བསྔོ་སྨོན་མཆོད་འབུལ་གྱི་བོད་དོན་ལས་འགུལ།
ཟླ་འདིའི་ཚེས་༢༧ ཉིན་ཡོ་རོབ་སྦེལ་ལྗམ་གྱི་རྒྱལ་སར་ས་གནས་བོད་རིགས་ཚོགས་པའི་གོ་སྒྲིག་འོག བོད་རང་དབང་འཐབ་རྩོད་ཆེད་རང་ལུས་མེར་སྲེག་གཏོང་མཁན་གྱི་ཆེད་དུ་བསྔོ་སྨོན་ཞིག་ཚོགས་ཡོད་པ་རེད།
དེ་ཡང་ཟླ་འདིའི་ཚེས་༢༧ གྱི་ཉིན་རྒྱབ་ཡོ་རོབ་སྦེལ་ལྗམ་ས་གནས་བོད་རིགས་ཚོགས་པའི་གོ་སྒྲིག་འོག བོད་མི་བརྒྱ་ཕྲག་བརྒལ་བ་ཞིག་རྒྱལ་ས་བྷུ་རུ་སེལ་གྱི་ན་ལེནྡྲའི་དགོན་པར་འདུ་འཛོམས་ཀྱིས། བོད་བསྟན་སྲིད་རང་དབང་སླར་གསོའི་ཆེད་ལུས་སྲོག་ལོངས་སྤྱོད་དང་བཅས་པ་བློས་བཏོང་གནས་མཁན་སྤྱི་དང་། ལྷག་པར་ཟླ་འདིའི་ནང་བོད་ནས་སངས་རྒྱས་མཁར་དང་། ཚེ་པེ་སྐྱིད། གྲྭ་སྐལ་བཟང་ཡེ་ཤེས་བཅས་ཀྱིས་བོད་རང་དབང་སླར་གསོའི་ཆེད་རང་ལུས་མེ་སྲེག་གནང་སྟེ་འདས་གྲོངས་སུ་སོང་བར་བསྔོ་སྨོན་དང་། ཤུལ་ལུས་ནང་མི་སྤུན་མཆེད་དག་ལ་གདུང་སེམས་མཉམ་བསྐྱེད་ཆེད། བཟང་སྤྱོད་སྨོན་ལམ་དང་བྱམས་སྨོན་སོགས་བཏོན་ཡོད་པ་རེད།
སྐབས་དེར་ས་གནས་བོད་རིགས་ཚོགས་པའི་ཚོགས་གཙོ་ཐུབ་བསྟན་འཕེལ་རྒྱས་ཀྱིས་མི་མང་ལ་བོད་ནང་གི་གནས་བབས་སྤྱི་དང་། ལྷག་པར་བོད་རང་དབང་སླར་གསོའི་ཆེད་རང་སྲེག་གཏོང་མཁན་དག་ངོ་སྤྲོད་དང་འབྲེལ། ཡོ་རོབ་སྦེལ་ལྗམ་དུ་ཡོད་པའི་བོད་མི་ཚོས་ཀྱང་། སོ་སོའི་ལྟོ་གོས་ཙམ་གྱི་ཆེད་དུ་ལས་ཀ་བྱ་རྒྱུ་ཙམ་མིན་པར། བོད་དོན་དང་བོད་ནང་གི་བོད་མི་ཚོའི་ཆེད་དུ་རང་ནུས་གང་ཡོད་ཀྱིས་བསམ་བློ་གཏོང་བ་དང་ལས་འགུལ་སྤེལ་དགོས་སྐོར་དང་། ལྷག་པར་ང་ཚོས་སྐྱབས་བཅོལ་ཞུ་བའི་སྐབས་ལ་བོད་མིར་རྒྱ་ནག་གིས་སྡུག་པོ་གཏོང་གི་ཡོད་པ་དང་། བོད་མི་ལ་དཀའ་ངལ་ཡོད་པ་བརྗོད་ཀྱི་ཡོད་པས། གནས་ཚུལ་དེ་ཚོ་སེམས་ལ་བཟུང་ནས་བོད་ཀྱི་རྩ་དོན་ཆེད་ལས་འགུལ་སྤེལ་དགོས་སྐོར་གསུངས་སོང་།
སྦེལ་ལྗམ་བོད་རིགས་ཚོགས་པ་ནི། སྔར་སྦེལ་ལྗམ་ས་གནས་སུ་བོད་མིའི་སྐྱིད་སྡུག་ཚོགས་པ་ཞིག་ཡོད་པ་དེ་༡༩༩༥ ལོར་བོད་རིགས་ཚོགས་པའི་ངོ་བར་བསྒྱུར་བ་དང་། ༡༩༩༩ ལོར་ས་གནས་མི་མང་གིས་འོས་བསྡུའི་ལམ་ནས་རྒྱུན་ལས་བསྐོ་སྲོལ་བྱུང་འདུག ཚོགས་པའི་དམིགས་ཡུལ་ནི་ས་གནས་སུ་ལོ་ལྟར་བོད་མིའི་རང་དབང་སྒེར་ལངས་དུས་དྲན་སྲུང་བརྩི་གོ་སྒྲིག་དང་། བོད་དོན་དྲིལ་བསྒྲགས། བོད་མིའི་སྒྲིག་འཛུགས་ཀྱི་གནད་ཡོད་མི་སྣ་ས་གནས་སུ་ཕེབས་མཁན་རྣམས་ལ་སྣེ་ལེན། དེ་མིན་ཆོས་རིག་འཛིན་སྐྱོང་དང་སྐད་ཡིག་སྲུང་སྐྱོབ་སོགས་དང་འབྲེལ་བའི་ལས་འགུལ་སྦེལ་ཀྱི་ཡོད་པ་རེད་འདུག །
གསར་འགོད་པས་བཀྲ་ཤིས་བདེ་ལེགས་ཀྱིས་ས་གནས་ནས།
