བོད་ཀྱི་དཔེ་མཛོད་ཁང་ནས་པར་སྐྲུན་བྱས་པའི་དཔེ་དེབ་ངོ་སྤྲོད།
༡༽ ༧སྐྱབས་རྗེ་གསེར་ཀོང་མཚན་ཞབས་རིན་པོ་ཆེའི་རང་རྣམ།
ཕྱག་དེབ་འདི་ནི༧གོང་ས་མཆོག་གི་སྐུའི་མཚན་ཞབས་དགའ་ལྡན་གསེར་ཀོང་རྡོ་རྗེ་འཆང་གི་ཐུགས་སྲས་རྗེ་བཙུན་ངག་དབང་བློ་བཟང་ཐུབ་བསྟན་སྟོབས་འབྱོར་དཔལ་བཟང་པོའི་རང་རྣམ་ཁ་སྐོང་འཕྲོས་དང་བཅས་པ་ཡིན་ལ། རྣམ་ཐར་འདིའི་ནང་དུ་རིན་པོ་ཆེ་མཆོག་གིས་གདན་ས་ཆེན་པོ་ཁག་ཏུ་མདོ་སྔགས་ཀྱི་གཞུང་ལ་གསན་བསམ་དང་། ༧གོང་ས་མཆོག་གི་སྐུའི་མཚན་ཉིད་ཞབས་ཞུ། དུས་ཚོད་གཉན་འཕྲང་ཅན་གྱི་སྐབས་དེར་དབུ་འོག་དཔུང་འདེགས་ཀྱི་ཞབས་ཞུ་ཇི་ལྟར་ཞུས་པའི་སྐོར། དེ་བཞིན་དུ་བོད་དང་རྒྱ་གར། ཧི་མ་ལ་ཡའི་རི་རྒྱུད་བཅས་སུ་བསྟན་འགྲོའི་བདེ་དོན་རླབས་པོ་ཆེ་རྣམས་ཉམས་པ་སླར་གསོ་དང་མི་ཉམས་གོང་འཕེལ་ཇི་ལྟར་མཛད་པའི་ཚུལ་རྣམས་ཞིབ་ཏུ་བཀོད་ཡོད་པ་དང་། དེའི་ལྷན་ཐབས་སུ་༧གོང་ས་མཆོག་གི་ཕྱག་བྲིས་ཀྱི་གསུང་འཕྲིན་དང་བཅས་པ་ཡང་བཀོད་ཡོད་འདུག
༢༽ མདོ་ཁམས་སྦྲ་སོག་འབྲི་གསུམ་གྱི་ལོ་རྒྱུས་དང་རིག་གནས་ཕྱོགས་བསྒྲིགས།
དཔེ་དེབ་འདི་ནི་དགེ་བཤེས་ཨ་ཀྲོང་རིན་ཆེན་རྒྱལ་མཚན་གྱིས་གཙོ་སྒྲིག་གནང་ཞིང་། དེབ་འདིའི་ནང་སྦྲ་སོག་འབྲི་གསུམ་གྱི་ལོ་རྒྱུས་སྤྱི་དང་། ཁྱབ་ཁོངས་སོ་སོའི་བྱུང་རབས། དགོན་སྡེ་དང་རི་ཁྲོད་ཁག་གི་ལོ་རྒྱུས། ཡུལ་ལུང་དེ་དག་གི་ཁྱད་ཆོས་དང་འཚོ་ཐབས། དམངས་ཁྲོད་རིག་གནས། སྲོལ་རྒྱུན་ཆས་གོས། ད་ལྟའི་སྲིད་འཛིན་ཁྱབ་ཁོངས་ཀྱི་གནས་བབ་སོགས་གལ་ཆེའི་རང་བཞིན་མི་ཉུང་བ་ཞིག་བྲིས་འདུག་པར་མ་ཟད། ལུང་པ་རེ་ལ་ཆ་ལུགས་རེ་ཟེར་བའི་དཔེ་ལྟར། ཡུལ་ལུང་དེ་དག་གི་གཉེན་སྒྲིག་གོམས་སྲོལ་དང་ཆང་བཤད། གླུ་དང་ཤགས། ས་བབ་ཐོན་ཁུངས། གཡང་གི་ར་བ་སྒོ་བཞིའི་སྐོར་གྱི་རྒྱུན་ཤེས་སོགས་དེང་སྐབས་ཉམས་ལ་ཉེ་བའི་རིག་གཞུང་གི་ཆ་ཤས་མི་ཉུང་བ་ཞིག་གཅེས་བཏུས་བྱས་ཏེ། ཕ་མེས་ཡང་མེས་ཚོའི་རྣམ་དཔྱོད་དང་ཉམས་མྱོང་གི་མངལ་ནས་འཁྲུངས་པའི་ཉིང་བཅུད་རྣམས་དཔེ་དེབ་སྟོད་སྨད་གཉིས་སུ་བསྒྲིགས་འདུག
༣༽སྒོམ་ཁྲིད་ཨ་མར་བཤད་པའི་ཁ་བརྡ། ཞི་གནས་དང་དྲན་པ་ཉེར་བཞག་སྒོམ་ཚུལ།
སྟོད་ཆ་དང་སྨད་ཆ་ཅན་གྱི་དཔེ་དེབ་འདི་ནི་ཚ་རུ་མ་ཐབས་མཁས་ཀྱིས་སྒོམ་གྱི་ངོ་སྤྲོད་དང་། དཔྱད་འཇོག་གི་ཁྱད་པར། སེམས་གནས་ཀྱི་རིམ་པ། ཞི་ལྷག་གི་གྲུབ་ཚད། སྒོམ་སྒྲུབ་ཀྱི་ཕན་ཡོན་སོགས་ལས་བརྩམས་ཏེ་ནང་པའི་གཞུང་དུ་ཇིི་ལྟར་གསུངས་པའི་སྒོམ་གྱི་རིམ་པ་སྟེ། ལས་དང་པོ་བ་ཞིག་ཐོག་མར་སྒོམ་ལ་ཇི་ལྟར་འཇུག་དགོས་པ་ནས་མཐར་ཞི་ལྷག་གྲུབ་ཚུལ་བར་གྱི་རིམ་པ་དེ་དག་དྲི་མ་མེད་པའི་གཞུང་ལུགས་ཀྱི་དགོངས་དོན་དང་མཐུན་པར་བྲིས་འདུག་ལ། གནས་བརྟན་སྡེ་པའི་དྲན་པ་ཉེར་བཞག་སྒོམ་ཚུལ་དང་། ཁྱབ་གདལ་ཆེ་བའི་དེང་རབས་ཀྱི་དྲན་ཉེའི་སྒོམ་ལུགས་དེ་སུ་ཞིག་གིས་གསར་གཏོད་བྱས་པ་དང་། ཚུལ་ཇི་ལྟར་དར་འཕེལ་བྱུང་བ། དེའི་ངོ་བོ་དང་ཕན་ཡོན་སོགས་ཚིགས་བཅད་ཁོ་ནའི་ལམ་ནས་ཚིག་སྦྱོར་གོ་སླ་མོར་བྲིས་འདུག
༤༽ ཆུ་སྤྲེ་ཞལ་གདམས་དང་ཤིང་ལུག་ལུང་བསྟན།
དེབ་ཆུང་འདིའི་ནང་ཆུ་སྤྲེ་ཕྱི་ལོ་༡༩༣༢ ལོར་༧གོང་ས་སྐུ་ཕྲེང་བཅུ་གསུམ་པ་ཆེན་པོ་མཆོག་གིས་བོད་རིགས་སེར་སྐྱ་མི་མང་རྣམས་ལ་སྩལ་བའི་མ་འོངས་ལུང་བསྟན་གྱི་ཞལ་གདམས་དང་། དེ་བཞིན་ཤིང་ལུག་ཕྱི་ལོ་༡༩༥༥ ལོར་༧གོང་ས་སྐུ་ཕྲེང་བཅུ་བཞི་པ་ཆེན་པོ་མཆོག་གིས་ཆོས་སྲིད་ཟུང་འབྲེལ་ལམ་ནས་སངས་རྒྱས་ཀྱི་བསྟན་པ་ཉམས་གསོ་གོང་སྤེལ་བྱེད་དགོས་པའི་བཀའ་སློབ་སྙིང་གི་ནོར་བུ་གཉིས་བསྡུས་ཡོད།
