གཅོག་མཁན་རྣམས་རྩ་མེད་དུ་བཟོ་བཞིན་པ་རྗོད་བཞིན་ཡོད་འདུག
གསར་འགོད་པ། བློ་བཟང་རྒྱ་མཚོ།
