སྲིད་སྤྱི་གཉིས་ནས་ཉི་ཧོང་གི་བདམས་ཐོན་སྲིད་བློན་ལ་འཚམས་འདྲི་ཞུས་འདུག
ལྕམ་སྐུ་ན་ཨེ་ ཏ་ཀ་ཨི་ཆི་༼Sanae Takaichi༽ ཡང་བསྐྱར་ཉི་ཧོང་གི་སྲིད་བློན་ལ་བདམས་ཐོན་བྱུང་བར་བརྟེན། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་དང་བོད་མི་མང་སྤྱི་འཐུས་ཚོགས་གཙོ་གཉིས་ཀྱིས་འཚམས་འདྲི་ཞུས་འདུག
ཕྱི་ལོ་༢༠༢༦ ཟླ་༢ ཚེས་༡༠ ཉིན། བོད་མིའི་སྒྲིག་འཛུགས་ཀྱི་དྲ་ཐོག་ཏུ་གནས་ཚུལ་སྤེལ་གསལ་ལྟར་ན། སྲིད་སྐྱོང་སྤེན་པ་ཚེ་རིང་གིས་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་ལྕམ་སྐུ་ས་ན་ཨེ་ ཏ་ཀ་ཨི་ཆི་མཆོག་ཉི་ཧོང་གི་སྲིད་བློན་དུ་འོས་འདེམས་བྱུང་བར་དགའ་བསུའི་འཚམས་འདྲི་ཞུས་འདུག
དེ་ཡང་སྲིད་སྐྱོང་གི་འཚམས་འཕྲིན་ནང་། དཔལ་ལྡན་སྲིད་སྐྱོང་མཆོག་གིས་ང་ཚོས་ཁྱེད་ཀྱི་དབུ་ཁྲིད་ཀྱི་ནུས་པར་བརྩི་བཀུར་ཆེན་པོ་ཞུ་བཞིན་པ་མ་ཟད། མང་གཙོའི་རིན་ཐང་ཆེད་མངོན་གསལ་གྱིས་རྒྱབ་སྐྱོར་གནང་བ་དང་། རྒྱ་ནག་ཐོག་འགྱུར་བ་མེད་པའི་ལངས་ཕྱོགས་བརྟན་པོ་བཟུང་བ་བཅས་ལ་ཡིད་སྨོན་ཞུ་བཞིན་ཡོད། དེ་བཞིན་བོད་ནང་གི་གཞི་རྩའི་རང་དབང་ལ་མུ་མཐུད་བརྡལ་བཤིག་གཏོང་བཞིན་པར་སྐྱོན་བརྗོད་གནང་བའི་བསྒྲགས་གཏམ་ཁག་ལ་ང་ཚོས་ཐུགས་རྗེ་ཆེ་ཞུ་ཡི་ཡོད་ཅེས་དང་། ལྕམ་སྐུ་ས་ན་ཨེ་ཏ་ཀ་ཨེ་ཆི་མཆོག་གི་དབུ་ཁྲིད་ལམ་སྟོན་འོག་བོད་དང་ཉི་འོང་བར་མཛའ་འབྲེལ་དང་མཉམ་ལས་སྔག་ལྷག་དམ་ཟབ་ཏུ་འགྲོ་རྒྱུའི་ཡིད་ཆེས་བརྟན་པོ་ཡོད་ཅེས་གསུངས་འདུག
གཞན་ཡང་། བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས། སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་དང་། གཞིས་བྱེས་བོད་མི་ཡོངས་ཀྱི་ཚབ་ཞུས་ཏེ། ལྕམ་སྐུ་ས་ན་ཨེ་ཏ་ཀ་ཨི་ཆི་མཆོག་གིས་སྣེ་ཁྲིད་པའི་སྲིད་དོན་ཚོགས་པར་སླར་ཡང་འོས་བསྡུའི་རྒྱལ་ཁ་ཐོབ་སྟེ། ཉི་ཧོང་གི་སྲིད་བློན་དུ་འོས་འདེམས་བྱུང་བར་དགའ་བསུའི་འཚམས་འདྲི་ཞུས་འདུག
འཚམས་འཕྲིན་ནང་ཁོང་གིས། ཉི་ཧོང་རྒྱལ་ཁབ་ནི་དུས་ཡུན་རིང་པོར་མང་གཙོའི་ལམ་སྲོལ་སྲ་བརྟན་དང་། ཞི་བདེར་གཅེེས་སྤྲས། འཛམ་གླིང་མཐུན་སྒྲིལ་ཐོག་སྣེ་ཁྲིད་གནང་མཁན་ཞིག་ཡིན་སྟབས་ཚང་མས་ཡིད་སྨོན་བྱེད་ས་ཞིག་ཆགས་ཡོད། ད་རེས་སྐུ་ཉིད་ཉི་འོང་གི་སྲིད་བློན་དུ་སླར་ཡང་འོས་འདེམས་བྱུང་བ་དེས། ཉི་ཧོང་མི་མང་གིས་ཡིད་ཆེས་དང་གདེང་འཇོག་ཆེན་པོ་གནང་གི་ཡོད་པ་མཚོན་ཐུབ།
སྐུ་ཉིད་ཀྱི་དབུ་ཁྲིད་འོག་ཉི་ཧོང་རྒྱལ་ཁབ་སྔར་བཞིན་འཆམ་མཐུན་དང་ཡར་རྒྱས་གོང་འཕེལ་ཡོང་བ་དང་། དེ་བཞིན་སྲིད་བློན་གྱི་ལས་ཡུན་རིང་ཉི་འོང་མི་མང་གི་མངོན་འདོད་འགྲུབ་རྒྱུར་ནུས་པ་འདོན་ཐུབ་པ་དང་། འཛམ་གླིང་ཞི་བདེ་དང་མཐུན་སྒྲིལ་གོང་འཕེལ་ཡོང་ཐུབ་པའི་སྨོན་འདུན་ཞུ་རྒྱུ་ཡིན་ཞེས་འཁོད་འདུག།།
གསར་འགོད་པ། བློ་བཟང་རྒྱ་མཚོ།
