ཨེ་ཡིན།
སྣ་མང་ཚོང་ཁྲོམ་བསྟར་བའི་སྲང་ལམ་གྱི་བར་ན།།
ན་ཎིའི་རུ་དར་སྒྲེང་པའི་མགྲོན་ཁང་གི་ནང་དུ།།
དུ་ནག་རྔུབ་འཐེན་བྱེད་པའི་ཕྱི་གླིང་དང་འགྲོགས་པ།།
མ་བཟང་བུ་མོའི་རིགས་ཀྱི་ཀུན་སྤྱོད་ཅིག་ཨེ་ཡིན།།
ངེས་མེད་ཟས་རིགས་བསྒྲིགས་པའི་ཟ་ཁང་གི་ནང་ན།།
སྐྲ་རིང་རུ་ཚོན་ནག་པོ་རྒྱབ་ལོག་ཏུ་ཕྱོངས་ནས།།
ཕྱི་གླིང་རྐུབ་ཤ་རྗེན་པ་ལྕེ་ལྡག་པ་གོམས་པ།།
ཕ་བཟང་བུ་ཕོས་སྐྱོང་པའི་རྣམ་ཐར་ཞིག་ཨེ་ཡིན།།
མྱི་མང་སྣ་འདུས་ཚོགས་པའི་བཙོན་བྱོལ་གྱི་གསེབ་ན།།
ཆབ་སྲིད་བཙོན་པ་རྫུན་མའི་ཡིག་ཆ་རེ་ཁུར་ནས།།
བཟའ་ཟླ་བུ་ཕྲུག་བཅས་པ་ཕྱི་གླིང་ལ་འཕུར་བ།།
རྒྱལ་ཞེན་ལྷག་བསམ་ཅན་གྱི་བྱེད་སྟངས་ཤིག་ཨེ་ཡིན།།
