ཕུན་ཚོགས་སྟོབས་རྒྱལ་གྱིས་གྲངས་ཉུང་མི་རིགས་ཚོགས་ཆེན་དུ་བོད་དོན་གཏམ་བཤད།
ཕྱི་ཟླ་༡༡ ཚེས་༢༧ དང་༢༨ ཉིན། མཉམ་འབྲེལ་རྒྱལ་ཚོགས་ཀྱི་གྲངས་ཉུང་མི་རིགས་ཀྱི་ཚོགས་ཆེན་ཐེངས་༡༨ པ་དེ་ཚོགས་ཡོད་པ་དང་། ཐེངས་འདིའི་ཚོགས་ཆེན་ཐོག་ཐོ་འགོད་བྱེད་མཁན་༩༠༠ ལྷག་བྱུང་ནས་ལོ་རྒྱུས་ཀྱི་ཁྲོད་མང་ཤོས་དེ་ཆགས་ཡོད་འདུག
ཚོགས་ཆེན་གྱི་ཉིན་དང་པོར། སུད་སི་དོན་ཁང་གི་མཉམ་འབྲེལ་རྒྱལ་ཚོགས་སུ་བོད་དོན་ཞུ་གཏུག་ལས་བྱེད་ཕུན་ཚོགས་སྟོབས་རྒྱལ་གྱིས་འཛམ་གླིང་ནང་སྙན་གྲགས་ཆེ་ཤོས་གྲས་ཡིན་པའི་ནང་པའི་སློབ་གཉེར་ཁང་བླ་རུང་སྒར་གྱི་ཛ་དྲག་གི་གནས་སྟངས་གཙོ་བོ་བཟུང་ནས་གཏམ་བཤད་བྱས་ཡོད་པ་དང། གཏམ་བཤད་ཀྱི་ནང། རྒྱ་གཞུང་གིས་མི་བདེན་རྫུན་སྒྲིག་གིས་ཉེས་འཛུགས་བྱས་ཏེ། བླ་རུང་སྒར་ནས་གྲྭ་བཙུན་༡༠༠༠ ལྷག་བཙན་གྱིས་ཕྱིར་འབུད་བཏང་ཡོད་པ་དང། ས་ཁོངས་ཡོངས་རྫོགས་དམ་དྲག་དང་ལྟ་སྲུང་ནན་པོའི་འོག་གནས་ཡོད་པ་དང་། ད་ཆ་གནས་མཇལ་བ་རྣམས་ཀྱང་དེར་འགྲོ་བསྐྱོད་བྱེད་པར་བཀག་སྡོམ་བྱས་ཡོད་པ་བརྗོད་འདུག
གཉའ་གནོན་ཅན་གྱི་ཁོར་ཡུག་དེས་མི་མང་པོ་ཞིག་རེ་བ་བྲལ་བའི་གནས་སུ་བསྐྱལ་ཡོད་པ་དང། དེའི་ཁྲོད་ནས་ཡིད་སྐྱོ་ཤོས་ཀྱི་དོན་རྐྱེན་ནི་བརྩི་བཀུར་འོས་པའི་གྲྭ་ཤེར་བཟང་རྒྱ་མཚོ་ལགས་ཀྱིས་རྒྱ་གཞུང་གི་ཡུན་རིང་སུན་གཙེར་ལ་བཟོད་ཐབས་བྲལ་ཏེ། ཕྱི་ལོ་༢༠༢༥ ཟླ་༨ ཚེས་༡༨ ཉིན་རང་སྲོག་བཅད་པ་དེ་ཡིན་པ་དང་། ཁོང་གི་འདས་རྐྱེན་དེས་རྒྱ་གཞུང་གི་བརྒྱུད་རིམ་ལྡན་པའི་དྲག་གནོན་གྱིས་བོད་ཀྱི་ཆོས་བྱེད་མི་སྣ་རྣམས་ལ་སེམས་ཁམས་ཀྱི་མནར་གཅོད་དང་གནོན་ཤུགས་ཇི་ཙམ་སྤྲོད་ཀྱི་ཡོད་པ་མཚོན་ཞེས་དང་།
དེ་བཞིན། རྒྱ་ནག་གིས་བོད་ཀྱི་སྐད་ཡིག་དང་རིག་གཞུང་སློབ་གསོའི་ཐད་འཛིན་པའི་དྲག་སྤྱོད་ཀྱི་སྲིད་བྱུས་ཇེ་ཆེར་འགྲོ་བཞིན་པའི་སྐོར། ཁོང་གིས་ཉེ་ཆར་རྒྱ་གཞུང་གིས་བཏོན་པའི་དོན་ཚན་༡༦ ཅན་གྱི་བཀོད་ཁྱབ་ཅིག་གི་ནང་། རྒྱ་ནག་དམར་ཤོག་ཚོགས་པར་ངོ་རྒོལ་དུ་བརྩིས་པའི་ནང་དོན་རིགས་བཀག་སྡོམ་བྱས་ཡོད་པས། དོན་དངོས་ཐོག་བོད་ཡིག་གི་སློབ་ཁྲིད་ཟུར་དུ་ཕུད་ཡོད་པ་དང་། བྱིས་པ་རྣམས་ཀྱིས་རང་ཉིད་ཀྱི་ཕ་སྐད་སློབ་སྦྱོང་བྱེད་པའི་ཐོབ་ཐང་དེ་བརྒྱུད་རིམ་ལྡན་པའི་སྒོ་ནས་བཀག་འགོག་བྱས་ཏེ། སྐད་ཡིག་གི་ངོ་བོ་ཉམས་རྒུད་དུ་འགྲོ་བཞིན་ཡོད་པ། ཕྱི་ལོ་༢༠༢༤ ཟླ་༥ པའི་ནང་སྐད་ཡིག་སྲུང་སྐྱོབ་ཚོགས་པ་བཙུགས་པའི་ཉེས་མིང་འོག་མཁན་པོ་བསྟན་པ་དར་རྒྱས་ལགས་དང་གྲོང་མི་༢༠ འཛིན་བཟུང་བྱས་པ་དེས། བོད་མི་ཚོས་རང་ཉིད་ཀྱི་རིག་གཞུང་སྲུང་སྐྱོབ་བྱེད་ཐབས་བྱེད་སྐབས་ཉེན་ཁ་ཇི་ཙམ་ཡོད་པ་མཚོན་གྱི་ཡོད། དེ་ལས་ཀྱང་བློ་འཚབ་ཆེ་བ་ཞིག་ནི། སྡེ་དཔོན་མགོན་པོ་རྣམ་རྒྱལ་ཟླ་བ་བདུན་རིང་བཀག་ཉར་བྱས་པའི་རིང་རྨས་སྐྱོན་ཕོག་སྟེ། གློད་བཀྲོལ་བཏང་ནས་ཉིན་གསུམ་ལས་མ་འགོར་བར་གྲོངས་ཡོད། དོན་རྐྱེན་འདི་དག་གིས་ཞི་བའི་སྒོ་ནས་རིག་གཞུང་སྲུང་སྐྱོབ་བྱེད་མཁན་རྣམས་ནག་ཉེས་ཅན་དུ་བརྩི་བ་དང། སྤྱི་ཚོགས་ཁྲོད་མི་སྣར་གསོ་ཐབས་མེད་པའི་གནོད་འཚེ་གཏོང་བའི་རྣམ་པ་ཞིག་མཚོན་ཡོད་པ་བརྗོད་འདུག
དེ་བཞིན། ཆབ་སྲིད་བཙོན་པ་རྡོ་རྗེ་བཀྲ་ཤིས་ད་དུང་ཡང་ཁྲིམས་རྩོད་པ་བསྟེན་པའི་ཐོབ་ཐང་སྤྲད་མེད་པ་དེས། བོད་ནང་ལག་བསྟར་བྱེད་བཞིན་པའི་ཁྲིམས་ལུགས་མ་ལག་ནང་ཕྱི་གསལ་ནང་གསལ་དང་དྲང་བདེན་མེད་པ་མཚོན་གྱི་ཡོད། དེ་བས་ཀྱང་ཧ་ལས་པ་ཞིག་ལ། སྤྲུལ་སྐུ་ཧཱུཾ་དཀར་རྡོ་རྗེ་རིན་པོ་ཆེ་མཆོག་ཝི་ཏི་ནམ་དུ་རྒྱ་ནག་གི་ཉེན་རྟོག་པས་འཛིན་བཟུང་བྱས་ནས་རིང་པོར་མ་སོང་བར་གློ་བུར་དུ་དོགས་གཞི་ཅན་གྱི་སྒོ་ནས་དགོངས་པ་རྫོགས་པ་དེ་ཡིན་པ། ཁོང་གི་འདས་རྐྱེན་གསང་རྒྱ་བྱས་པ་དང་། བྲེལ་འཚུབ་ངང་སྐུ་ཕུང་ཞུགས་འབུལ་བྱས་པ་དེས། བོད་མི་དང་རྒྱལ་སྤྱིའི་ལྟ་ཞིབ་པ་རྣམས་ལ་བློ་འཚབ་ཆེན་པོ་བཟོས་ཡོད་པ། བྱ་སྤྱོད་འདི་དག་གིས་བོད་ཀྱི་ས་མཚམས་ལས་བརྒལ་ནའང། བོད་ཀྱི་ཆོས་ཕྱོགས་དང་སྤྱི་ཚོགས་ཀྱི་དབུ་ཁྲིད་རྣམས་ལ་ཉེན་ཁ་ཆེན་པོ་ཡོད་པ་གསལ་སྟོན་བྱེད་ཀྱི་ཡོད་ཅེས་བརྗོད་འདུག།
གསར་འགོད་པ། བློ་བཟང་རྒྱ་མཚོ།
