གསར་འགྱུར་གནད་བསྡུས་ཁག

རྡོར་གདན་དུ་བོད་རིགས་ན་གཞོན་རྩེད་མོ་ཚོགས་པའི་གོ་སྒྲིག་འོག རྐང་རྩེད་སྤོ་ལོའི་འགྲན་སྡུར་ཞིག་བྱས་ཏེ། མཐའ་མའི་རྒྱལ་ཁ་ཀ་ལི་མན་ཊོ་དོན་གྲུབ་གླིང་རུ་ཁག་ལ་ཐོབ་ཡོད་པ་རེད།

རྒྱ་གར་གནས་མཆོག་རྡོ་རྗེ་གདན་དུ་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་དཔལ་དུས་ཀྱི་འཁོར་ལོའི་དབང་ཆེན་ཐེངས་༣༤ པའི་བཀའ་དབང་བཀའ་དྲིན་སྩལ་བཞིན་ཡོད་པ་དང་། སྐབས་དེར་རྒྱ་བལ་འབྲུག་གསུམ་དང་ཧི་མ་ལ་ཡའི་རི་རྒྱུད་བཅས་ཀྱིས་གཙོས་འཛམ་གླིང་གི་རྒྱལ་ཁབ་ཁག་༩༢ ནས་དད་ལྡན་ཆོས་ཞུ་བ་ཉིས་འབུམ་ལྷག་ཙམ་འདུ་འཛོམས་བྱུང་ཡོད་པ་ནི། འདས་པའི་དཔལ་དུས་ཀྱི་འཁོར་ལོའི་དབང་ཆེན་རིམ་པའི་ལོ་རྒྱུས་ཁྲོད་དད་ལྡན་ཆོས་ཞུ་བའི་གྲངས་འབོར་མང་ཤོས་དེ་ཆགས་ཡོད་པ་རེད།

ལོ་ན་༦༤ ཡིན་པའི་ལྷོ་ཀོ་རི་ཡའི་ནང་པའི་གྲྭ་པ་འཇུང་ཝོན་གྱིས། ཕྱི་ལོ་༢༠༡༥ ལོར་ལྷོ་ཀོ་རི་ཡ་དང་ཉི་ཧོང་གཉིས་བར། འཛམ་གླིང་དམག་ཆེན་གཉིས་པའི་སྐབས་ལྷོ་ཀོ་རི་ཡའི་བུད་མེད་མང་པོ་ཞིག ཉི་ཧོང་གི་དམག་མིས་ཆགས་སྤྱོད་ཀྱི་བྲན་གཡོག་ལ་བེད་སྤྱད་པའི་གནད་དོན་ཐད་བཞག་ཡོད་པའི་གྲོས་མཐུན་དང་། སྲིད་འཛིན་ལྕམ་པག་གྷེའུ་ཧེ་ལ་ངོ་རྒོལ་ཆེད་ཟླ་འདིའི་ཚེས་༧ ཉིན་རང་སྲེག་བྱས་འདུག་པ་དང་། ཟླ་འདིའི་ཚེས་༩ ཉིན་གྱི་དགོང་མོར་སྨན་ཁང་ནང་གྲོངས་ཡོད་འདུག

ཟླ་འདིའི་ཚེས་༩ ཉིན་གྱི་ཕྱི་དྲོར་རྡོར་གདན་དུས་འཁོར་དབང་ཆེན་སྐབས་ཀྱི་གསར་འགོད་ལྟེ་གནས་ཁང་དུ་དུས་དབང་གོ་སྒྲིག་ཚོགས་ཆུང་གི་ཚོགས་གཙོ་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་དང་། འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་གཉིས་ཀྱིས་གསར་འགོད་ལྷན་ཚོགས་ཤིག་བསྐོངས་ཡོད་པ་རེད།

ཟླ་འདིའི་ཚེས་༨ ཉིན་གྱི་སྔ་དྲོར་རྡོར་གདན་དུས་དབང་སྐབས་ཀྱི་གསར་འགྱུར་མཁོ་གཏོང་ལྟེ་གནས་ཁང་དུ། སྲིད་སྐྱོང་བློ་བཟང་སེང་གེ་དང་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་གཉིས་ཀྱིས་བོད་མིའི་སྒྲིག་འཛུགས་ངོས་ནས་དུས་དབང་གོ་སྒྲིག་ཞུས་པ་དང་འབྲེལ་བའི་གསར་འགོད་ལྷན་ཚོགས་ཤིག་བསྐོངས་ཡོད་པ་རེད།

ཟླ་འདིའི་ཚེས་༦ ཉིན་ཕྱི་དྲོ་ཆུ་ཚོད་༦ པའི་ཐོག་བོད་ཀྱི་དགུ་བཅུ་གསུམ་ལས་འགུལ་ཚོགས་པའི་གོ་སྒྲིག་འོག རྡོ་རྗེ་གདན་མཆོད་རྟེན་ནང་དུ་བོད་ཀྱི་རྒྱལ་གཅེས་དཔའ་བོ་ཕོ་མོ་འདས་གསོན་ཡོངས་ཀྱི་ཆེད་སྟོང་མཆོད་ཀྱི་སྨོན་ལམ་གསུངས་ཡོད་པ་རེད།

ཟླ་འདིའི་ཚེས་༦ ཉིན་གྱི་བྷི་ཧར་གསར་འཕྲིན་ཞེས་པའི་སྟེང་གནས་ཚུལ་བཀོད་གསལ། ཟླ་འདིའི་༥ ཉིན་གྱི་དགོང་མོར་རྒྱ་གར་གྱི་མངའ་སྡེ་བྷེ་ཧར་གྱི་ནང་པའི་གནས་མཆོག་རྡོ་རྗེ་གདན་གྱི་མཆོད་རྟེན་གྱི་ཁུལ་ལ། གྲྭ་པ་མེ་མདའ་རྡེའུ་ཡོད་པ་འཁྱེར་མཁན་ཞིག་འཇུ་བཟུང་བཀག་ཉར་བྱས་ཡོད་འདུག

ཉི་ཧོང་གི་མི་ཚེའི་ཉེན་སྲུང་མ་འཇོག་ཚོང་ལས་ཁང་ཧྥུ་ཀོ་ཀུ་ཞེས་པ་ཞིག་གིས། ལས་བྱེད་༣༤ ལས་གནས་ནས་དབྱུང་ནས་དེ་དག་ཚབ་ཏུ་བཅོས་མའི་རིག་པ་ཡོད་མཁན་གྱི་མི་གཟུགས་འཕྲུལ་ཆས་བསྐོ་གཞག་བྱ་རྒྱུ་ཡིན་འདུག

ཟླ་འདིའི་ཚེས་༣ ཉིན་ལུམྦི་ནི་རུ་འཚོགས་པའི་ས་སྐྱའི་འཇིག་རྟེན་ཞི་བདེའི་སྨོན་ལམ་ཆེན་མོ་སྐབས་ཉེར་ལྔ་པ་དེ་མཇུག་བསྒྲིལ་ཡོད་པ་རེད།