Author: lobsang la

ྋགོང་ས་མཆོག་གི་བཀའ་སློབ། རྣམ་རྒྱལ་གྲྭ་ཚང་ཤེས་ཡོན་ལྷན་ཚོགས་ནས་དཔར་འགྲེམས་བྱས་པ། བོད་ཀྱི་ནང་ཆོས་ངོ་སྤྲོད་སྙིང་བསྡུས་ཞེས་པའི་དེབ་ལས་བཏུས།

ནང་ཆོས། སྤྱིར་འཛམ་བུའི་གླིང་འདིའི་སྒང་ལ་བོད་པ་གཅིག་པུ་མ་རེད། ཤྲི་ལངྐ༌། འབར་མ། ཐའེ་ལན་ཌི་དེ་ཚོར་ནང་པ་མང་པོ་ཡོད་པ་རེད། རྒྱ་ནག་ལ་ཡོད་པ་རེད། འཇར་པན་ལའང་ཡོད་པ་རེད། ཀོ་རི་ཡ། ཝི་ཏི་ནམ་སོགས་ལུང་པ་མང་པོ་ཞེ་དྲག་ཡོད་པ་རེད། ལུང་པ་དེ་དག་ནུབ་ཕྱོགས་པར་འབྲེལ་བ་སྔ་མོ་ནས་ཞེ་དྲག་བྱུང་བསྡད་ཡོད་པ་རེད། ནང་པའི་ལུང་པ་མང་པོ་ཞིག་དབྱིན་ཇིའི་མི་སེར་སྤེལ་ཡུལ་གྱི་འོག་ལ་བསྡད་པ་རེད། དེ་ག་ནང་བཞིན་ཧཕ་རན་སིའི་མི་སེར་སྤེལ་ཡུལ་གྱི་འོག་ལ་བསྡད་པ་རེད། དེ་དུས་ནས་འབྲེལ་བ་ཞེ་དྲག་ཡོད་པ་རེད་དེ། ཡིན་ནའང་ནུབ་ཕྱོགས་པའི་ཚན་རིག་པའི་ནང་ནས། ནང་ཆོས་ནས་ཚུར་རིག་པ་བསླབ་རྒྱུའི་འབད་བརྩོན་བྱེད་མཁན་ཧ་ལམ་བྱུང་ཡོད་པ་མ་རེད། ཤར་ཕྱོགས་པའི་ཚན་རིག་པ་མཁས་པ་ཆེན་པོ་དེ། སྙན་གྲགས་ཆེན་པོ་དེས་ནང་ཆོས་ལ་དོ་སྣང་གཅིག་སླེབས་ནས། མ་འོངས་པ་ལ་ཚན་རིག་དང་ཆོས་མཉམ་དུ་འགྲོ་རྒྱུ་ཞིག་ཆགས་པ་ཡིན་ན། ནང་ཆོས་ཀྱིས་ཚན་རིག་དང་མཉམ་དུ་འགྲོ་གི་རེད་ཟེར་བ་ཞིག་ཁོང་གིས་བཤད་ཡོད་པ་རེད། མ་གཏོགས་གཞན་དམིགས་བསལ་ནང་ཆོས་ཀྱི་ནང་ནས་ཚན་རིག་པས་ཚུར་རེ་བ་བརྒྱབ་ནས་བསླབ་རྒྱུ་དེ་བྱུང་མྱོང་ཡོད་པ་མ་རེད།

ྋགོང་ས་སྐྱབས་མགོན་ཆེན་པོ་མཆོག་གིས་བྱང་ཨ་རིའི་ས་ཁུལ་ཡོངས་ཀྱི་ཆོས་ལུགས་རིས་མེད་ཀྱི་ཚོགས་འདུར་བསྩལ་བའི་བཀའ་སློབ། རིགས་སློབ་ལྷག་བརྩེགས་ཚོགས་ཆུང་ནས་བོད་བསྒྱུར་ཞུས་པ། ནང་པའི་ལྟ་སྤྱོད་ཀུན་བཏུས་ལས་བཏུས།

ང་ཚོ་འདིར་ཆོས་ལུགས་འདྲ་མིན་གྱི་མི་སྣ་དུ་མ་ཐུན་མོང་དུ་མཉམ་འཛོམས་བྱུང་བ་འདི་ནི་རྟགས་མཚན་བཟང་པོ་ཞིག་ཡིན། ཆོས་ལུགས་ལ་ནང་གསེས་ལྟ་བ་མི་འདྲ་བ་དུ་མ་ཞིག་ཡོད་པ་དང༌། ལྟ་བའི་གནད་དོན་འགའ་ཞིག་ནི་རྩ་བ་ནས་མི་མཐུན་པའི་རྒྱབ་འགལ་དུ་གྱུར་པའང་ཡོད། དཔེར་ན་ནང་པ་རྣམས་ཀྱིས་འཇིག་རྟེན་བཀོད་པ་པོ་ཁས་ལེན་གྱི་མེད་ལ། ཡེ་ཤུས་འཇིག་རྟེན་བཀོད་པ་པོ་ཞིག་གི་སྟེང་ནས་ལྟ་བ་རྣམས་བཤད་ཀྱི་ཡོད། དེ་ལྟར་ཁྱད་པར་ཆེན་པོ་ཡོད་ནའང་ངས་ཁྱེད་རང་ཚོའི་ཆོས་ལུགས་ལ་གུས་བརྩི་ཆེན་པོ་བྱེད་ཀྱི་ཡོད། དེ་ཡང་སྲིད་དོན་གྱི་རྒྱུ་མཚན་དང་ཡ་རབས་ཙམ་གྱི་ཆ་ནས་མ་ཡིན་པར་ཁ་ཞེ་གཉིས་མེད་ཀྱི་སྒོ་ནས་ཡིན། ལོ་ངོ་བརྒྱ་ཕྲག་མང་པོའི་རིང་ཁྱེད་ཚོའི་ལམ་ལུགས་འདིས་མིའི་སྤྱི་ཚོགས་ལ་ཞབས་འདེགས་ཆེན་པོ་བསྒྲུབས་ཡོད།

སྡུག་བསྔལ་དང༌། ཆགས་སྡང་འགོག་ཚུལ་དཔེ་དང་བཅས་པ།

དེ་ལ་བྱམས་པ་ཟེར་བ་དེ་མཐའ་གཅིག་ཏུ་ཡུལ་དེ་ལ་ཡིད་དུ་འོང་བར་བལྟས་ནས་དེ་ལ་སྐྱིད་པ་ཞིག་བྱུང་ན། བདེ་བ་ཞིག་བྱུང་ན། ཡག་པོ་ཞིག་བྱུང་ན་བསམ་པའི་བློ་དེ་ལ་བྱམས་པ་ཟེར་གྱི་འདུག་གཱ། བྱས་ཙང་ཡུལ་དེ་ལ་ཞེ་ཐག་པ་ནས་སྡང་བའི་བློ་དེ་དང༌། ཡུལ་དེ་ལ་ཞེ་ཐག་པ་ནས་བྱམས་པའི་བློ་གཉིས་པོ་དེ་འཛིན་སྟངས་འགལ་བ་རེད་འདུག་གཱ།

འདོན་ཐེངས་སྔོན་མའི་འཕྲོས།

སྡུག་བསྔལ་དང་སྡུག་བསྔལ་བ་གཉིས་ལ་ཁྱད་པར་ཆེ། དེ་འདྲ་ཡིན་དུས། ཟག་བཅས་ཚོར་བ་བདེ་བ་ལས།། ཡིད་འབྱུང་ཕྱི་རོལ་པ་ལའང་མཆིས།། ཟག་བཅས་ཀྱི་ཚོར་བ་བདེ་བ་དེ་སྡུག་བསྔལ་ཡིན་པ་ཤེས་པ་དེ་མུ་སྟེགས་པ་ལ་ཡང་ཡོད་པ་རེད། སྤྱིར་བཏང་ང་ཚོའི་མི་ལ་ཕལ་ཆེར་ཡོད་པ་མ་རེད་དེ། ཡིན་ན་ཡང་མུ་སྟེགས་པའི་ཏིང་ངེ་འཛིན་དོན་དུ་གཉེར་མཁན། བསམ་གཟུགས་སྒོམ་མཁན་དེ་ཚོའི་གྲས་ཟག་བཅས་ཀྱི་ཚོར་བ་བདེ་བ་ལ་ཡིད་འབྱུང་ནས། འདོད་པའི་ཡོན་ཏན་ལ་རྦད་དེ་ཉེས་དམིགས་སུ་མཐོང་ནས། དེ་ལས་ཡིད་ཐག་བསྲིང་ནས་ནང་གི་ཏིང་ངེ་འཛིན་གྱི་རོ་ལ་ཆགས་ནས་ཏིང་ངེ་འཛིན་རྩེ་གཅིག་ཏུ་སྒོམ་རྒྱུ། མདོར་ན་ཁམས་གོང་མ་དེ་ཞི་བ་ལ་བལྟས། རང་ས་ཡིན་ན་ཡང་འདྲ། འདི་ལྟར་ལབ་ན་ཡག་པོ་མེད་དམ།

ྋགོང་ས་མཆོག་གི་བཀའ་སློབ་ནང་ཆོས་ངོ་སྤྲོད་སྙིང་བསྡུས་ལས་བཏུས།

བཅོམ་ལྡན་འདས་ཀྱིས་བདེན་བཞི་གསུང་ཡོང་དུས། བདེན་བཞིའི་ངོ་ལ་བཟླས་པ་ཟེར་བ་དེ་གསུངས་ཚར་བའི་རྗེས་ལ། བདེན་བཞིའི་བྱ་བ་ལ་བཟླས་པ་ཟེར་བ་དེ། བྱ་བ་ལ་བཟླས་པ་ཟེར་བ་དེས་བླང་དོར་གསུངས་ཀྱི་ཡོད་པ་རེད། སྡུག་བསྔལ་ཤེས་པར་བྱ། ཀུན་འབྱུང་སྤང་བར་བྱ། འགོག་པ་མངོན་དུ་བྱ། ལམ་བསྒོམ་པར་བྱ། དེས་བླང་དོར་གྱི་གནས་གང་འདྲ་ཞིག་སྟོན་པ་རེད་ཟེར་ན། སྡུག་བསྔལ་ཟེར་བ་དེ་ཤེས་དགོས་ཀྱི་རེད་ཟེར། སྡུག་བསྔལ་ཤེས་དགོས་ཀྱི་རེད་གསུངས་པ་དེ། འདུ་བྱེད་ཀྱི་སྡུག་བསྔལ་གཙོ་བོར་གསུངས་ཀྱི་ཡོད་པ་རེད།