གསར་འགྱུར་གནད་བསྡུས་ཁག

ཟླ་འདིའི་ཚེས་༡༩ ཉིན་གྱི་སྔ་དྲ་༧གོང་ས་མཆོག་བཞུགས་སྒར་དྷ་ས་ནས་ཨ་རིར་ཆིབས་བསྒྱུར་གནང་ཡོད་པ་དང་། ཐེངས་འདིར་སྐུ་གཟུགས་བརྟག་དཔྱད་དང་། ཚན་རིག་གི་ཚོགས་འདུ་ཞིག་ལ་ཕེབས་འཆར་ཡོད་པ་རེད།

ཡ་སུ་ཊ་རོ་(Yasutaro)ནི་ཕྱི་ལོ་༡༩༠༣ ཟླ་༣ པའིཚེས་༡༣ ཉིན་ཉི་ཧོང་དུ་སྐྱེས་ཡོད་པ་དང། ཕྱི་ལོ་༢༠༡༦ ལོའི་ཟླ་འདིའི་ཚེས་༡༩ ཉིན་ཉི་ཧོང་གི་གྲོང་ཁྱེར་ན་གྷོ་ཡ་རུ་གྲོངས་པ་དང། ཁོང་ད་ལྟ་ལོ་༡༡༢ ཡིན་པས་འཛམ་གླིང་ནང་ལོ་ན་མཐོ་ཤོས་ཀྱི་མི་ཡིན་པའི་གནས་ཚུལ་སྤེལ་འདུག

ཟླ་འདིའི་ཚེས་༡༣ དགོང་མོའི་ཆུ་ཚོད་༡༠ ཙམ་ལ་རྒྱ་གར་ལྷོ་ཕྱོགས་མོན་གྷོ་ཌི་གཞིས་ཆགས་ཀྱི་གྲོང་སྡེ་༡ པོའི་བརྒྱ་དཔོན་རང་ཤི་བརྒྱབ་ཡོད་པའི་གནས་ཚུལ་བྱུང་ཡོད་ནའང་། ད་ལྟའི་ཆར་དོན་རྐྱེན་གང་ཡིན་གསལ་པོ་མེད་པ་རེད།

དྷ་སའི་ཉེ་འགྲམ་གྱི་བོད་པའི་གཞིས་ཆགས་བཀྲ་ཤིས་ལྗོངས་ཀྱི་བོད་མི་རྒྱ་གར་གྱི་འོས་འཕེན་ལག་ཁྱེར་ཡོད་པ་རྣམས་ལ། རྒྱ་གར་ས་གནས་གྲོས་ཚོགས་ཀྱི་འོས་བསྡུ་ལ་འོས་འཕེན་པར་བཀག་བསྡོམས་བྱས་འདུག

ཟླ་འདིའི་ཚེས་༧ ནས་ཉིན་གསུམ་རིང་ཆུ་སྒང་དབུས་རྒྱུན་ཚོགས་འདུ་ཐེངས་༦ པ་དེ་ལྡི་ལི་དབུས་ལས་ཁུངས་སུ་འཚོགས་ཡོད་པ་རེད།

ཟླ་འདིའི་ཚེས་༢ ཉིན་དྷ་སའི་ཉེ་འགྲམ་དུ་ཡོད་པའི་སྙིང་སྟོབས་གླིང་བོད་ཕྲུག་དབང་པོ་སྐྱོན་ཅན་སྦྱོང་བརྡར་ཁང་གི་འགན་འཛིན་ངག་དབང་ལྷ་མོས། སྙིང་སྟོབས་གླིང་བཙུགས་ནས་ལོ་༡༥ འཁོར་བའི་དུས་དྲན་དང་སྦྲགས། ཉེ་འཁོར་གྱི་རྒྱ་གར་ཡུལ་མི་རྣམས་ལ་ཉལ་ཆས་ཀམ་པ་ལི་སྦྱིན་གཏོང་གི་མཛད་སྒོ་ཞིག་འཚོགས་ཡོད་པ་རེད།

ཟླ་འདིའི་ཚེས་ ༢༦ ནས་ཉིན་བརྒྱད་རིང་ཤེས་རིག་ལས་ཁུངས་ཀྱིས་གོ་སྒྲིག་འོག དྷ་ཤོད་བོད་ཁྱིམ་ཚོགས་ཁང་ནང་རྒྱ་བལ་གཉིས་ཀྱི་སློབ་གྲྭ་ཁག་༣༡ གི་འཛིན་རིམ་བཅུ་པའི་སློབ་ཕྲུག་གྲངས་༢༩༩ ལ་འགོ་ཁྲིད་ནུས་པ་སྐྱེད་སྲིང་གནང་ཕྱོགས་དང་འབྲེལ་བའི་ཟབ་སྦྱོང་ཐེངས་གསུམ་པ་དེ་འཚོག་བཞིན་ཡོད་པ་རེད།