གསར་འགྱུར་གནད་བསྡུས་ཁག

ཟླ་འདིའི་ཕྱི་ཚེས་༡༧ ཉིན་རྒྱ་གར་གྱི་བརྒྱུད་ལམ་ཁག་ཏུ་གནས་ཚུལ་འཁོད་གསལ་ལྟར་ན། ཉེ་ཆར་༧གོང་ས་མཆོག་དང་རྒྱ་གར་གྱི་སྲིད་འཛིན་གཉིས་མཇལ་འཕྲད་གནང་བར་རྒྱ་ནག་གིས་སྐྱོན་བརྗོད་བྱས་ཡོད་པ་དང་། རྒྱ་གར་གྱིས་དེ་ནི་ཆབ་སྲིད་དང་འབྲེལ་བ་གང་ཡང་མེད་སྐོར་གྱི་ལན་འདེབས་བྱས་འདུག

རྒྱ་གར་ནང་བཙན་གཡེམ་གྱི་གནས་ཚུལ་མང་ཤོས་འབྱུང་ཡུལ་རྒྱལ་ས་དྷི་ལིར་ལོ་འདིའི་ཟླ་༡༡ པའི་ཚེས་༣༠ བར། ཉིན་རེར་བཙན་གཡེམ་གྱི་གནས་ཚུལ་ཉེན་རྟོག་ཁང་ལ་ཐོ་འགོད་བྱས་པ་ཆ་སྙོམས་༦ རེ་བྱུང་འདུག

ཟླ་འདིའི་ཕྱི་ཚེས་༡༥ ཉིན་སྦི་སྦི་སི་གསར་ཁང་གིས་གནས་ཚུལ་སྤེལ་གསལ་ལྟར་ན། རྒྱ་མི་གནའ་དངོས་སྡུ་རུབ་པ་ཞིག་གིས་དུས་རབས་༡༨ པའི་རྒྱ་ནག་མན་ཇུ་གོང་མ་དྲུག་པ་ཆན་ལོང་གི་དམ་ཕྲུག་ཅིག་ལ། ཨ་སྒོར་ས་ཡ་༢༢ སྤྲད་ནས་ཉོས་ཡོད་པ་དང་། དེ་ནི་ད་བར་དམ་ཕྲུག་དེའི་གོང་ཚད་མཐོ་ཤོས་ཆགས་ཀྱི་ཡོད་འདུག

རྒྱ་གར་གྱི་གློག་བརྙན་ཁང་དུ་གློག་བརྙན་འགོ་མ་འཛུགས་སྔོན་དུ་རྒྱལ་གླུ་གཏོང་དགོས་པ་ཁྲིམས་གསར་བཟོས་ཡོད་པ་དང་། སྐབས་ཁ་ཤས་ལ་མི་ཁག་ཅིག་གིས་རྒྱལ་གླུ་གཏོང་བཞིན་སྐབས་ཡར་མ་ལངས་པས་འཛིན་བཟུང་བྱས་པ་དང་། ཁག་ཅིག་ལ་རྡུང་རྡེག་བཏང་བའི་གནས་ཚུལ་ཡང་བྱུང་ཡོད་འདུག

ཨ་རིའི་སྲིད་འཛིན་འདེམས་ཐོན་སྐུ་ཞབས་ཌོ་ལན་ཊོམ་གྱིས་ཨ་རིས་རྒྱ་ནག་གོང་བུ་གཅིག་འགྱུར་གྱི་སྲིད་ཇུས་དེ་རྒྱུ་མཚན་གང་ལ་བརྟེན་ནས་བརྩི་སྲུང་བྱེད་དགོས་ཀྱི་ཡོད་པ་ཧ་གོ་ཡི་མེད་སྐོར་བརྗོད་འདུག་པ་དང་། དེ་ལ་རྒྱ་ནག་གཞུང་འབྲེལ་བརྒྱུད་ལམ་ཁག་ཏུ་སྐྱོན་བརྗོད་བྱས་ཡོད་འདུག

ཐའེ་ཝན་གྲོས་ཚོགས་འཐུས་མི་དང་སློབ་མ། མི་མང་དཀྱུས་མ་སོགས་ཀྱིས་སྐུ་ཞབས་ཊོམ་གྱིས་ལྕམ་ཚེ་དབྱིང་ཝེན་དང་ཁ་པར་བརྒྱུད་སྐད་ཆ་བཤད་པ་དེར། ཁག་ཅིག་གིས་རེ་བའི་འོད་ཟེར་གསར་པ་ཞིག་ཡིན་པ་དང་། ཁག་ཅིག་གིས་ཐའེ་ཝན་བེད་སྤྱོད་བྱས་པ་སོགས་ཀྱི་བསམ་ཚུལ་འདྲ་མིན་ཡོད་འདུག

ཨ་རིའི་གཞས་མ་གྲགས་ཅན་ལེ་ཌི་གྷ་གྷ་(Lady Gaga) རང་ལོ་༡༩ ལ་སོན་སྐབས་བཙན་གཡེམ་གྱི་དོན་རྐྱེན་བྱུང་ནས་སེམས་གཅོང་གི་ན་ཚ་ཕོགས་ཡོད་པ་མོ་རང་གིས་བརྗོད་འདུག