གསུམ་བཅུའི་དུས་དྲན་དང་འབྲེལ་བའི་ཡིག་ཆ་རྫུན་མར་བློ་གླིང་གྲྭ་ཚང་ནས་གསལ་བཤད་གནང་།
ཕྱི་ལོ་༢༠༢༦ ཟླ་༣ ཚེས་༣ ཉིན། དཔལ་ལྡན་འབྲས་སྤུངས་མཁས་མང་བློ་གསལ་གླིང་གྲྭ་ཚང་གི་མཚན་བྱང་དང་ལས་ཤོག་རྫུན་བཟོ་བྱས་ཏེ། ལོ་འདིའི་ཕྱི་ཟླ་༣ ཚེས་༡༠ ཉིན་གྱི་གསུམ་བཅུའི་དུས་དྲན་སྐབས་མང་ཚོགས་འདུ་འཛོམས་དང་ཁྲོམ་སྐོར་སོགས་མི་བྱེད་པའི་འབོད་སྐུལ་ཞུ་ཡིག་རྫུན་མ་ཞིག་དྲ་ལམ་དུ་ཁྱབ་སྤེལ་བྱས་ཡོད་པར་བརྟེན། ཕྱི་ལོ་༢༠༢༦ ཟླ་ ༣ ཚེས་༤ ཉིན། འབྲས་སྤུངས་བློ་གསལ་གླིང་གྲྭ་ཚང་ནས་གནས་ཚུལ་དེ་ནི་དངོས་བདེན་མིན་པའི་གསལ་བཤད་ནན་པོ་གནང་འདུག
དྲ་ཐོག་ཏུ་ཁྱབ་བཞིན་པའི་ཡིག་ཆ་རྫུན་མ་དེའི་ནང་། ༧གོང་ས་མཆོག་གི་སྐུའི་གཅེན་པོ་རྒྱལ་ལོ་དོན་གྲུབ་མཆོག་དང་། གཅུང་པོ་མངའ་རིས་རིན་པོ་ཆེ་རྣམ་གཉིས་དགོངས་པ་རྫོགས་པའི་མྱ་ངན་དང་བསྟུན། ལོ་འདིའི་གསུམ་བཅུའི་དུས་དྲན་ཉིན་ཁྲོམ་བསྐོར་དང་འདུ་འཛོམས་ལས་རིམ་གང་ཡང་མི་གནང་བར་རང་ཁྱིམ་དང་དགོན་པ་ཁག་ཏུ་མཆོད་འབུལ་སྨོན་ལམ་ཁོ་ན་གནང་དགོས་པའི་འབོད་སྐུལ་བྱས་འདུག།
འབྲས་སྤུངས་བློ་གསལ་གླིང་གྲྭ་ཚང་གི་གསལ་བཤད་ནང་། བོད་མིའི་རང་དབང་སྒེར་ལང་གསུམ་བཅུའི་དུས་དྲན་ནི་ཆོལ་གསུམ་བོད་མི་སེར་སྐྱ་སྟོང་ཕྲག་དུ་མས་བོད་མི་རིགས་ཀྱི་ཆེད་དུ་རང་སྲོག་ཤོར་བའི་ཉིན་མོ་དང་། བོད་ཁམས་ཡོངས་ཀྱིས་ཆེས་མྱ་ངན་བྱེད་དགོས་པ་དང་། སྐུ་གཤེགས་རྒྱལ་གཅེས་དཔའ་བོ་བོད་མི་སེར་སྐྱ་ཕོ་མོ་ཐམས་ཅད་ཀྱི་རེ་འདུན་ལ་དྲན་གསོ་དང་། སྡུག་བསྔལ་གྱི་མིག་ཆུ་སྙིང་ལ་བུ་ག་བརྡོལ་དེ་ཕྱི་རུ་འདོན་པའི་དུས་ཚིགས་ཤིག་ཡིན་པས། གསུམ་བཅུའི་དུས་དྲན་ཉིན་འདུ་འཛོམས་དང་ཁྲོམ་སྐོར་སོགས་མི་བྱེད་པའི་འབོད་སྐུལ་ཟེར་བ་དེ། འབྲས་སྤུངས་བློ་གསལ་གླིང་གྲྭ་ཚང་ལ་མཚན་སྨད་དང་སྐུར་འདེབས་བྱེད་མཁན་འབྱུང་ཐབས་ཤིག་ཏུ་མངོན་ཞིང་ཞེས་དང་།
བློ་གསལ་གླིང་གྲྭ་ཚང་གི་ངོས་ནས་འབོད་སྐུལ་དེ་འདྲ་ཞིག་བྱེད་དབང་གཏན་ནས་མེད་པར་མ་ཟད། འབོད་སྐུལ་དེ་འདྲ་ཞིག་ཇི་ལ་ཐུགས་ཀྱང་བྱེད་མི་སྲིད་པ་ཞིག་རེད། རྒྱུ་མཚན་ནི། ཕྱི་ལོ་༡༩༥༩ ལོར་བོད་ལ་དྲག་གནོན་མི་བཟོད་པ་བྱུང་སྐབས་གདན་ས་འབྲས་སྤུངས་དང་། སེ་ར། དགའ་ལྡན་བཅས་གདན་ས་གསུམ་ནས་སེར་དམག་མང་པོ་བསྟན་སྲུང་དྭང་བླངས་དམག་གི་ནང་ལ་ཞུགས་པ་དང་། ཕྱི་ལོ་༡༩༨༧ ལོ་ནས་སླར་ཡང་བོད་ཀྱི་རྒྱལ་ས་ལྷ་སར་གདན་ས་འབྲས་སྤུངས་དང་། སེ་ར། དགའ་ལྡན། ཤུགས་གསེབ་བཙུན་དགོན་སོགས་ནས་གྲྭ་བཙུན་ཚོས་རིམ་བཞིན་འགོ་ཁྲིད་ནས་ཞི་རྒོལ་སྐད་གྲགས་ཅན་དེ་བྱུང་བ་དང་། ཕྱི་ལོ་༢༠༠༨ ལོར་མདོ་སྨད་རྔ་བ་ཁུལ་ནས་དགེ་འདུན་པ་བཀྲ་བྷེས་སྐུ་ལུས་མེ་བསྲེགས་བཏང་ནས་བཟུང་ད་ལྟའི་བར་གྲྭ་བཙུན་མང་པོས་བོད་བསྟན་སྲིད་ཀྱི་སླད་དུ་འཐབ་རྩོད་རྒྱུན་སྐྱོང་གནང་མུས་ལ། གྲྭ་ཚང་གི་ངོས་ནས་དེ་འདྲའི་འབོད་སྐུལ་ཞུ་ཡིག་ཞིག་ག་ལ་སྤེལ་སྲིད། དེ་ཙམ་མ་ཟད་གསུམ་བཅུའི་དུས་དྲན་ནི་གཞུང་འབྲེལ་གྱིས་གཏན་འབེབས་བྱས་པའི་མྱ་ངན་འདུ་འཛོམས་ཀྱི་བྱེད་སྒོ་ཞིག་དང་། ལོ་རེའི་གཞུང་འབྲེལ་ཆབ་སྲིད་ཀྱི་བསྒྲགས་གཏམ་གལ་ཆེར་སྤེལ་བའི་ཉིན་མོ་ཞིག་ཡིན་པར་ཚང་མས་ཤེས་གསལ་རེད་ཅེས་བཀོད་འདུག
གཞན་ཡང་། ཕྱི་ལོ་༢༠༢༦ ཟླ་༡ ཚེས་༢༣ ཉིན། ཆེས་མཐོའི་ཁྲིམས་ཞིབ་ཁང་གི་ལས་ཤོག་དང་མཚན་རྟགས་བཅས་རྫུན་བཟོས་བྱས་པའི་ཡིག་འཁྱམ་ཞིག་སྤྱི་ཚོགས་དྲྭ་ལག་ཁག་ཏུ་ཁྱབ་ཡོད་པ་དང་། དེ་བཞིན། ཉེ་ཆར་བོད་མིའི་སྒྲིག་འཛུགས་ཀྱི་ལས་ཤོག་རྫུན་བཟོས་བྱས་པའི་ཐོག ༧གོང་ས་མཆོག་གི་གཅེན་གཅུང་གཉིས་འདས་གྲོངས་སུ་ཕྱིན་པར་བརྟེན། ལོ་འདིའི་གསུམ་བཅུ་དུས་དྲན་གྱི་མཛད་སྒོ་ཚོགས་རྒྱུ་མིན་ཞེས་པའི་ཡིག་འཁྱམ་ཞིག་ཀྱང་སྤྱི་ཚོགས་དྲྭ་ལམ་ཁག་ཏུ་ཁྱབ་བཞིན་འདུག ལྷག་པར་དུ་སྲིད་སྤྱི་གཉིས་ཀྱི་འོས་བསྡུའི་ལས་རིམ་དང་བསྟུན། སྤྱི་ཚོགས་ནང་ཟང་ཟིང་བཟོ་བའི་གནས་ཚུལ་རྫུན་མ་འདི་རིགས་མང་དུ་འགྲོ་ཉེན་ཡོད་པས། བོད་མི་ཚང་མས་དངོས་བདེན་མིན་པའི་གནས་ཚུལ་རྫུན་མའི་རྗེས་སུ་མི་འབྲང་བར་དོ་སྣང་དང་ཡིད་གཟབ་ནན་པོ་གནང་གལ་ཆེའོ།།
གསར་འགོད་པ། བློ་བཟང་རྒྱ་མཚོ།