རྒྱལ་སྤྱི།

ཨ་རིའི་སྲིད་འཛིན་བྷ་ཌན་དང་རྒྱ་ནག་གི་འགོ་ཁྲིད་ཞི་ཅིན་ཕིང་གཉིས་ཀྱིས་ཁ་པར་བརྒྱུད་དེ་གྲོས་མོལ་གཉིས་པ་བྱས་པའི་ནང་། “ཨ་རི་དང་རྒྱ་ནག་གཉིས་ཀྱི་འགྲན་རྩོད་དེ་འཁྲུག་རྩོད་ལ་འགྱུར་དུ་འཇུག་མི་ཉན་པའི་”འགན་འཁྲིའི་སྐོར་གྲོས་མོལ་བྱས་ཡོད་འདུག

ཧོང་ཀོང་གི་ཉེན་རྟོག་པས་༡༩༨༩ ལོའི་སྡེབ་གསོད་ཆེན་མོ་(Tiananmen Massacre) རྗེས་དྲན་གྱི་ལས་འགུལ་གོ་སྒྲིག་ཞུ་མཁན་རྣམས་འཛིན་བཟུང་བྱས་ནས་ཉིན་གཅིག་ཕྱིན་པའི་རྗེས། ལས་འགུལ་དེ་དང་འབྲེལ་བའི་འགྲེམ་སྟོན་ཁང་ཡང་གཏོར་བཅོམ་བཏང་ཡོད་འདུག 

ཨབ་གྷ་ནི་སེ་ཐན་ནང་ནས་ཨ་རི་དང་མཐུན་ཕྱོགས་རྒྱལ་ཁབ་རྣམས་ཀྱི་དམག་ཤུགས་ཕྱིར་འཐེན་བྱས་ཟིན་པ་དང་བསྟུན། རྒྱ་ནག་གིས་ཁུལ་དེར་དབང་ཤུགས་རྒྱ་སྐྱེད་གཏོང་ཐབས་ཀྱི་ལས་དོན་ཁོངས་སུ་ཨབ་གྷན་ལ་ཟས་རིགས་དང་ཏོག་དབྱིབས་སྔོན་འགོག་སྨན་ཁབ་སོགས་ཀྱི་རོགས་སྐྱོར་བྱེད་འཆར་འདུག 

ཧྥི་ལི་ཕིན་གྱི་མཚོ་དམག་དམག་དཔོན་ཟུར་པ་རོ་མལ-ཇོའུ་ཌི་(Rommel Jude) ཡིས། རྒྱ་ནག་གི་དབང་ཤུགས་རྒྱ་སྐྱེད་ལ་གདོང་ལེན་བྱེད་ཆེད། ཤར་ཨེ་ཤི་ཡའི་གླིང་ཕྲན་རྒྱལ་ཁབ་ཉི་ཧོང་དང་། ཧྥི་ལི་ཕིན། ཐའེ་ཝན་གསུམ་པོས་ངེས་པར་དུ་མཉམ་འབྲེལ་དང་རྡོག་རྩ་ཆིག་སྒྲིལ་བྱེད་དགོས་ཞེས་བརྗོད་ཡོད་འདུག 

 ཕྱི་ལོ་༢༠༡༥ ལོར་ཧྤ་རན་སིར་འཇིགས་སྐུལ་རིང་ལུགས་པས་ས་ཚིགས་མང་པོར་དྲག་རྒོལ་བྱས་པའི་གནད་དོན་དང་འབྲེལ་ནས། ལོ་གཅིག་རིང་གནད་དོན་དེའི་ཐོག་ཁྲིམས་ཞིབ་ཀྱི་བརྒྱུད་རིམ་འགོ་བཙུགས་པ་དང་། ལས་དོན་དེའི་ནང་མི་མཉམ་ཞུགས་བྱེད་མཁན་གྱི་ཁ་གྲངས་དང་བདེ་འཇགས་ཀྱི་ཚད་གཞི་སོགས་ལ་བརྟེན་ནས་གཞི་རྒྱ་ཆེ་བའི་ཁྲིམས་ཞིབ་དེ་འདྲ་ཞིག་ནི་ད་བར་བྱུང་མྱོང་མེད་པ་ཡིན་སྐོར་འདུག 

ཧོང་ཀོང་ནང་རྒྱ་ནག་གཞུང་གིས་བཙན་དབང་ཐོག་ནས་ལག་བསྟར་བྱས་པའི་རྒྱལ་ཁབ་ཀྱི་བདེ་འཇགས་ཁྲིམས་འོག་ཏུ། སླར་ཡང་མང་གཙོའི་ལས་འགུལ་གྱི་ཚོགས་པ་གལ་ཆེན་ཞིག་གི་ཚོགས་མི་བཞི་འཛིན་བཟུང་བྱས་ཡོད་པ་དང་། ཧོང་ཀོང་གཞུང་གིས་ཁྲིམས་དེ་བེད་སྤྱོད་ལོག་པ་བྱས་ནས་མང་གཙོ་ལས་འགུལ་བ་ཚོར་བཙན་གནོན་བྱེད་ཀྱི་ཡོད་པའི་ཉེས་འཛུགས་ལ་ཁས་ལེན་ད་དུང་བྱེད་ཀྱི་མེད་པ་རེད།

ད་ལྟའི་ཆར་འབར་མའི་ཁྲིམས་མཐུན་སྲིད་གཞུང་དེ་དམག་གི་སྒྲིག་འཛུགས་ཀྱིས་བཙན་བཟུང་བྱས་ཡོད་པས། དེ་སྔོན་ལྕམ་ཨང་སན་སུ་ཅིའི་སྲིད་གཞུང་གིས་འཛིན་བཟུང་བྱས་པའི་ནང་པའི་མི་རིགས་རིང་ལུགས་པ་གྲྭ་པ་ཝི་རཱ་ཐུ་བཙོན་གྲོལ་བཏང་འདུག འབར་མའི་ནང་ཁ་ཆེར་དྲག་རྒོལ་གྱི་གནད་དོན་བརྒྱུད་སྐུལ་སློང་མཁན་གྲས་སུ་ཁོང་ནི་སྐད་གྲགས་ཆེ་ཤོས་ཤིག་ཏུ་ངོས་འཛིན་བྱེད་བཞིན་པ་རེད།

ཡུ་རོབ་གྲོས་ཚོགས་ཀྱི་སྲིད་འཛིན་གཞོན་པ་ཧྥ་བྷོ-མཱ་ས་མོ་(Fabio Massimo) ཡིས་“གལ་སྲིད་ཡུ་རོབ་ཀྱིས་ཞི་བདེ་རྒྱ་མཚོའི་ཁུལ་དུ་ཆབ་དཔལ་རིག་གསུམ་གྱི་དབང་ཤུགས་ཆེ་རུ་གཏོང་འདོད་ན། ལྟ་བ་དང་རིན་ཐང་གཅིག་མཚུངས་ལྡན་པའི་མཐུན་གྲོགས་རྒྱལ་ཁབ་ཉི་ཧོང་དང་། ལྷོ་ཀོ་རི་ཡ། ཐའེ་ཝན་ལྟ་བུར་འབྲེལ་ལམ་ཟབ་ཏུ་མི་གཏོང་ཐབས་མེད་ཡིན་”ཞེས་བརྗོད་ཡོད་འདུག 

ཉི་ཧོང་གི་སྲིད་བློན་ལས་གནས་སུ་ཞུགས་ནས་ལོ་གཅིག་ལྷག་འཁོར་གྱི་ཡོད་པའི་ཡཱོ་ཤི་ཧི་ཌེ་སུ་གྷ་ལ་མང་ཚོགས་ཁྲོད་རྒྱབ་སྐྱོར་ཤུགས་ཆུང་དུ་ཕྱིན་ཡོད་པས། གཞུང་འཛིན་སྲིད་དོན་ཚོགས་པའི་འགོ་ཁྲིད་ཀྱི་འོས་འགྲན་ནང་ཞུགས་རྒྱུ་མིན་པས། སྲིད་བློན་ལས་གནས་ནས་དགོངས་པ་ཞུ་རྒྱུ་ཡིན་པ་རེད།