ཨི་རན་གྱི་ཞིང་ཆེན་༣༡ ནང་མི་མང་གི་ངོ་རྒོལ་ལས་འགུལ།

ཟླ་འདིའི་ཚེས་༡༣ ཉིན། རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་སྤེལ་གསལ་ལྟར་ན། ད་ལྟའི་ཆར་ཨི་རན་གྱི་ཞིང་ཆེན་༣༡ ཡོངས་རྫོགས་ཀྱི་ནང་། གྲོང་ཁྱེར་༡༨༠ ལྷག་གི་ནང་དུ་མི་མང་གིས་སྲིད་གཞུང་ལ་ངོ་རྒོལ་གྱི་ལས་འགུལ་སྤེལ་བཞིན་པར་བརྟེན། ངོ་རྒོལ་གྱི་ལས་འགུལ་དེ་ནི་སྲིད་གཞུང་གིས་གདོང་ལེན་བྱེད་དགོས་པའི་དཀའ་ངལ་ཆེ་ཤོས་སུ་གྱུར་ཡོད་འདུག

ངོ་རྒོལ་གྱི་ལས་འགུལ་དེ་ཐོག་མར་ཕྱི་ལོ་༢༠༢༥ ཟླ་༡༢ པའི་ཟླ་མཇུག་ཏུ། ཨི་རན་གྱི་རྒྱལ་ས་ཏེ་ཧེ་རཱན་གྱི་ཚོང་རྭ་ཆེན་མོ་(Grand Bazaar)ནས་འགོ་བཙུགས་ཡོད་འདུག མི་མང་གིས་ངོ་རྒོལ་བྱེད་དོན་གཙོ་བོ་ནི་དངུལ་ལོར་གྱི་འཛའ་ཐང་ཧ་ཅང་ཆགས་པ་དང་། བཟའ་བཅའ་དང་འཚོ་བའི་མཁོ་ཆས་ཀྱི་གོང་ཚད་བཟོད་ཐབས་མེད་པར་འཕར་བའི་རྐྱེན་གྱིས་ཡིན་འདུག
ཨི་རན་གྱི་ཚོང་པ་(Bazaaris) རྣམས་ནི་ནམ་རྒྱུན་སྲིད་གཞུང་ལ་རྒྱབ་སྐྱོར་བྱེད་མཁན་གྱི་སྡེ་ཁག་ཅིག་ཡིན་ཡང་། ད་རེས་དཔལ་འབྱོར་གྱི་དཀའ་ངལ་ལ་བརྟེན། ཚོང་པ་ཚོས་ཀྱང་ཚོང་ཁང་སྒོ་བརྒྱབ་སྟེ་ངོ་རྒོལ་གྱི་ལས་འགུལ་ནང་མཉམ་ཞུགས་བྱས་ཡོད་འདུག
མི་མང་གིས་ཐོག་མ་དཔལ་འབྱོར་གྱི་དཀའ་ངལ་བཤད་ནས་ཞི་བའི་ཐོག་ཁྲོམ་སྐོར་གྱི་ལས་འགུལ་སྤེལ་པར། སྲིད་གཞུང་གིས་ལན་འདེབས་བྱེད་རྒྱུའི་ཚབ་ཏུ་མེ་མདའ་བརྒྱབ་ནས་ལས་འགུལ་བ་མང་པོ་བསད་པར་བརྟེན། མི་མང་རྣམས་ཁོང་ཁྲོ་ལངས་ནས་སྒེར་གཅོད་པ་རྩ་མེད་བཟོ་དགོས། སྒེར་གཅོད་པའི་ལམ་ལུགས་མེད་པར་བཟོ་དགོས་སོགས་ཀྱི་འབོད་སྒྲ་སྣ་ཚོགས་བསྒྲགས་ནས་སྲིད་གཞུང་མེད་པར་བཟོ་དགོས་པའི་ངོ་རྒོལ་གྱི་ལས་འགུལ་ཤུགས་ཆེན་སྤེལ་ཞིང་། ངོ་རྒོལ་བ་ཚོས་རྒྱལ་ཡོངས་སུ་ཡོད་པའི་དངུལ་ཁང་མང་པོར་མེ་རྒྱག་པ་དང་། དངུལ་འདོན་འཕྲུལ་འཁོར་(ATM)བརྒྱ་ཕྲག་མང་པོ་གཏོར། དེ་བཞིན་གྲོང་འཁྱེར་འགའ་ཤས་སུ་གཞུང་ལས་ཁང་མང་པོ་མེས་བསྲེགས་པ་དང་། ཆོས་ཁང་གཏོར་བ། གཞུང་ཕྱོགས་ཀྱི་དྲིལ་བསྒྲགས་ལྟེ་གནས་ཁག་ལ་ཡང་གཏོར་རྒོལ་བྱས་ཡོད་འདུག
ཨ་རིར་རྟེན་གཞི་བྱས་པའི་འགྲོ་བ་མིའི་ཐོབ་ཐང་ཚོགས་པ་(HRANA)ཡི་སྙན་ཐོ་ལྟར་ན། ངོ་རྒོལ་གྱི་ལས་འགུལ་མགོ་བཙུགས་ནས་ད་བར་ཉིན་གྲངས་༡༧ ཙམ་ཕྱིན་པའི་རིང་། ཨི་རན་སྲིད་གཞུང་གིས་ངོ་རྒོལ་བ་༢,༤༠༠ ལྷག་བསད་ཡོད་པ་དང་། ངོ་རྒོལ་བ་༡༨,༠༠༠ ལྷག་འཛིན་བཟུང་བྱས་ཡོད་འདུག། འོན་ཀྱང་། གནས་ཚུལ་ཁ་ཤས་ནང་ཤི་རྨས་བྱུང་བའི་གྲངས་ཀ་དེ་ལས་མང་བ་ཡོད་པའི་ཚོད་དཔག་བྱེད་བཞིན་ཡོད།
ཨ་རིའི་གཞུང་གིས་ཨི་རན་གྱི་ཛ་དྲག་གནས་སྟངས་ལ་དོ་སྣང་ཆེན་པོ་བྱེད་བཞིན་ཡོད་པ་དང་། ལྷག་པར་དུ་སྲིད་འཛིན་ཊོམ་གྱིས་གལ་ཏེ་ཨི་རན་སྲིད་གཞུང་གིས་ངོ་རྒོལ་བར་དྲག་གནོན་བྱས་ན། ཨ་རིས་ཨི་རན་ལ་དམག་དོན་གྱི་ཐོག་ནས་ལན་ཆ་སློག་རྒྱུའི་ཉེན་བརྡ་བཏང་ཡོད་པ་མ་ཟད། ངོ་རྒོལ་བ་ཚོ་ལ་རོགས་པ་འབྱོར་བཞིན་ཡོད་ཅེས་བརྡ་ལན་ཡང་བཏང་ཡོད་འདུག
དེ་བཞིན་སྲིད་འཛིན་ཊོམ་གྱིས་ཨི་རན་གྱི་དཔོན་རིགས་དང་ལྷན་དུ་གྲོས་མོལ་ཚང་མ་མཚམས་འཇོག་བྱས་ཡོད་ཅེས་དང་། ཨི་རན་དང་མཉམ་དུ་ཚོང་འབྲེལ་བྱེད་མཁན་གྱི་རྒྱལ་ཁབ་ཁག་ལ་སྒོ་ཁྲལ་༢༥% (Tariff) འཕར་མ་རྒྱག་རྒྱུའི་གསལ་བསྒྲགས་ཀྱང་བྱས་ཡོད་འདུག
རྒྱ་གཞུང་གིས་ཁྲལ་འཕར་མ་གང་བྱུང་དུ་འགེལ་རྒྱུའི་ཁ་གཏད་དུ་ལངས་རྒྱུའི་ལངས་ཕྱོགས་བརྟན་པོ་དང་གསལ་པོ་ཡིན་ཞེས་དང་། ཁྲལ་གྱི་དམག་འཁྲུག་དང་ཚོང་འབྲེལ་དམག་འཁྲུག་གི་ནང་རྒྱལ་ཁ་ཐོབ་མཁན་སུ་ཡང་མེད། དེ་བཞིན་དབང་ཡོད་དང་གནོན་ཤུགས་ཀྱིས་དཀའ་ངལ་སེལ་མི་ཐུབ་ཅེས་བརྗོད་འདུག
ཨི་རན་དང་ཚོང་འབྲེལ་བྱེད་མཁན་གཙོ་བོ་ཞིག་ནི་རྒྱ་ནག་ཆགས་ཀྱི་ཡོད་པ་དང་། གལ་སྲིད་སྲིད་འཛིན་ཊོམ་གྱིས་སྒོ་ཁྲལ་འཕར་མ་བཀལ་ཚེ། འཛམ་གླིང་གི་ཚོང་འབྲེལ་ལ་དོ་ཕོག་འགྲོ་གིན་ཡོད་པ་མ་ཟད། ཨི་རན་གྱི་གནད་དོན་དེས་ཨ་རྒྱ་དབར་གྱི་འབྲེལ་བ་སྡུག་ཏུ་གཏོང་བྱེད་ཅིག་ཏུ་གྱུར་སྲིད་པ་ཡིན་འདུག
གནས་ཚུལ་དབྱེ་ཞིབ་པ་འགས་ཨི་རན་ནི་འཛམ་གླིང་གི་རྡོ་སྣུམ་གྱི་ཐོན་ཁུངས་ཆེ་ཤོས་གྲས་ཤིག་ཡིན་པར་བརྟེན། ནང་འཁྲུག་གི་དཀའ་ངལ་དེས་རྒྱལ་སྤྱིའི་ཁྲོམ་རའི་ནང་རྡོ་སྣུམ་གྱི་གོང་ཚད་འཕར་རྒྱུའི་ཉེན་ཁ་ཆེན་པོ་བཟོ་བཞིན་ཡོད་པ་དང་། གལ་ཏེ་ཨི་རན་གྱི་རྡོ་སྣུམ་མཁོ་འདོན་ལ་བཀག་འགོག་ཕོག་ན། ཡུ་རོབ་དང་ཨེ་ཤི་ཡའི་རྒྱལ་ཁབ་ཁག་གི་དཔལ་འབྱོར་ལ་ཤུགས་རྐྱེན་ཐེབས་སྲིད་པ་བརྗོད་འདུག
ཐེངས་འདིའི་ཨི་རན་པ་ཚོའི་ངོ་རྒོལ་གྱི་ལས་འགུལ་དེ་ནི་དཔལ་འབྱོར་གྱི་དཀའ་ངལ་ཁོ་ན་མ་ཡིན་པར། ལོ་ངོ་མང་པོའི་རིང་གི་དྲག་གནོན་ལ་བཟོད་ཐབས་བྲལ་ནས་སྒེར་ལངས་ཆེན་པོ་ཞིག་ཏུ་གྱུར་ཡོད་འདུག ཨ་རིའི་སྲིད་འཛིན་གྱིས་ཉེན་བརྡ་བཏང་བ་དང་། རྒྱ་ནག་གིས་དེར་ངོ་རྒོལ་བྱས་པ་སོགས། ཨི་རན་གྱི་ནང་སྲིད་ཀྱི་དཀའ་ངལ་དེ་རྒྱལ་སྤྱིའི་དཔལ་འབྱོར་དང་ཆབ་སྲིད་ཀྱི་འཐབ་རྩོད་ཅིག་ཏུ་འགྱུར་བཞིན་པས། རྒྱལ་སྤྱིའི་སྤྱི་ཚོགས་ཀྱིས་མ་འོངས་གནས་སྟངས་ཇི་ལྟར་འགྱུར་མིན་དོ་སྣང་ཆེན་པོ་བྱེད་བཞིན་ཡོད་འདུག།
གསར་འགོད་པ། བློ་བཟང་རྒྱ་མཚོ།