གསར་འགྱུར་གནད་བསྡུས་ཁག

རྒྱ་གར་གྱི་ཕྱི་བསྐྱོད་ལག་འཁྱེར་(Passport) དང་། འོས་ཤོག་ལག་འཁྱེར་ག་རེ་བླངས་ན་ཡང་སྐྱབས་བཅོལ་ལག་དེབ་དང་དེབ་ལྗང་ཁུ། ཕྱི་བསྐྱོད་ལག་འཁྱེར་བཅས་མ་བསྡུས་ན་ཁྲིམས་འགལ་རེད་ཅེས་སྲིད་སྐྱོང་གིས་གསུངས་སོང་།

ཟླ་འདིའི་ཚེས་༢༧ ཉིན་གདན་ས་དགའ་ལྡན་དགོན་པར་འཚོགས་པའི་རི་བོ་དགེ་ལྡན་པའི་དགེ་ལུགས་རྒྱུགས་སྤྲོད་ཆེན་མོའི་མཇུག་བསྡོམས་དགའ་ལྡན་རྣམ་པར་རྒྱལ་བའི་གླིང་གི་བླ་སྤྱི་རུ་འཚོགས་ཡོད་པ་རེད།

བལ་ཡུལ་ཉེན་རྟོག་རུ་ཁག་དང་དབང་པོ་སྐྱོན་ཅན་གྱི་སྡེ་ཚན་གཉིས་ཀྱིས་བོད་མི་ཞིག་ལ་ས་ཡོམ་སྐབས་སྤྱི་ཚོགས་ཞབས་ཕྱི་ཞུས་པའི་བྱ་དགའ་ཕུལ་འདུག

ཟླ་འདིའི་ཚེས་ ༢༦ ཉིན་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གཉིས་པའི་ལས་ཉིན་དྲུག་པའི་སྟེང་། ཤེས་རིག་དྲུང་ཆེ་འབུམ་རམས་པ་ངག་དབང་རབ་རྒྱལ་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པར་འདེམས་ཐོན་བྱུང་ཡོད་པ་རེད།

ཟླ་འདིའི་ཕྱི་ཚེས་༢༤ ཉིན་ནས་འགོ་འཛུགས་ཀྱིས་འདི་ལོའི་སའི་གོ་ལའི་མཛངས་མའི་འགྲན་སྡུར་ཧྥི་ལི་པིན་གྱི་རྒྱལ་སར་འཚོགས་བཞིན་ཡོད་པ་དང་། དེར་འཛམ་གླིང་གི་རྒྱལ་ཁབ་ཁག་ཅིག་གི་བུད་མེད་༣༩ འཛུལ་ཞུགས་བྱས་ཡོད་པའི་ནང། བོད་ཀྱི་མཛངས་མ་བསྟན་འཛིན་སང་ཉི་ཡོད་པ་རེད།

ལས་འགུལ་བ་དང་མཁས་པ་ཁག་ཅིག་གི་བགྲོ་གླེང་ཐོག བོད་ཀྱི་གཙང་པོ་༡༠ ལ་བརྟེན་ནས་འཚོ་བ་སྐྱེལ་མཁན་གྱི་ཨེ་ཤི་ཡའི་རྒྱལ་ཁབ་ཁག་གིས་རྒྱ་ནག་དང་བོད་ཀྱི་གཙང་ཆུ་བེད་སྤྱོད་བྱེད་ཕྱོགས་ཐད། ཆིངས་ཡིག་འཇོག་དགོས་སྐོར་གྱི་བསམ་ཚུལ་བཏོན་འདུག

རྒྱ་གར་རྒྱལ་ས་ལྡི་ལིའི་མཐོ་རིམས་ཁྲིམས་ཁང་གིས། རྒྱ་གར་མི་སེར་ཐོབ་ཐང་གི་ཁྲིམས་ཡིག་ལྟར། ཆ་རྐྱེན་ཚང་པའི་བོད་མི་ཚང་མར་མི་སེར་ལག་ཁྱེར་ཐོབ་ཀྱི་ཡོད་པའི་ཁྲིམས་ཐག་བཅད་འདུག