བོད་གནས་ལྟ་ཞིབ་ཀྱིས་འདོན་སྤེལ་བྱས་པའི་སྙན་ཐོའི་ཐད་བགྲོ་གླེང་ཞིག་ཚོགས་སོང་།

ཟླ་འདིའི་ཕྱི་ཚེ་༩ ཉིན་མེག་གྷན་ནོར་བུ་མགྲོན་ཁང་གི་ཚོགས་ཁང་དུ་ཉེ་ཆར་བོད་གནས་ལྟ་ཞིབ་ (Tibet Watch) ཀྱིས་རྒྱ་གཞུང་གིས་ཁམས་བྲག་མགོར་དམ་དྲག་དང་ལྷག་པར་དུ་སྟོན་པའི་སྐུ་བརྙན་གཏོར་བཤིག་བཏང་བ་སོགས་ཆོས་ལུགས་ཐད་གཏོར་རྒོལ་ཛ་དྲག་བྱུང་པའི་སྐོར་གྱི་སྙན་ཐོ་ཞིག་འདོན་སྤེལ་བྱས་ཡོད་པ་དེའི་ཐོག་བགྲོ་གླེང་ཞིག་ཚོགས་གནང་སོང་།

སྐབས་དེར་བགྲོ་གླེང་གི་གཏམ་བཤད་པ་བོད་གནས་ལྟ་ཞིབ་ཁང་གི་ཉམས་ཞིབ་པ་རྒན་པ་བསྟན་འཛིན་ཆོས་སྐྱིད་ཀྱིས་སྙན་ཐོ་དང་འབྲེལ་བའི་གནས་ཚུལ་བསྡུ་ལེན་དང་གྲུབ་ཆ། སྙན་ཐོ་འདི་བཏོན་པའི་དགོས་དམིགས་སོགས་ཀྱི་ཐོག་ལ་གཏམ་གནང་བ་དང་། དེ་བཞིན་བགྲོ་གླེང་གི་གཏམ་བཤད་པར་ཁམས་བྲག་མགོ་ནས་ཡིན་པ་བྷོ་ཊི་འོད་སྣང་གིས་སྔ་ཕྱིར་བྲག་མགོར་བྱུང་དང་འབྱུང་བཞིན་པའི་རྒྱ་ནག་གཞུང་གི་དམ་དྲག་དང་བཙན་གནོན། གཏོར་སྐྱོན་སོགས་ཀྱི་ཐད་མཐོང་ཐོས་མྱོང་གསུམ་གཞི་རུ་བཟུང་པའི་གནས་སྟངས་སྐོར་གྱི་གཏམ་བཤད་གནང་བ་མ་ཟད། ཁོང་གིས་འགྲེམས་སྤེལ་བྱས་པའི་བསྒྲགས་གཏམ་གྱི་ནང་དུ་ཕྱི་ལོ་ ༢༠༠༨།༢༠༠༩།༢༠༡༢ བཅས་ལ་ཁམས་བྲག་མགོའི་ཡུལ་དུ་ཞི་བའི་ངོ་རྒོལ་སྐབས་རྒྱ་གཞུང་གིས་བོད་མི་༩ དམར་གསོད་བཏང་ཡོད་པ་དང་། ཕྱི་ལོ་༢༠༡༢ ལོར་ཁམས་བྲག་མགོར་ཞི་རྒོལ་གྱི་ལས་འགུལ་སྤེལ་བའི་སྐབས་རྒྱ་གཞུང་གིས་བོད་མི་༣༦ འཛིན་བཟུང་བཙོན་འཇུག་དང་བོད་མི་༤༥ ལ་སྨས་སྐྱོན་ཕོག་ཡོད་པ། དེ་བཞིན་ཕྱི་ལོ་༢༠༢༡ དང་༢༠༢༢ ལོར་ཁམས་བྲག་མགོར་ཞི་རྒོལ་སྐབས་འཛིན་བཟུང་བཙོན་འཇུག་བྱས་ནས་ཁྲིམས་ཐག་མ་བཅད་པར་ལུས་ཡོད་པའི་སེར་སྐྱ་༨ བཅས་ཡོད་པ་གསལ་འདུག་ལ། དེ་བཞིན་ཕྱི་ལོ་༢༠༢༡ ཟླ་༡༢ ཚེས་༡༢ ཉིན་རྒྱ་གཞུང་གིས་ཁང་པ་གཏོར་བྱེད་ཀྱི་འཕྲུལ་འཁོར་ཆེན་པོ་དག་ཁྱེར་ནས་སྐུ་བརྙན་བཞེངས་ཡོད་སའི་ཉེ་འཁོར་ཚང་མ་དྲག་དམག་གིས་སྐོར་ནས་བྲག་མགོའི་ཡུལ་གྱི་སྐྱ་སེར་ཡོངས་ཀྱིས་དགེ་སྒྲུབ་བྱེད་སའི་རྟེན་གྱི་གཙོ་གྲས་ཡིན་པའི་ཐུབ་དབང་གི་སྐུ་བརྙན་ཕྲི་ཁྲི་༩༩ ཅན་ཞིག་ཡོད་པ་དེ་དང་གཞན་ཡང་ཡུལ་དེའི་ས་ཚིགས་དུ་མར་བཞེངས་པའི་མ་ཎི་དུང་འཁོར་དང་བྲག་ལ་བརྐོས་པའི་སྐུ་བརྙན་མང་པོ་རྩ་གཏོར་བཏང་ཡོད་འདུག་ལ། ཆ་ནང་དགོན་པའི་ལྕགས་རིའི་ནང་ལ་ཡོད་པའི་གུ་རུའི་སྐུ་བརྙན་ཕི་ཁྲི་སུམ་ཅུ་ཡོད་པ་ཞིག་དང་། མདོ་མང་དགོན་པའི་གསུང་ཆོས་ར་བ་དང་གྲྭ་ཤག་མང་པོ། བྲག་མགོའི་དགོན་པའི་གཡས་ཕྱོགས་སུ་ཡོད་པའི་རྒྱལ་བ་བྱམས་པའི་སྐུ་བརྙན་སོགས་ཀྱང་རྩ་གཏོར་བཏང་ཡོད་རབས་ཀྱི་གནས་ཚུལ་འཁོད་འདུག

བོད་གནས་ལྟ་ཞིབ་ཁང་གིས་འགྲིམས་སྤེལ་བྱས་པའི་སྙན་ཐོའི་ནང་། ཁམས་བྲག་མགོ་ནས་ཡོང་མཁན་གྲྭ་པ་ཞིག་གིས་རྒྱ་ནག་གིས་ཁམས་བྲག་མགོའི་ཕྱོགས་སུ་དྲག་གནོན་དང་གཏོར་བཤིག་གཏོང་དགོས་དོན་གྱི་རྒྱུ་མཚན་དང་པོ་ནི་བོད་ཀྱི་ངོ་བོ་དང་རིག་གཞུང་རྩ་གཏོར་གཏོང་རྒྱུ་དང་། གཉིས་ནི་བོད་མི་ཚོའི་ཐོབ་ཐང་དང་རང་དབང་གི་ཐོག་ལ་དོ་སྣང་དང་སེམས་ཁུར་བྱེད་མཁན་བོད་མི་ཚོ་མེད་པ་བཟོ་རྒྱུ་དང་། གསུམ་པ་ནི་བོད་ཀྱི་སྐད་ཡིག་དང་བོད་ཀྱི་ཤེས་ཡིན་ལྟེ་གནས་དག་གཏོར་བཤིག་གཏོང་རྒྱུ་དེ་རེད་ཅེས་བརྗོད་ཡོད་པའི་གནས་ཚུལ་འཁོར་ཡོད་པ་དང་། བོད་གནས་ལྟ་ཞིབ་ཁང་གིས་འདོན་སྤེལ་བྱས་པའི་སྙན་ཐོ་དེ་ནི་ཐོག་མ་དབྱིན་ཇིའི་གྲོས་ཚོགས་སུ་དབུ་འབྱེད་བྱས་ཡོད་པ་རེད་འདུག།

གསར་འགོད་པ། བློ་བཟང་རྒྱ་མཚོ།