༧གོང་ས་མཆོག་ལ་ནོ་སྦེལ་ཞི་བདེའི་གཟེངས་རྟགས་ཕུལ་ནས་ལོ་༣༦ འཁོར་བའི་དུས་ཆེན།

རྒྱལ་སྤྱིའི་འགྲོ་བ་མིའི་ཐོབ་ཐང་ཉིན་མོ་ཐེངས་༧༧ པ་དང་། ༧གོང་ས་མཆོག་ལ་ནོ་སྦེལ་ཞི་བདེའི་གཟེངས་རྟགས་ཕུལ་ནས་མི་ལོ་༣༦ འཁོར་བའི་ཉིན་མོ་དང་བསྟུན་ནས། རྒྱལ་ཁབ་འདྲ་མིན་ནས་ཕེབས་པའི་བོད་དོན་རྒྱབ་སྐྱོར་བ་དང་། གྲོས་ཚོགས་འཐུས་མི། གསར་འགོད་པ་སོགས་སྐུ་མགྲོན་མང་པོ་ཞིག་དེ་རིང་ཐེག་ཆེན་ཆོས་གླིང་གཙུག་ལག་ཁང་དུ་བོད་མིའི་སྒྲིག་འཛུགས་ཀྱི་གཞུང་འབྲེལ་མཛད་སྒོའི་ཐོག་ཏུ་མཉམ་ཞུགས་གནང་སོང་།

ཕྱི་ལོ་༢༠༢༥ ཟླ་བ་༡༢ ཚེས་༡༠ ཉིན་རྒྱལ་སྤྱིའི་འགྲོ་བ་མིའི་ཐོབ་ཐང་ཉིན་མོ་ཐེངས་༧༧ དང་། ༧གོང་ས་མཆོག་ལ་ནོ་སྦེལ་ཞི་བདེ་གཟེངས་རྟགས་ཕུལ་ནས་མི་ལོ་༣༦ འཁོར་བ་དང་སྟབས་བསྟུན་ནས། ཧྥེ་ཇི་གླིང་ཕྲན་གྱི་གྲོས་ཚོགས་འཐུས་མི་ (Virendra Lal) དང་། ནིའུ་ཛི་ལན་ཌའི་གྲོས་ཚོགས་འཐུས་མི་ (Greg Flemming) ཧྥ་རན་སིའི་གྲོས་ཚོགས་འཐུས་མི་ (Samantha Cazebonel) ཆི་ལིའི་སྐུ་མགྲོན་ (Vlado Mirosecvic) ཨོ་སི་ཊོ་ལི་ཡའི་གྲོས་ཚོགས་འཐུས་མི་ (Ms. Barbara Pocock) ཅེག་གྲོས་ཚོགས་ཀྱི་ཚོགས་གཞོན་ (Jitka Seitlová) བཅས་ནས་དེ་རིང་གཞུང་འབྲེལ་མཛད་སྒོའི་སྐབས་སུ་གསུང་བཤད་གནང་སོང་ལ། གཞན་མཛད་སྒོའི་ཐོག་ཏུ་ཨོ་སི་ཊོ་ལི་ཡ་དང་། ནིའུ་ཛི་ལན་ཌ། ཧྥེ་ཇི་གླིང་ཕྲན། ཧྥ་རན་སི། ཆི་ལི། ཅེག་སྤྱི་མཐུན་རྒྱལ་ཁབ་བཅས་ནས་གྲོས་ཚོགས་འཐུས་མི་དང་བོད་དོན་རྒྱབ་སྐྱོར་བ། གསར་འགོད་པ་སོགས་སྐུ་མགྲོན་མང་པོ་ཞིག་ཕེབས་གནང་འདུག
དེ་རིང་བོད་མིའི་སྒྲིག་འཛུགས་བཀའ་ཤག་གི་གསུང་འཕྲིན་ནང་། སྤྱི་ནོར་༧གོང་ས་སྐྱབས་མགོན་༧རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་ལ་ཕྱི་ལོ་༡༩༨༩ ལོར་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་ནས་མི་ལོ་༣༦ འཁོར་བའི་དུས་ཆེན་དང་། རྒྱལ་སྤྱིའི་འགྲོ་བ་མིའི་ཐོབ་ཐང་ཉིན་མོ། ༧གོང་ས་༧སྐྱབས་མགོན་ཆེན་པོ་མཆོག་གི་༧སྐུའི་གྱ་སྟོན་དང་བསྟུན་པའི་རྒྱལ་སྤྱིའི་བྱམས་བརྩེའི་ལོ་འཁོར་བཅས་དུས་ཆེན་ཁྱད་པར་ཅན་གསུམ་འཛོམས་ཡིན་པ་དང་།
དེ་བཞིན་ཕྱི་ལོ་༡༩༨༩ ཟླ་༡༢ ཚེས་༡༠ ཉིན་ནོར་ཝེ་རྒྱལ་ས་ཨོ་སི་ལོ་ (Oslo) རུ་༧གོང་ས་མཆོག་ལ་འཛམ་གླིང་ནང་སྐད་གྲགས་ཆེ་བའི་ནོ་སྦེལ་ཞི་བདེའི་གཟེངས་རྟགས་ཕུལ་ཡོད་ཅིང་། ནོ་སྦེལ་ཞི་བདེ་ཚོགས་ཆུང་གིས་སྙན་གྲགས་ཅན་གྱི་གཟེངས་རྟགས་འདི་འབུལ་རྒྱུའི་གསལ་བསྒྲགས་ནང་། ༧གོང་ས་མཆོག་ཕྱི་ལོ་༡༩༥༩ ལོར་རྒྱ་གར་དུ་བཙན་བྱོལ་ལ་ཕེབས་པ་ནས་བཟུང་། རྒྱ་ནག་གིས་བོད་བཙན་བཟུང་བྱས་པ་དེ་ལ་འཚེ་མེད་ཞི་བའི་ལམ་ནས་ངོ་རྒོལ་གྱི་སྣེ་ཁྲིད་གནང་ཡོད་ཅེས་བཀོད་འདུག ཡང་ཚོགས་ཆུང་གིས་ནན་བཤད་གནང་དོན། ཁོང་གིས་བོད་དོན་འཐབ་རྩོད་ཁྲོད་དྲག་པོའི་ལམ་ལ་མཐའ་གཅིག་ཏུ་ངོ་རྒོལ་གནང་ཡོད་ཅིང་། དེའི་ཚབ་ཏུ་ཁོང་གིས་མི་མང་གི་ལོ་རྒྱུས་དང་རིག་གཞུང་གི་ཤུལ་བཞག་སྲུང་སྐྱོབ་སླད། བཟོད་བསྲན་དང་ཕན་ཚུན་གུས་བརྩི་ལ་གཞི་བཅོལ་བའི་ཞི་བའི་ཐབས་ལམ་ཁོ་ན་གཙོ་འཛིན་གནང་གི་ཡོད་ཅེས་བརྗོད་འདུག སྐབས་དེ་དུས་མཛད་སྒོའི་ཐོག་ཏུ་༧གོང་ས་མཆོག་གིས་གསུང་བཤད་གནང་བའི་ནང་། “གཟེངས་བསྟོད་འདིས་བདེན་པ་དང་། སྙིང་སྟོབས། སེམས་ཤུགས་བཅས་ལག་ཆར་བཟུང་སྟེ་བོད་ཡུལ་བཅིངས་བཀྲོལ་གཏོང་ཐུབ་རྒྱུའི་ང་ཚོའི་ཡིད་ཆེས་ཡང་བསྐྱར་སྲ་བརྟན་དུ་ཕྱིན་ཡོད། འདས་པའི་ལོ་ངོ་བཞི་བཅུ་ཐམ་པའི་བཙན་དབང་རིང་ང་ཚོའི་མི་དམངས་ནས་དཀའ་སྡུག་ཇི་ལྟར་མྱངས་པ་རྣམས་ལོ་རྒྱུས་ཡིག་ཆའི་ཐོག་ཞིབ་གསལ་འཁོད་ཡོད། ང་ཚོའི་འཐབ་རྩོད་ནི་དུས་ཡུན་རིང་པོའི་འཐབ་རྩོད་ཅིག་རེད། ང་ཚོའི་རྩ་དོན་དེ་བཞིན་དྲང་བདེན་ཡིན་པ་ང་ཚོས་ཤེས་ཀྱི་ཡོད་” ཅེས་གསུངས་ཡོད་འདུག
དེ་བཞིན་དེ་རིང་བོད་མིའི་སྤྱི་འཐུས་ལྷན་ཚོགས་ཀྱི་གསུང་བཤད་ནང་། ༧གོང་ས་མཆོག་གིས་ལྟ་བ་རྟེན་འབྱུང་དང་། སྤྱོད་པ་འཚེ་བ་མེད་པ་ཉམས་སུ་བཞེས་ཏེ་འཇིག་རྟེན་ཁྱོན་ཡོངས་ལ་འཚེ་མེད་ཞི་བའི་ལམ་སྟོན་མཛད་པའི་འདྲེན་པ་བླ་ན་མེད་པ་ཞིག་ཡིན་པ་མ་ཟད། བོད་དོན་འཚེ་མེད་ཞི་བའི་ལམ་འབའ་ཞིག་ཏུ་བརྟེན་ནས་གྲོས་མོལ་བརྒྱུད་དཀའ་ངལ་སེལ་བའི་ཐབས་ལམ་མཛད་ཅིང་། འཇིག་རྟེན་ཁྱོན་ཡོངས་ཀྱི་རྙོག་འཛིང་མཐའ་དག་འཚེ་མེད་ཞི་བའི་ལམ་ནས་སེལ་ཐབས་བྱེད་དགོས་པའི་ལམ་སྟོན་དང་ཉམས་ལེན་མཛད་པོར་ངོས་འཛིན་ཞུས་ཏེ། ཧ་ཅང་སྙན་གྲགས་ཆེ་བའི་ནོ་སྦེལ་ཞི་བདེའི་གཟེངས་རྟགས་འདི་བཞིན་ཕྱི་ལོ་༡༩༠༡ ནས་བཟུང་ལོ་ལྟར་འཛམ་གླིང་ནང་ཞི་བདེ་དང་། མང་གཙོ། འགྲོ་བ་མིའི་ཐོབ་ཐང་། རྒྱལ་ཁབ་ཕན་ཚུན་དབར་མཛའ་མཐུན་གོང་སྤེལ་གཏོང་མཁན་སོགས་ལ་འབུལ་བཞིན་ཡོད་པ་ལྟར། སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ལ་ཕྱི་ལོ་༡༩༨༩ ཟླ་༡༢ ཚེས་༡༠ ཉིན་ནོར་ཝེ་རྒྱལ་ས་ཨོ་སི་ལོ་ (Oslo) རུ་༧གོང་ས་མཆོག་ལ་འཛམ་གླིང་ནང་སྐད་གྲགས་ཆེ་བའི་ནོར་བྷེལ་ཞི་བདེ་གཟེངས་རྟགས་ཕུལ་ཡོད་ཅེས་བཀོད་འདུག
དེ་རིང་མཛད་སྒོ་སྐབས་སུ་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་དང་། རྡ་སའི་ཉེ་འཁོར་གནས་བཞུགས་སེར་སྐྱ་མི་མང་མང་པོ་ཕེབས་ནས་བོད་ཀྱི་ཟློས་གར་ཚོགས་པ་དང་། རྡ་སྟེང་བོད་ཁྱིམ། གྷོ་པལ་པུར་བོད་ཁྱིམ། ཡོངས་གླིང་སློབ་གྲྭ་སོགས་ཀྱིས་གཞས་སྣ་འཁྲབ་སྟོན་གཟིགས་འབུལ་ཞུས་སོང་།།
གསར་འགོད་པ། བསོད་ནམས་ཕུན་ཚོགས།