བྷེང་ལོར་དུ་འཕྲོད་བསྟེན་ཆེད་ལས་པའི་ལྷན་འཛོམས།

ལྷོ་ཕྱོགས་བོད་མིའི་འཕྲོད་བསྟེན་མཐུན་ཚོགས་ནི་༧གོང་ས་མཆོག་ནས་བོད་ཀྱི་སྨན་རྩིས་ཁང་དབུ་བརྙེས་ནས་ལོ་ངོ་༡༠༠ འཁོར་བའི་དུས་ཆེན་གྱི་མཛད་སྒོར། བཙན་བྱོལ་བོད་མིའི་འཕྲོད་བསྟེན་གྱི་གནས་སྟངས་དང་འབྲེལ་བའི་བཀའ་སློབ་ལམ་སྟོན་ནན་པོ་བསྩལ་བའི་དགོངས་དོན་བཞིན། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ལམ་སྟོན་འོག ལྷོ་སྤྱི་ལས་ཁུངས་ནས་འགན་ཁུར་སྣེ་འཁྲིད་ཀྱིས་སྦེང་ལོར་ཁུལ་དུ་འཕྲོད་བསྟེན་ལས་རིགས་འདྲ་མིན་ཐོག་སློབ་སྦྱོང་བྱེད་བཞིན་པའི་སློབ་ཕྲུག་ཁག་ཅིག་དང་། སྨན་ཞབས་པ་མི་ཉུང་བ་ཞིག་ལས་གྲུབ་པའི་ལྷོ་ཕྱོགས་བོད་མིའི་འཕྲོད་བསྟེན་མཐུན་ཚོགས་ཞེས་གསར་འཛུགས་ཀྱིས། ཕྱི་ལོ་༢༠༡༧ ཟླ་༨ པའི་ནང་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་གིས་ཚོགས་པ་དབུ་འབྱེད་གནང་། ཚོགས་པའི་ངོ་བོ་དང་དམིགས་ཡུལ་ལྟར་ལྷོ་ཕྱོགས་བོད་མིའི་གཞིས་ཆགས་མེ་སོར་རྫོང་ཁོངས་ལུགས་ཟུང་བསམ་གྲུབ་གླིང་། བདེ་སྐྱིད་སླར་གསོ། ཧུན་སུར་རབ་རྒྱས་གླིང་། ཀོ་ལི་གྷལ་དོན་ལྡན་གླིང་དང་། མོན་གྷོ་འདོད་རྒུ་གླིང་བཅས་སུ་ནད་རིགས་འདྲ་མིན་སྔོན་འགོག་སྐོར་སྐྱ་སེར་མང་ཚོགས་ལ་གོ་རྟོགས་གཏམ་བཤད་དང་བགྲོ་གླེང་། ཟས་བཅུད་ཚད་ལྡན་དང་ཚད་ལས་མི་བརྒལ་བ་མཆོད་རྒྱུ་རྒྱུན་དུ་ནས་དོ་སྣང་གནང་གལ་ཆེ་སྐོར་དཔར་རིགས་འགྲེམས་སྟོན་ཞུ་རྒྱུ། ས་གནས་ས་ཐོག་ཏུ་བསྐོར་བསྐྱོད་ཀྱིས་འཕྲོད་བསྟེན་ཚུལ་བཞིན་གནང་ཕྱོགས་བཅས་ཀྱི་ལས་འགུལ་སོགས་སྤེལ་གྱི་ཡོད་པ་རེད།