བོད་ཀྱི་ཆོས་དང་རིག་གཞུང་དེ་འཛམ་གླིང་འདིའི་ཁྲོམ་རའི་སྟེང་སྟོན་རྒྱུའི་དུས་ཚོད་སླེབ་འདུག
ཟླ་འདིའི་ཚེས་༡༤ ཉིན་༸གོང་ས་མཆོག་བྷེང་ལོར་ཏཱ་ལའི་བླ་མ་མཐོ་རིམ་སློབ་གཉེར་ཁང་དུ་༸ཞབས་སོར་འཁོད་དེ། མཐོ་སློབ་དབུ་འབྱེད་རབ་གནས་གནང་བ་དང་། དགེ་ལས་སློབ་མ་དང་། ཕྱི་ནང་སྐུ་མགྲོན་རྣམས་ལ་བཀའ་སློབ་གནང་ཡོད་པ་རེད།
མཛད་སྒོའི་ཐོག་མངའ་སྡེའི་ནང་སྲིད་བཀའ་བློན་དང་། མེ་སོར་གཙུག་ལག་སློབ་གཉེར་ཁང་གི་ཉེ་བའི་རིགས་བདག དེ་བཞིན་རྒྱབ་སྐྱོར་གནང་མཁན་སྦྱིན་བདག་སོགས་ཕེབས་ཡོད་པ་རེད།
༧གོང་ས་མཆོག་གི་བོད་མི་གཞོན་སྐྱེས་སློབ་མ་ཚོར་དམིགས་ནས་གསུང་དོན། ང་ཚོ་ཐོག་མར་བཙན་བྱོལ་ལ་འབྱོར་སྐབས་ང་རང་ཚོའི་ཆོས་དང་རིག་གཞུང་གཏིང་ཟབ་པོ་ ཡོད་པ་དེ་དག་སོ་སོའི་ལུང་པའི་ནང་དཀའ་ངལ་ཧ་ཅང་འཕྲད་བཞིན་ཡོད། སྐད་ཆ་དམར་པོ་བཤད་པ་ཡིན་ན་བོད་མིས་བོད་པའི་ཆོས་དང་རིག་གཞུང་ལ་ཞེན་ཆགས་བྱེད་ མཁན་ལ་ཁ་བྲལ་རིང་ལུགས་ཐོག་ཉེན་ཁར་རྩི་བཞིན་པའི་བཟོ་འདྲ་བོ་དེ་འདྲའི་གནས་སྟངས་ཤིག་ཆགས་ཡོད་སྟབས། ཕྱོགས་མང་པོ་ཞིག་ནས་ང་རང་ཚོའི་ཆོས་དང་རིག་གཞུང་དེ་དག་ཉམས་ཆག་འགྲོ་རྒྱུའི་ ཉེན་ཁ་ཏན་ཏན་ཡོད་པ་ཞིག་རེད་འདུག འོན་ཀྱང་ད་བར་གཞིས་ལུས་རྒྱ་ཆེའི་མི་མང་གི་སྙིང་སྟོབས་དང་སེམས་ཤུགས་ཁོ་ནའི་བཟུང་བ་མ་གཏོགས་གཞན་ཕྱོགས་མང་པོ་ཞིག་ནས་གནོན་ཤུགས་ཧ་ཅང་སྤྲོད་བཞིན་འདུག དེ་འདྲ་ཞིག་གི་སྟེང་བཙན་བྱོལ་ལ་འབྱོར་བ་དེ་དག་ཕྱོགས་གཅིག་ནས་རང་དབང་ལུང་ པའི་ནང་གནས་ཡོད། གཉིས་ནས་འཕགས་བོད་གཉིས་ཟེར་ནས་ལོ་རྒྱུས་ཐོག་ནས་དམིགས་བསལ་འབྲེལ་བ་ཡོད་པ་ ཞིག་ཆགས་ཡོད།ཅེས་བཀའ་སློབ་གནང་།
༧གོང་ས་མཆོག་གིས་འཕགས་བོད་འབྲེལ་སྐོར་གསུང་དོན། ངོས་ཀྱིས་ནམ་རྒྱུན་རྟག་པར་འདི་ལྟར་བཤད་ཀྱི་ཡོད། ང་ཚོ་བོད་པ་ལོ་རྒྱུས་ཐོག་དང་ནང་ཆོས་བོད་ལ་དར་བའི་རྗེས་ཀྱི་ལོ་རྒྱུས་ཐོག་ནས་མར་བཤད་པ་ཡིན་ན། ང་ཚོ་བོད་པ་ཚོ་དཔལ་ནཱ་ལེནྡྲའི་མཁས་པའི་དབང་པོ་དེ་དག་གི་རྗེས་འཇུག་ལྟ་བུ་ཆགས་ཡོད། འཕགས་བོད་གཉིས་ཀྱི་འབྲེལ་བ་ནི་ཧ་ལམ་ཆོས་དང་ལྟ་གྲུབ་ཆ་ནས་ང་ཚོ་དགེ་རྒན་དང་ དགེ་ཕྲུག་ནང་བཞིན་ཆགས་ཡོད། དེ་ལྟ་བུའི་དམིགས་བསལ་གྱི་འབྲེལ་བ་ཆགས་ཡོད་པར་བརྟེན་འཕགས་བོད་གཉིས་ཀྱི་ མིའི་བསམ་བློ་ནང་བོད་ཅེས་བརྗོད་དུས་རང་བཞིན་གྱི་སེམས་ཐག་ཉེ་བོ་ཡོང་བཞིན་འདུག མུ་སྟེགས་པ་ས་ཡ་བྱེ་བ་མང་པོས་ལྷ་ཆེན་དབང་ཕྱུག་ལ་དད་པ་བྱས་ནས་རྗེས་སུ་འབྲང་གི་ཡོད། ལྷ་ཆེན་དབང་ཕྱུག་གཏན་དུ་བཞུགས་ཡུལ་ནི་གངས་ཏེ་སེ་ཆགས་ཡོད། གངས་ཏེ་སེ་ནི་བོད་ནང་ཡོད། བོད་རྒྱ་ཆེའི་མི་མང་ནི་སངས་རྒྱས་པའི་ཆོས་བྱེད་མཁན་རེད། སངས་རྒྱས་པའི་ཆོས་བྱེད་མཁན་གྱི་སྟོན་པ་ཐུགས་རྗེ་ཅན་དང་། ལྷག་པར་དཔལ་ནཱ་ལེནྡྲའི་མཁས་པའི་དབང་པོ་དེ་དག་རྒྱ་གར་ཆགས་ཡོད། དེར་བརྟེན་གང་ལྟར་ཧིན་དུ་དུང་ཕྱུར་མང་པོ་ཞིག་གིས་སྨོན་ལམ་རྒྱག་ཡུལ་སྐྱབས་ གནས་ནི་བོད་ཀྱི་ལྷ་ལྟ་བུ་ཆགས་ཀྱི་འདུག ལྷ་ཆེན་དབང་ཕྱུག་གཙུག་ཏུ་བཞུགས་ཡུལ་གངས་ཏེ་སེ་ནི་བོད་ཀྱི་ས་ཁུལ་དུ་ཡོད་སྟབས། དེ་འདྲའི་ཐོག་ནས་དམིགས་བསལ་ཞིག་འདུག བོད་ནས་རྒྱ་གར་དུ་འབབ་པའི་ཆུ་བོ་གང་གཱ་གཙོ་བོར་གྱུར་པའི་གངས་ཏེ་སེ་དང་ འབྲེལ་བ་ཡོད་པའི་ཆུ་བོ་དེ་དག་བདུད་རྩི་ལྟ་བུ་རྩི་གི་ཡོད་པར་བརྟེན་ཧ་ཅང་གི་འབྲེལ་བ་ཟབ་མོ་རེད་འདུག་ཅེས་བཀའ་སློབ་གནང་།
༧གོང་ས་མཆོག་གིས་སྐྱབས་བཅོལ་དུ་ཡོང་བ་དང་འབྲེལ་ནས་གསུང་དོན། ངོས་རང་ཕྱི་ལོ་༡༩༥༦ ལོར་སྟོན་པ་མྱང་འདས་ནས་ལོ་ཉིས་སྟོང་ལྔ་བརྒྱ་འཁོར་བའི་དུས་ཆེན་དེར་རྒྱ་གར་དུ་ཐེངས་དང་པོ་འབྱོར་སྐབས་རྒྱ་གར་ས་ཁུལ་ཁག་འགའ་ཤས་ནང་ལྟ་སྐོར་དུ་ཕྱིན་པ་ཡིན། སྐབས་དེར་སྦེང་ལོར་དང་ཕལ་ཆེར་མེ་སོར་ལའང་སླེབས་པ་ཡོད། སྐབས་དེ་དུས་ཀྱི་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ནི་ཅི་ལིངྒ་པ་མཆོག་ཡིན། ངོས་ཀྱིས་སྐབས་དེ་དུས་ནས་སྐུ་ཞབས་དམ་པ་ཁོང་ངོ་ཤེས་ཀྱི་ཡོད། ཁོང་ནི་སྐབས་དེ་དུས་ནས་དམིགས་བསལ་ཐུགས་ཁུར་ཧ་ཅང་ཆེན་པོ་གནང་མཁན་ཞིག་ཡིན། ཕྱི་ལོ་ ༡༩༥༩ ལོར་ང་ཚོ་བོད་མི་ཁ་ཤས་ཤིག་རྒྱ་གར་དུ་བསླེབས་པ་རེད། སྐབས་དེ་དུས་རྒྱ་གར་གྱི་སྲིད་བློན་དམ་པ་ནེ་རུ་མཆོག་ལ་བོད་པ་གནས་སའི་གཞིས་ ཆགས་ཁག་གནང་སྐྱོང་ཡོང་བར་ཞུ་སྐབས་སྲིད་བློན་མཆོག་གིས་མངའ་སྡེ་ཚོར་ཕྱག་བྲིས་ ཕུལ་བའི་ནང་ནས་མེ་སོར་མངའ་སྡེས་སེམས་ཁུར་ཆེན་པོས་དང་ལེན་གནང་འདུག དེར་བརྟེན་རྒྱ་གར་ལྷོ་ཕྱོགས་ནང་བོད་མིའི་གཞིས་སྒར་ཆེ་ཤོས་རྣམས་ཚུགས་ཐུབ་པ་བྱུང་ཡོད་པ་མ་ཟད། ཆོས་སྒར་ཆེ་ཁག་ཀྱང་འདིར་འདུས་ཡོད། རྣམ་པ་ཚོས་ནི་ཅི་ལིངྒ་པའི་སེམས་ཁུར་ད་དུང་ཡིན་ནའང་འཁྱེར་བཞིན་འདུག་པར་བརྟེན་བསྔགས་བརྗོད་ཞུ་རྒྱུ་ཡིན།ཞེས་བཀའ་སློབ་གནང་།
བོད་པའི་ཆོས་དང་རིག་གཞུང་ལ་སློབ་གཉེར་དགོས་སྐོར་དང་འབྲེལ་ནས་གསུང་དོན། བོད་ནང་དཀའ་ངལ་འདི་ལྟར་འཕྲད་བཞིན་ཡོད་སྟབས། ང་ཚོ་བཙན་བྱོལ་ནང་ཡོད་པའི་བོད་པ་ཚོས་བོད་པའི་ཆོས་དང་རིག་གཞུང་། ལྟ་གྲུབ་འདི་དག་བདག་པོ་རྒྱག་རྒྱུ་ཧ་ཅང་གལ་ཆེན་པོ་རེད། རིག་གནས་ཆེ་བ་ལྔ་པོ་ནི་ང་ཚོ་བོད་པས་ད་བར་བདག་པོ་བརྒྱབ་ནས་ཉར་བ་འདི་འཛམ་ གླིང་སྤྱི་ལ་ཕན་ཐོགས་བྱེད་ཐུབ་རྒྱུའི་དུས་ཚོད་སླེབ་ཀྱི་ཡོད་པའི་བཟོ་འདྲ་ཞིག་འདུག དེར་བརྟེན་ཁྱེད་རང་ཚོ་གཞོན་སྐྱེས་དེ་དག་གང་ལྟར་ངོས་ཀྱི་མི་རབས་རྫོགས་པའི་རྗེས་སུ་ཁྱེད་རང་ཚོ་འགན་འཁྱེར་མཁན་ཆགས་ཀྱི་ཡོད། མཁྱེན་སོང་ངམ། ངོས་རང་ལོ་༨༡ སླེབས་ཡོད། ལོ་བཅུ་ཕྱིན་ན་དགུ་བཅུ་གོ་གཅིག་རེད། དེ་ནས་ལོ་ཉི་ཤུ་ཕྱིན་ན་བརྒྱ་དང་གཅིག་གི་སྟེང་སླེབ་ཀྱི་ཡོད། དེ་ནས་ཕལ་ཆེར་ཚུགས་ཀྱི་མ་རེད། ཁྱེད་རང་ཚོ་ད་དག་མུ་མཐུད་ནས་དེའི་མཇུག་འཛིན་མཁན་ཆགས་ཡོད། དེར་བརྟེན་དེ་སྔ་ང་ཚོ་བོད་ཀྱི་ཆོས་དང་རིག་གཞུང་རྩ་ཆེན་པོ་འདི་དག་བདག་པོ་བརྒྱབ་ནས་བསྡད་པ་འདི་ད་ཆ་འཛམ་གླིང་འདིའི་ཁྲོམ་རའི་སྟེང་སྟོན་རྒྱུའི་དུས་ཚོད་སླེབ་འདུག ངོས་ཀྱིས་འཛམ་གླིང་གར་སར་སྐད་ཆ་བཤད་དུས་དོ་སྣང་བྱེད་མཁན་ཧ་ཅང་ཡོང་བཞིན་འདུག འདི་ངོས་རང་མཁས་དྲགས་ནས་བྱུང་བ་གང་ཡང་མ་རེད། ང་ཚོ་བོད་ལ་དེ་ལྟ་བུའི་སློབ་སྦྱོང་གཏིང་ཟབ་པོ་ཡོད་པའི་རྒྱུ་མཚན་གྱིས་ཚན་རིག་པ་དང་མཉམ་དུ་གྲོགས་པོ་སྒྲིག་ཐུབ་ཀྱི་འདུག་ཤེས་སོང་ངམ། དད་པ་གཅིག་པུའི་ཐོག་ཕྱིན་པ་ཡིན་ན་ཚན་རིག་པ་ཟེར་དུས་ཕྲན་བུ་ཟོན་བྱེད་དགོས་པའི་བཟོ་འདྲ་ཞིག་འདུག་ཅེས་སོགས་བཀའ་སློབ་ལམ་སྟོན་གནང་ཡོད་པ་རེད།།
