རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་དམིགས་བསལ་ཚོགས་འདུ་དབུ་འཛུགས།

བཞུགས་སྒར་རྡ་ས་གངས་ཅན་སྐྱིད་གཤོངས་སུ་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་དམིགས་བསལ་ཚོགས་འདུ་ཞིག་དབུ་འཛུགས་གནང་སོང་། ཐེངས་འདིའི་ཚོགས་འདུའི་ཐོག་རྒྱལ་ཁབ་༣༢ ནས་ཁྱོན་བོད་དོན་རྒྱབ་སྐྱོར་བ་༡༠༦ ཙམ་ཕེབས་འདུག

ཕྱི་ལོ་༢༠༢༦ ཟླ་༣ ཚེས་༧ ཉིན་བཞུགས་སྒར་རྡ་ས་གངས་ཅན་སྐྱིད་གཤོངས་སུ་རྒྱལ་སྤྱིའི་བོད་རྒྱབ་སྐྱོར་ཚོགས་པའི་དམིགས་བསལ་ཚོགས་འདུ་ཞིག་དབུ་འཛུགས་གནང་སོང་། ཚོགས་འདུ་དེ་དང་འབྲེལ་བོད་མིའི་སྒྲིག་འཛུགས་ཀྱི་ཕྱི་དྲིལ་ལས་ཁུངས་ཀྱི་དྲུང་ཆེ་ཀརྨ་ཆོས་དབྱིངས་ཀྱིས་གསུངས་དོན། འདི་ལོ་བོད་མིའི་སྒྲིག་འཛུགས་ཀྱིས་༧གོང་ས་མཆོག་གི་སྐུའི་གོ་སྟོན་སྲུང་བརྩི་ཞུ་བ་དང་འབྲེལ། ན་ནིང་༧གོང་ས་མཆོག་གི་འཁྲུངས་སྐར་ཉིན་ནས་ལོ་གཅིག་རིང་བྱམས་བརྩེའི་ལོ་སྲུང་བརྩི་ཞུ་བཞིན་ཡོད་པར་བརྟེན། བོད་པའི་གྲོགས་པོ་དང་། བོད་དོན་རྒྱབ་སྐྱོར་བ་རྣམས་ཧ་ཅང་གལ་ཆེན་པོ་ཡིན་དུས། འདི་ལོ་གསུམ་བཅུའི་དུས་དྲན་དང་སྟབས་བསྟུན་ནས་ཁོང་རྣམས་རྡ་སར་མགྲོན་འབོད་ཞུས་ཏེ་གཞུང་འབྲེལ་མཛད་སྒོའི་ཐོག་ཏུ་གདན་འདྲེན་ཞུ་བ་དང་ཆབས་ཅིག དེ་རིང་ཚེས་༧ ནས་ཚེས་༩ བར་ཉིན་གྲངས་གསུམ་རིང་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་དམིགས་བསལ་ཚོགས་འདུ་ཞིག་གོ་སྒྲིག་བྱས་ཡོད་ཅེས་གསུངས་སོང་། ཚོགས་འདུ་དེ་གཙོ་བོ་རྒྱ་གར་བོད་དོན་རྒྱབ་སྐྱོར་ཚོགས་པའི་ངོས་ནས་གོ་སྒྲིག་ཞུས་པ་དང་། བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ནས་རོགས་འདེགས་ཞུ་བཞིན་ཡོད་ཅེས་གསུངས། སྤྱིར་བཏང་ཉེ་ཆར་དཀྱིལ་ཤར་ཡུལ་གྲུར་དམག་འཁྲུག་རྒྱག་བཞིན་ཡོད་ཀྱང་། ཐེངས་འདིའི་ཚོགས་འདུའི་ཐོག་ཏུ་ཁྱོན་རྒྱལ་ཁབ་༣༢ ནས་བོད་དོན་རྒྱབ་སྐྱོར་བ་༡༠༦ དངོས་སུ་བཞུགས་སྒར་དུ་ཕེབས་ཐུབ་ཡོད་པ་དང་། ཐེངས་འདིའི་ཚོགས་འདུའི་བརྗོད་གཞི་ནི་༧གོང་ས་མཆོག་གི་སྐུའི་ཡང་སྲིད་དང་། ཞུ་གཏུག་ལས་འགུལ་སྤེལ་ཕྱོགས། ལོ་རྒྱུས་ཐོག་ནས་བོད་དེ་རང་དབང་རང་བཙན་གཙང་མའི་རྒྱལ་ཁབ་ཡིན་པའི་སྐོར་སོགས་བརྗོད་གཞི་འདྲ་མིན་མང་པོ་ཞིག་ཡོད་པ་བརྗོད། དེ་རྗེས་ཚེས་༡༡ ཉིན་རྒྱལ་སྤྱིའི་བོད་དོན་ཚོགས་པའི་ངོས་ནས་༧གོང་ས་མཆོག་ལ་བརྟན་བཞུགས་ཤིག་འབུལ་རྒྱུ་ཡིན་ཞེས་ཀྱང་གསུངས་སོང་།
དེ་རྗེས་ཕྱི་དྲིལ་ལས་ཁུངས་ཀྱི་ལྷག་པ་ཚེ་རིང་ཚོགས་ཁང་དུ་རྡ་རམ་ས་ལའི་ཡོངས་ཁྱབ་གསལ་བསྒྲགས་ཞེས་པ་ཞིག་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་དང་། རྒྱ་གར་བོད་དོན་རྒྱབ་སྐྱོར་ཚོགས་པའི་རྒྱལ་ཡོངས་འབྲེལ་མཐུད་པ་སྐུ་ཞབས་རིན་ཆེན་མཁའ་འགྲོ་ཁེར་མེ། (R.K. Khrimey) ཇར་མི་ནིའི་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་དང་བོད་དོན་རྒྱབ་སྐྱོར་བ་ཁཱ་ཡེ་མུ་ལར་ (Kai Muller) བཅས་གསུམ་གྱིས་མཉམ་འབྲེལ་ཐོག་ནས་སྤེལ་སོང་།
གསལ་བསྒྲགས་དེའི་ནང་གཙོ་བོ་རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་ངོས་ནས་བོད་པའི་འཚེ་མེད་ཞི་བའི་འཐབ་རྩོད་ལ་རྒྱབ་སྐྱོར་དང་། རྒྱལ་སྤྱིའི་སྤྱི་ཚོགས་ཀྱི་ངོས་ནས་བོད་རྒྱ་དཀའ་རྙོག་སེལ་ཐབས་སུ་རྒྱབ་སྐྱོར་བྱེད་དགོས་པའི་འབོད་སྐུལ་ཞུས་སོང་།
ང་ཚོས་༧གོང་ས་མཆོག་གིས་ཕྱི་ལོ་༢༠༢༥ ཟླ་༧ ཚེས་༢ ཉིན་བོད་ཀྱི་ཆོས་དད་རང་དབང་དང་། ལྷག་པར་དུ་བོད་བརྒྱུད་ནང་བསྟན་གྱི་སྤྲུལ་སྐུའི་ཡང་སྲིད་ངོས་འཛིན་བྱེད་ཕྱོགས་སྐོར་ལ་ཕྱོགས་ཡོངས་ཀྱི་གསུང་འཕྲིན་ཞིག་ཕེབས་པ་དེར་དོ་སྣང་ཆེན་པོ་བྱས་ཡོད། ལོ་ངོ་བརྒྱ་ཕྲག་དུ་མའི་ལོ་རྒྱུས་ལྡན་པའི་༧གོང་ས་མཆོག་སྐུ་ཕྲེང་རིམ་བྱོན་གྱི་ལམ་ལུགས་དང་འབྲེལ། ༸གོང་ས་མཆོག་གི་མ་འོངས་ཡང་སྲིད་ངོས་འཛིན་བྱེད་རྒྱུའི་དབང་ཆ་ཡོངས་རྫོགས་བོད་ཀྱི་ཆོས་ལུགས་ཁག་གི་དབུ་ཁྲིད་བླ་ཆེན་ཁག་དང་ལྷན་དུ་གྲོས་བསྡུར་གནང་བའི་ཐོག དགའ་ལྡན་ཕོ་བྲང་ཡིད་ཆེས་དགེ་རྩ་ཚོགས་པར་ཁོ་ན་དབང་ཆ་ཆ་ཚང་ཡོད་ཅེས་པར་ང་ཚོས་རྒྱབ་སྐྱོར་ཞུ་བཞིན་ཡིན།
དེ་བཞིན་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་གཞུང་གིས་བོད་ཀྱི་ཆོས་ལུགས་ཀྱི་རྩ་ཆེའི་ལམ་སྲོལ་ནང་ཐེ་བྱུས་བྱེད་པའི་བྱ་ཐབས་གང་འདྲ་ཞིག་ཡིན་རུང་། དེ་ནི་རྒྱལ་སྤྱིའི་འགྲོ་ལུགས་དང་ཆོས་དད་རང་དབང་གི་གཞི་རྩའི་ཐོབ་ཐང་ལ་ཚབས་ཆེན་གྱིས་རྡོག་རོལ་བཏང་བ་ཞིག་ཡིན་པར་ངོས་འཛིན་བྱེད་ཀྱི་ཡོད། ང་ཚོས་དེ་འདྲའི་ཐེ་བྱུས་ལ་ངོ་རྒོལ་དང་གདོང་ལེན་བྱེད་རྒྱུའི་དམ་བཅའ་བརྟན་པོ་ཡོད་ཅེས་བརྗོད་སོང་།
ད་དུང་ང་ཚོས་མང་གཙོའི་ལམ་ནས་འོས་འདེམས་བྱས་པའི་བོད་མིའི་སྒྲིག་འཛུགས་ (CTA) ཀྱི་འགོ་ཁྲིད་པའི་བཙན་བྱོལ་བོད་མིའི་མང་གཙོའི་སྒྲིག་འཛུགས་ལ་བསྔགས་བརྗོད་ཞུ་རྒྱུ་ཡིན། བོད་ཕྱི་ནང་གཉིས་སུ་ཡོད་པའི་བོད་མི་ཡོངས་ཀྱི་མངོན་འདོད་ངོ་མ་མཚོན་པའི་བོད་མིའི་ཁྲིམས་མཐུན་གྱི་སྲིད་གཞུང་ཉག་གཅིག་དེ་བོད་མིའི་སྒྲིག་འཛུགས་ཡིན་པར་བསྐྱར་ནན་གྱིས་རྒྱབ་སྐྱོར་ཞུ་རྒྱུ་ཡིན། ང་ཚོས་རྒྱལ་ཁབ་ཁག་གི་གཞུང་དང་། རྒྱལ་སྤྱིའི་སྒྲིག་འཛུགས། དེ་བཞིན་གཞུང་འབྲེལ་མ་ཡིན་པའི་ཚོགས་པ་ཁག་བཅས་ལ་བོད་མིའི་སྒྲིག་འཛུགས་འདི་ཉིད་ “བཙན་བྱོལ་བོད་གཞུང་” གི་ངོ་བོར་གཞུང་འབྲེལ་གྱིས་ངོས་འཛིན་གནང་དགོས་པ་དང་། དེ་དང་ལྷན་དུ་འབྲེལ་བ་གནང་དགོས་པའི་འབོད་སྐུལ་ཞུ་བཞིན་ཡོད།
མཐའ་དོན་ང་ཚོས་བོད་ནང་ད་ལྟ་འགྲོ་བཞིན་པའི་རྒྱ་ནག་གི་དྲག་གནོན་ཅན་གྱི་སྲིད་བྱུས་ཁག་ལ་བློ་འཚབ་དང་སྦྲགས། ༸གོང་ས་མཆོག་གི་སྐུ་ཚབ་བམ་ཡང་ན་མང་གཙོའི་ལམ་ནས་འོས་འདེམས་བྱས་པའི་བོད་མིའི་དབུ་ཁྲིད་དང་། རྒྱ་ནག་མི་དམངས་སྤྱི་མཐུན་རྒྱལ་ཁབ་གཞུང་གི་དབར་ལ་སྔོན་འགྲོའི་ཆ་རྐྱེན་གང་ཡང་མེད་པའི་ཐོག་ནས་ཐད་ཀར་གྲོས་མོལ་བསྐྱར་གསོ་བྱེད་དགོས་པའི་འབོད་སྐུལ་ཞུ་བཞིན་ཡོད། བོད་རྒྱའི་རྩོད་རྙོག་ལ་དྲང་བདེན་དང་ཡུན་གནས་ཐུབ་པའི་འགྲིག་འཇགས་ཤིག་མ་བྱུང་བར་དུ་ང་ཚོས་རྒྱལ་སྤྱིའི་ཐོག་བོད་དོན་དྲིལ་བསྒྲགས་ཤུགས་ཆེ་རུ་གཏོང་རྒྱུ་དང་། འགྲོ་བ་མིའི་ཐོབ་ཐང་རྡོག་རོལ་བཏང་བའི་གནས་ཚུལ་ཁག་ཡིག་ཐོག་ཏུ་འགོད་རྒྱུ། དེ་བཞིན་བོད་ནང་གི་གནས་སྟངས་ལ་རྒྱལ་སྤྱིའི་དོ་སྣང་མ་བརླགས་པར་གནས་ཐབས་བྱེད་རྒྱུར་དམ་བཅའ་བརྟན་པོ་ཡོད་ཅེས་བརྗོད་སོང་།།

གསར་འགོད་པ། བསོད་ནམས་ཕུན་ཚོགས།