རྒྱལ་ཡོངས་མང་གཙོ་ལྟེ་གནས་ཁང་གི་གོ་སྒྲིག་འོག་ན་གཞོན་འདུ་འཛོམས་ཤིག་འགོ་འཛུགས་གནང་སོང་།
བོད་མིའི་སྒྲིག་འཛུགས་ཀྱི་ནུས་པ་གོང་འཕེལ་དང་འཛིན་སྐྱོང་སྲ་བརྟན་གྱི་ལས་འཆར་ཁོངས་སུ་རྒྱལ་ཡོངས་མང་གཙོ་ལྟེ་གནས་ཁང་གིས་རྒྱ་གར་དང་བལ་ཡུལ་གྱི་ན་གཞོན་འདུ་འཛོམས་ཤིག་གོ་སྒྲིག་གནང་འདུག
ཕྱི་ཚེས་༡ ཉིན་བོད་མིའི་སྒྲིག་འཛུགས་ཀྱི་ནུས་པ་གོང་འཕེལ་དང་འཛིན་སྐྱོང་སྲ་བརྟན་གྱི་ལས་འཆར་ཁོངས་སུ། རྒྱལ་ཡོངས་མང་གཙོ་ལྟེ་གནས་ཁང་གི་གོ་སྒྲིག་འོག་རྡ་སའི་ཉེ་འཁོར་དུ་ཡོད་པའི་(Ghauladhar Heights Resort)ཟེར་བའི་གསོལ་མགྲོན་ཁང་དུ་ཉིན་གྲངས་ལྔའི་རིང་གི་ན་གཞོན་འདུ་འཛོམས་དེ་འགོ་འཛུགས་གནང་སོང་ལ། འདུ་འཛོམས་དེའི་མཛད་སྒོའི་ཐོག་གི་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་དང་བོད་མི་མང་སྤྱི་འཐུས་ལྷ་རྒྱ་རི་རྣམ་རྒྱལ་སྒྲོལ་དཀར་རྣམ་གཉིས་གཙོས། གཞན་རྒྱ་གར་དང་བལ་ཡུལ་གཉིས་སུ་ཡོད་པའི་ཚོགས་པ་ཁག་༢༤ ཡི་ཚོགས་མི་ན་གཞོན་༣༨ ཙམ་མཉམ་ཞུགས་གནང་འདུག ཐེངས་འདིའི་ན་གཞོན་འདུ་འཛོམས་དེ་ཐེངས་དང་པོ་ཆགས་ཀྱི་ཡོད་འདུག་པ་དང་། ན་གཞོན་འདུ་འཛོམས་དེའི་དམིགས་ཡུལ་གཙོ་བོ་གསུམ་ལ་བརྟེན་ནས་གོ་སྒྲིག་གནང་ཡོད་འདུག དང་པོ། བོད་མིའི་སྒྲིག་འཛུགས་ཀྱིས་བོད་པའི་སྤྱི་ཚོགས་ཁྲོད་དུ་ན་གཞོན་ཚོའི་དཀའ་ངལ་དང་། ན་གཞོན་རྣམས་ལ་དགོས་མཁོ་གང་ཡོད་མེད། དེའི་ཆེད་དུ་བོད་མིའི་སྒྲིག་འཛུགས་ཀྱི་ངོས་ནས་གཏམ་བཤད་གནང་མཁན་མགྲིན་ཚབ་པ་དང་ཆེད་མཁས་པ་བཅས་གདན་འདྲེན་གནང་ཡོད་འདུག གཉིས་པ། བོད་པའི་ན་གཞོན་ཚོར་དབུས་བོད་མིའི་སྒྲིག་འཛུགས་སྐོར་གོ་རྟོགས་སྤེལ་རྒྱུདང་། གསུམ་པ། འདུ་འཛོམས་འདིའི་ནང་ཚོགས་པ་ཁག་སོ་སོའི་འགར་འཁུར་བ་མང་པོ་ཞིག་ཕེབས་ཡོད་པས། མ་འོངས་པར་ཚོགས་པ་དེ་དག་གིས་མཉམ་རུབ་ཐོག་ནས་ལས་འགུལ་དང་།
ལས་འཆར་རིགས་གང་འདྲ་སྤེལ་དགོས་མིན་ཐད་གོ་རྟོགས་སྤེལ་རྒྱུ་ཡིན་པ་རྒྱལ་ཡོངས་མང་གཙོ་ལྟེ་གནས་ཁང་གི་གོ་སྒྲིག་པ་ཀརྨ་ཕུན་ཚོགས་ལགས་ནས་བརྗོད་གནང་སོང་། དེ་བཞིན་ཐེངས་འདིའི་འདུ་འཛོམས་ནང་ཚོགས་བཅར་བ་ཁྱོན་༣༨ དང་། རྒྱ་གར་ནང་དུ་ཡོད་པའི་ཚོགས་པ་ཁག་༢༤ ཡི་ཚོགས་མི་༢༤ དང་། བལ་ཡུལ་ནས་༣ དང་གཞུང་འབྲེལ་མ་ཡིན་པའི་ཚོགས་པ་ཁག་ནས་༤། དེ་བཞིན་བོད་ཀྱི་སྲིད་བྱུས་ཉམས་ཞིབ་ཁང་ནས་༤ བཅས་ཡོད་འདུག གསར་འགོད་པས་ཉི་མ་རེ་རེ་ལ་ལས་འཆར་ག་རེ་གོ་སྒྲིག་གནང་ཡོད་མེད་དྲིས་པས། གོ་སྒྲིག་པ་ཀརྨ་ཕུན་ཚོགས་ནས་བརྗོད་དོན།་འདུ་འཛོམས་དེ་ཉིན་གྲངས་༥ རིང་ཚོགས་འཆར་ཡོད་པ་དང་། ཉིན་དང་པོ་ཚོགས་བཅར་བ་ན་གཞོན་རྣམས་ཕན་ཚུན་ངོ་སྤྲོད་དང་བསམ་ཚུལ་བརྗེ་ལེན་བྱེད་རྒྱུ། བོད་པའི་ངོ་བོའི་སྐོར་བགྲོ་གླེང་གནང་རྒྱུ་བཅས་ཡིན་འདུག ཉིན་གཉིས་པ་དབུས་བོད་མིའི་སྒྲིག་འཛུགས་ཀྱི་སྲིད་བྱུས་དབུ་མའི་ལམ་སྐོར་གོ་བསྡུར་དང་། སྲིད་བྱུས་དེ་གཏན་འབེབས་གང་འདྲ་བྱས་ཡོད་མེད། ཉིན་གསུམ་པ་ཚོགས་བཅར་བ་རྣམས་ཀྱི་ནུས་པ་གོང་མཐོར་ཡོང་ཐབས་ཀྱི་ཆེད་དུ་ཟབ་སྦྱོང་སྤྲོད་རྒྱུ་ཡིན་འདུག ཉིན་བཞི་པ་བོད་པའི་ན་གཞོན་ཚོས་མཉམ་རུབ་བྱས་ནས་བོད་པའི་རྩ་དོན་ཆེད་དུ་ལས་འགུལ་གང་འདྲ་སྤེལ་དགོས་མིན་གྱི་སྐོར་གོ་བསྡུར་བྱེད་རྒྱུ་སོགས་ཡིན་པར་བརྗོད་གནང་སོང་། འདུ་འཛོམས་དབུ་འབྱེད་མཛད་སྒོའི་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་སྐུ་མགྲོན་དུ་གདན་ཞུ་གནང་ཡོད་པ་བཞིན། སྲིད་སྐྱོང་ནས་བོད་པའི་སྤྱི་ཚོགས་ཁྲོད་དུ་ན་གཞོན་ཚོས་གནས་ཚུལ་འདྲ་མིན་གྱི་ཐོག་གོ་རྟོགས་ཡོད་རྒྱུ་གལ་ཆེན་པོ་ཡིན་པ་དང་། མ་འོངས་པར་ན་གཞོན་ལ་སྤྱི་ཚོགས་ཀྱི་འགན་འཁྲི་སླེབ་ཀྱི་ཡོད་པས། ད་ལྟ་ནས་དོ་སྣང་མང་ཙམ་བྱེད་དགོས་པར་གསུངས་སོང་།
གསར་འགོད་པ། བསོད་ནམས་ཕུན་ཚོགས།
