ཉེ་ཆར་འགྲེམས་སྤེལ་གནང་བའི་དཔེ་དེབ་ཁག་ཅིག
༡ (ཆོས་འབྱུང་མཁས་པའི་དགའ་སྟོན་) ཞེས་པའི་དཔེ་དེབ་འདི་ནི་དཔའ་བོ་གཙུག་ལག་ཕྲེང་བས་མཛད་ཅིང་། རྩོམ་པ་པོས་སྔོན་ཡོད་ཆོས་འབྱུང་རྣམས་སུ་བྲིས་པའི་གཏམ་རྒྱུད་དང་ལོ་རྒྱུས་སྐོར་རྡོ་རིང་དངོས་སུ་མཇལ་ནས་ཇི་མ་ཇི་བཞིན་བཤུས་པ་དང་། བསམ་ཡས་སུ་ཕེབས་ནས་དེར་ཡོད་དཔེ་མཛོད་རྙིང་པའི་གྲས་ནས་བྱུང་བའི་བཀའ་གཙིགས་རྣམས་དངོས་སུ་མཇལ་ནས་དཔྱད་གཞིར་མཛད་པའི་ཆོས་འབྱུང་ལོ་རྒྱུས་ཀྱི་དཔེ་དེབ་གྲགས་ཆེན་ཞིག་རེད་འདུག དེབ་འདིའི་སྟོད་ཆ་དང་སྨད་ཆ་གཉིས་ཀར་ཤོག་གྲངས་གཅིག་སྟོང་ཉིས་བརྒྱ་ལྷག་དང་བོད་ཀྱི་དཔེ་མཛོད་ཁང་ནས་འགྲེམས་སྤེལ་གནང་འདུག
༢ (དམ་ཆོས་ཡིད་བཞིན་གྱི་ནོར་བུ་ཐར་པ་རིན་པོ་ཆེའི་རྒྱན་) ཞེས་པའི་དཔེ་དེབ་འདི་ནི་མཉམ་མེད་དྭགས་པོ་ལྷ་རྗེས་མཛད་ཅིང་། དཔེ་དེབ་འདི་ནི་ཐེག་པ་ཆེན་པོའི་གཞི་ལམ་འབྲས་གསུམ་གྱི་གནད་མ་ལུས་པ་འདུས་པའི་གཞུང་མཆོག་ཅིག་ཡིན་པར་མ་ཟད། བྱང་ཆུབ་ལམ་སྒྲོན་གྱི་དོན་འགྲེལ་སྔ་ཤོས་ཀྱི་དཔེ་དེབ་ཅིག་ཀྱང་རེད་འདུག དེབ་འདི་ལ་ཤོག་གྲངས་ཉིས་བརྒྱ་བདུན་ཅུ་ཡོད་པ་དང་བོད་ཀྱི་དཔེ་མཛོད་ཁང་ནས་འགྲེམས་སྤེལ་གནང་འདུག
༣ (གཏམ་རྒྱུད་གསེར་གྱི་ཐང་མ་) ཞེས་པའི་དཔེ་དེབ་འདི་ནི་མཁས་དབང་དགེ་འདུན་ཆོས་འཕེལ་གྱིས་མཛད་ཅིང་། འབུམ་རམས་པ་བློ་བཟང་རྡོ་རྗེ་རབ་གླེང་གིས་ཞུ་སྒྲིག་གནང་འདུག ཞུ་སྒྲིག་པས་མ་དཔེ་དང་གཏུགས་ཏེ་ཞུས་དག་ལེགས་པར་བགྱིས་པ་མ་ཟད། དགེ་ཆོས་ཀྱི་ལུང་འདྲེན་གནང་བ་ཚང་མར་བཀའ་བསྟན་བཅོས་སོགས་ཀྱི་རྒྱབ་རྟེན་བཀོད་དེ་དཔར་སྐྲུན་གསར་པ་ཀུན་ལ་ཤིན་ཏུ་རྔོ་ཐོགས་པ་ཞིག་བྱུང་ཡོད་འདུག དཔེ་དེབ་འདིའི་སྟོད་ཆ་དང་སྨད་ཆ་གཉིས་ལ་ཤོག་གྲངས་དྲུག་བརྒྱ་དགུ་བཅུ་གོ་གཅིག་དང་བོད་ཀྱི་དཔེ་མཛོད་ཁང་ནས་འགྲེམས་སྤེལ་གནང་འདུག
༤ (བོད་ཡིག་གི་དེབ་ཐེར་ཁག་ཏུ་གསལ་བའི་གནའ་བོའི་མོན་ཡུལ་གྱི་ལོ་རྒྱུས་དང་། བོད་མོན་འབྲུག་གསུམ་གྱི་འབྲེལ་བར་དཔྱད་པ་) ཞེས་པའི་དཔེ་དེབ་འདི་ནི་ཨྰཙྰརྱ་བསྟན་འཛིན་བསྟན་སྐྱོང་དང་བློ་བཟང་བསྟན་པ་གཉིས་ཀྱིས་བསྒྱུར་ཞིང་། དེབ་འདིའི་ནང་མོན་ཡུལ་གྱི་སྤྱི་ཚོགས་དང་ཆབ་སྲིད་ཀྱི་ལོ་རྒྱུས། མོན་ཡུལ་བོད་ཀྱི་མངའ་ཁོངས་སུ་བསྡུ་ཚུལ་དང་མོན་ཞེས་པའི་ཐ་སྙད་སྒྲུབ་ཚུལ་དང་ཐ་སྙད་དེ་རྒྱ་ཆེ་ས་ནས་བཀོལ་སྤྱོད་བྱེད་ཚུལ་སོགས་གསལ་སྟོན་བྱས་ཡོད་འདུག དེབ་འདི་ལ་ཤོག་གྲངས་བཞི་བརྒྱ་བཅུ་བཞི་དང་བོད་ཀྱི་དཔེ་མཛོད་ཁང་ནས་འགྲེམས་སྤེལ་གནང་འདུག
༥(དྲན་ཡུལ་གྱི་བོད་དང་ཡུལ་གྱར་བའི་བརྗེད་ཐོ་) ཞེས་པའི་དཔེ་དེབ་འདི་ནི་་གླང་མཐོང་བསྟན་འཛིན་འཕྲིན་ལས་ཀྱིས་བརྩམས་ཤིང་། རྩོམ་པ་པོས་ལོ་རྒྱུས་དེབ་འདིའི་ནང་རང་ཉིད་ཕྲུ་གུ་མ་འབྱར་ཡིན་དུས་ནས་ཕ་མ་གཉིས་ཀ་གྲོངས་པ་དང་ཁྱིམ་མི་ནང་ཁུལ་མ་མཐུན་པའི་དབང་གིས་ཁྱིམ་དང་ཁ་བྲལ་བ། རྗེས་སུ་སྤྲུལ་སྐུར་ངོས་འཛིན་དང་རྒྱ་གར་ལ་ཕེབས་ནས་ཁྱིམ་ཚང་བཟུང་བ་སོགས་བཀོད་ཡོད་འདུག དཔེ་དེབ་འདི་ལ་ཤོག་གྲངས་སུམ་བརྒྱ་བཞི་བཅུ་ཞེ་བཞི་དང་བོད་ཀྱི་དཔེ་མཛོད་ཁང་ནས་འགྲེམས་སྤེལ་གནང་འདུག
༦ (དགེ་བཤེས་བྱང་ཆུབ་ཚུལ་ཁྲིམས་ཀྱི་མཛད་རྣམ་སྔོན་བྱུང་དད་པའི་གསོས་སུ་དྲན་པ་) ཞེས་པའི་དཔེ་དེབ་འདི་ནི་རྰ་སྟོད་དགེ་བཤེས་ཟླ་བ་རྒྱལ་མཚན་གྱིས་བརྩམས་ཤིང་། བརྗོད་བྱ་ནི་དགེ་བཤེས་བྱང་ཆུབ་ཚུལ་ཁྲིམས་ཀྱི་མཛད་རྣམ་དང་དེབ་འདི་ལ་ཤོག་གྲངས་བརྒྱ་དང་བརྒྱད་ཅུ་གྱ་བརྒྱད་ཡོད་པ་མ་ཟད། བོད་ཀྱི་དཔེ་མཛོད་ཁང་ནས་འགྲེམས་སྤེལ་གནང་འདུག
༧ (ཐོ་རངས་སྐར་ཆེན་) ཞེས་པའི་སྒྲུང་རྩོམ་དཔེ་དེབ་འདི་ནི་ངག་དབང་ཕུན་ཚོགས་ཀྱིས་བརྩམས་ཤིང་། རྩོམ་པ་པོས་སྒྲུང་གི་ལམ་ནས་སྲོལ་རྒྱུན་གྱི་བྱེད་སྒོ་གྱི་ན་བར་ཐེར་འདོན། བོད་མིའི་ལས་དབང་དང་བརྩེ་དུང་གི་མྱོང་བ། ཕ་ཡུལ་ལ་གཅེས་སེམས། ཤེས་ཡོན་གལ་ཆེ་ཚུལ་སོགས་གསལ་སྟོན་བྱས་ཡོད་འདུག དཔེ་དེབ་འདི་ལ་ཤོག་གྲངས་ཉིས་བརྒྱ་དགུ་བཅུ་གོ་གསུམ་དང་བོད་ཀྱི་དཔེ་མཛོད་ཁང་ནས་འགྲེམས་སྤེལ་གནང་འདུག
༨ (པཅ་མ་རིའི་གཏན་འཇགས་སློབ་གྲྭ་དང། ཤེས་ཡོན་དང་ལག་ཤེས་ཟུང་སྦྲེལ་སློབ་གཉེར་ཁང་གི་ལོ་རྒྱུས་) ཞེས་པའི་དཔེ་དེབ་འདི་ནི་པཅ་མ་རི་བརྟན་བཞུགས་གོ་སྒྲིག་ཚོགས་ཆུང་གིས་བརྩམས་ཤིང་། བརྗོད་བྱ་ནི་སྒོ་བརྒྱབ་ནས་ལོ་ངོ་ལྔ་བཅུ་ལྷག་ཕྱིན་པའི་པཅ་མ་རིའི་གཏན་སློབ་དང་། ཤེས་ཡོན་དང་ལག་ཤེས་ཟུང་སྦྲེལ་སློབ་གཉེར་ཁང་གི་ལོ་རྒྱུས་ཡིན་འདུག དེབ་འདི་ལ་ཤོག་གྲངས་བརྒྱ་དང་སུམ་ཅུ་དང་བོད་ཀྱི་དཔེ་མཛོད་ཁང་ནས་འགྲེམས་སྤེལ་གནང་འདུག
༩ (ཧི་མ་ལ་ཡའི་གཡེར་དྲིལ་) ཞེས་པའི་དཔེ་དེབ་འདི་ནི་རེ་བའི་སྐྱ་རེངས་ཀྱིས་བརྩམས་ཤིང་། རྩོམ་པ་པོས་ལོ་མང་རིང་རྒྱུན་བསྐྱངས་ཏེ་བརྩམས་པའི་སྙན་རྩོམ་གྱི་དེབ་ཅིག་ཡིན་འདུག དེབ་འདི་ལ་ཤོག་གྲངས་བརྒྱ་དང་ལྔ་བཅུ་ང་དྲུག་དང་བོད་ཀྱི་དཔེ་མཛོད་ཁང་ནས་འགྲེམས་སྤེལ་གནང་འདུག
༡༠ (བདེ་སྐྱིད་ཀྱི་ལམ་ཡིག་) ཅེས་པའི་དཔེ་དེབ་འདི་ནི་དགའ་ཤར་དགེ་བཤེས་ལྷ་རམས་པ་བློ་བཟང་ཕུན་ཚོགས་ཀྱིས་བརྩམས་ཤིང་། རྩོམ་པ་པོས་ནང་པའི་སེམས་ཁམས་རིག་པའི་གཞུང་དུ་གསལ་བའི་སེམས་ངལ་ལེགས་བཅོས་ཀྱི་ཐབས་ལམ་མང་པོ་ཞིག་རྩལ་འདོན་གནང་ཞིང་། དེ་ལ་ཡིད་ཆེས་པའི་ལུང་དང་། སྒྲུབ་བྱེད་ཀྱི་རིག་པ། གོ་སླ་བའི་དཔེ་དགོད་བྲོ་བའི་གཏམ་རྒྱུད་སོགས་ཐབས་རྩལ་སྣ་མང་གིས་བརྒྱན་པའི་བདེ་སྐྱིད་སྒྲུབ་ཐབས་ཀྱི་དེབ་གཅིག་ཡིན་འདུག དེབ་འདི་ལ་ཤོག་གྲངས་སུམ་བརྒྱ་བདུན་ཅུ་དོན་བརྒྱད་དང་བོད་ཀྱི་དཔེ་མཛོད་ཁང་ནས་འགྲེམས་སྤེལ་གནང་འདུག
