ལྷོ་གཞིས་སུ་བསྐྱོད་པའི་མཐོང་ཐོས།
ཚོང་ཁང་ཐ་ཐོར་སྒྲིག་པའི་སྲང་ལམ་ན།།
སྐྱ་སེར་བསྣོལ་མ་འཐབ་པའི་འདུ་ལང་གསེབ།།
ཆུ་འཁྱགས་འགྱིག་དམ་གང་ལ་སྐྱབས་བཅོལ་ནས།།
ཐོག་ཁའི་ལྕགས་ཁྲ་གསེབ་ནས་རྒྱང་བལྟ་བྱས།།
མེ་ལྕེ་དགུང་ལ་མཆེད་པའི་ཚ་རླབས་ཀྱིས།།
ལྷོ་རླུང་ཁྱུད་མུད་བཏང་པའི་གྲུ་ག་ན།།
རི་ཤལ་ནག་རིལ་རྒྱུག་པའི་འཚང་ཀ་ཡིས།།
ཐལ་རྡུལ་གང་སར་བསྣོལ་པ་མིག་ལ་གཟེར།།
ཀ་རུ་ནག་པོ་གཏོང་པའི་འབྱོར་ལྡན་གྱིས།།
སྲང་ལམ་དོག་པོ་འཕྲེད་དུ་བཅད་པའི་སྣེ།།
སྦག་སྦག་འགྲོ་ལམ་བཀག་པའི་འཚང་ཀ་ཡིས།།
ཁྲོམ་རའི་མི་ཚོགས་བསྐྱིལ་པའི་ལྟད་མོ་མཐོང༌།།
རྐང་ལག་དུམ་བུར་ཆད་པའི་སྤྲང་ཕྲུག་ཚོར།།
ཡ་ཀི་རྩ་གསུམ་ལྷ་ཡིས་མ་སྐྱབས་པར།།
སྟོད་འགག་སྤག་སྤག་རལ་པོའི་གྲྭ་རྐྱང་ཚོས།།
སྒོར་རྡོག་རེ་གཉིས་འཕངས་པའི་སིལ་སྒྲ་སྙན།།