གསར་འགྱུར་གནད་བསྡུས་ཁག

ཟླ་འདིའི་ཕྱི་ཚེས་༡༥ ཉིན་སྦི་སྦི་སི་གསར་ཁང་གིས་གནས་ཚུལ་སྤེལ་གསལ་ལྟར་ན། ཉེ་ཆར་འབར་མའི་བྱང་ཕྱོགས་སུ་ཆགས་པའི་ཀ་ཆིན་མངའ་སྡེ་ནང་ནས་གཏེར་ཁ་སྔོག་འདོན་པ་ཚོས་ལྗིད་ཚད་ཊོན་༡༧༥ ཅན་གྱི་ གཡང་ཊི་ཤིན་ཏུ་ཆེན་པོ་ཞིག་བརྙེད་ཡོད་འདུག

ཨ་རིའི་གཞས་པ་དང་གཞས་ཚིག་འབྲི་མཁན་བྷོབ་ཌ་ལན་ལ་ཕྱི་ལོ་༢༠༡༦ ལོའི་ནོ་བྷེལ་རྩོམ་རིག་གི་གཟེངས་རྟགས་ཐོབ་ཡོད་འདུག

ཟླ་འདིའི་ཚེས་༡༢ ཉིན་ཝ་ཤིན་ཌོན་ཉིན་རེའི་ཚགས་པར་གྱི་དྲ་གནས་ཐོག་གནས་ཚུལ་འཁོད་གསལ་ལྟར་ན། ཧོང་ཀོང་ནང་དེ་རིང་གྲོས་ཚོགས་འཐུས་མིའི་དམ་འབུལ་མཛད་སྒོ་འཚོགས་ཡོད་པ་དང་། སྐབས་དེར་གྲོས་ཚོགས་འཐུས་མི་ངོ་རྒོལ་བྱེད་མཁན་བྱུང་ཡོད་པ་རེད། དེ་ཡང་སྐབས་དེར་འདི་ལོའི་ཕྱི་ཟླ་དགུ་པའི་ནང་འདེམས་ཐོན་བྱུང་བའི་ཧོང་ཀོང་མང་གཙོ་ཕྱོགས་གཏོགས་ཀྱི་གྲོས་ཚོགས་ཀྱི་འཐུས་མི་ཚོས། “ཧོང་ཀོང་རྒྱ་ནག་མ་རེད་”ཅེས་བྲིས་པའི་འཕྲེད་དར་བཟུང་བ་དང་། ཧོང་ཀོང་གི་གནད་དོན་དེ་རང་ཐག་རང་གཅོད་བྱེད་དགོས་ཞེས་བརྗོད་ཡོད་འདུག གྲོས་ཚོགས་ཀྱི་འཐུས་མིའི་ཁོངས་ནས་མི་གཅིག་གིས་ངོ་རྒོལ་གྱི་རྣམ་པའི་ཐོག་ནས་དམ་འབུལ་ཤིན་ཏུ་དལ་མོར་བསྐྱོར་ཡོད་པ་དང་། གཞན་རྣམས་ཀྱིས་རྒྱ་ནག་ཅེས་པའི་ཚིག་དེ་སྒྲ་གདངས་མ་དག་པར་བསྒྱུར་ནས་བསྐྱོར་ཡོད་འདུག

ཟླ་འདིའི་ཚེས་༡༡ ཉིན་གྱི་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་སྤེལ་གསལ། འགྲོ་བ་མིའི་ཐོབ་ཐང་གི་ཚོགས་པ་མང་པོའི་སྡེ་ཚན་ཞིག་གིས། རྒྱ་ནག་གི་བཙོན་ཁང་དུ་ཡོད་པའི་ཡུ་གུར་གྱི་སློབ་དཔོན་སྐུ་ཞབས་ཨེལ་ཧམ་ཊོ་ཧེ་ཊི་( Ilham Tohti)ལ་ཕྱི་ལོ་༢༠༡༦ ལོའི་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་མར་ཊིན་ཨིན་ནལ་སེག་གཟེངས་རྟགས་(The Martin Ennals Award) སྤྲད་ཡོད་འདུག

ཨ་རིའི་གྲོས་ཚོགས་ཀྱི་རྒྱ་ནག་གི་འགྲོ་བ་མིའི་ཐོབ་ཐང་སྐོར་གྱི་ལྷན་ཚོགས་ཀྱིས་སྙན་ཐོ་ཞིག་བཏོན་ཏེ། རྒྱ་ནག་གི་འགྲོ་བ་མིའི་ཐོབ་ཐང་སྐོར་སྐྱོ་རུ་སོང་ཡོད་སྐོར་འཁོད་འདུག

པ་ཀི་སི་ཐན་རྒྱ་གར་གྱི་ཁ་གཏད་དུ་ལངས་པར་རྒྱ་ནག་གིས་རྒྱབ་སྐྱོར་བྱས་པར་བརྟེན། རྒྱ་ནག་དེ་རྒྱ་གར་གྱི་དགྲ་བོ་ཡིན་པར་བསྒྲགས་ནས་རྒྱ་ནག་གི་ཚོང་ཟོག་ཉོ་ཚོང་བྱེད་རྒྱུ་བཀག་ཡོད་འདུག