མོན་ཇོ་ནང་དགོན་པར་རིས་མེད་སྨོན་ལམ་ཆེན་མོ་འཚོགས་པ།
ཟླ་འདིའི་ཚེས་ ༢༥ ནས་ཉིན་གསུམ་རིང་རྒྱ་གར་མོན་ཇོ་ནང་བཀྲ་ཤིས་ཆོས་ཐང་དགོན་པར་རིས་མེད་སྨོན་ལམ་ཆེན་མོ་འཚོགས་པ་དང་། ཚོགས་མགོན་དུ་ཇོ་ནང་རྒྱལ་ཚབ་རིན་པོ་ཆེ་ཆིབས་བསྒྱུར་གནང་ཡོད་པ་རེད།
དེ་ཡང་ཚངས་དབྱངས་རྒྱ་མཚོས་གནས་ཚུལ་ངོ་སྤྲོད་གནང་བ་ལྟར་ན། རྒྱ་གར་མོན་ཇོ་ནང་བཀྲ་ཤིས་ཆོས་ཐང་དགོན་པར་སྤྲུལ་གསུང་དབྱངས་རིན་པོ་ཆེས་གོ་སྒྲིག་འོག་རིས་མེད་སྨོན་ལམ་ཆེན་མོ་ཐེངས་དང་པོ་འཚོགས་དང་། སྨོན་ལམ་ཆེན་མོར་ཆོས་ལུགས་རིས་མེད་ཀྱི་བླ་སྤྲུལ་མཁན་གསུམ་དང་། གྲྭ་བཙུན་སྔགས་གསུམ་བཅས་ཁྱོན་༡༥༠ ཙམ། མོན་རྡེ་རིང་ར་མ་གེམ་གྱི་ཡུལ་མི་༡༥༠༠ ལྷག་འདུ་འཛོམས་བྱུང་ཡོད་པ་རེད།
སྨོན་ལམ་འདི་ལྟ་བུ་ཞིག་འཚོགས་དགོས་པའི་དམིགས་ཡུལ་སྐོར་གོ་སྒྲིག་ཚོགས་ཆུང་གི་ངོས་ནས་གསལ་བསྒྲགས་སྤེལ་དོན། འཛམ་གླིང་ཡོངས་ལ་དུས་མིན་གྱི་ནད་རིམས་འཁྲུག་རྩོད་ཉེ་བར་ཞི་བ་དང་། ལྷག་པར་དུ་ཡངས་པའི་འཇིག་རྟེན་འདིར་འཕྲལ་ཕུགས་གཏན་བདེའི་ལམ་བཟང་ཉེ་བར་སྟོན་པའི་འཛམ་གླིང་ཞི་བདེའི་དེད་དཔོན་༸གོང་ས་ལྷ་མིའི་རྣམ་འདྲེན་༸རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་གི་གཙོས། རིས་སུ་མ་ཆད་པའི་བསྟན་འཛིན་གྱི་སྐྱེས་བུ་དམ་པ་རྣམས་ཀྱི་སྐུ་ཚེ་བསྐལ་བརྒྱར་བརྟན་ཞིང་མཛད་འཕྲིན་རྒྱས་ཆེད་དུ་ཡིན་འདུག
སྨོན་ལམ་སྐབས་ཇོ་ནང་བའི་ཆོས་བརྒྱུད་འཛིན་མཁན་གྱི་བླ་སྤྲུལ་མཁན་གསུམ་གྱི་གཙོས་རིས་མེད་གྲྭ་བཙུན་སྔགས་གསུམ་ ༡༥༠ ཙམ་ལ་བསྙེན་བཀུར་གནང་ཡོད་པ་དང་། སྐབས་དེའི་ཞལ་འདོན་ལ། དཀོན་མཆོག་གསུམ་རྗེས་སུ་དྲན་པའི་མདོ་དང༌། ཤེས་རབ་ཀྱི་ཕ་རོལ་དུ་ཕྱིན་པའི་སྙིང་པོ། དཔལ་ཇོ་ནང་བའི་ལུགས་ཀྱི་ཟབ་ལམ་རྡོ་རྗེའི་རྣལ་འབྱོར་གྱི་སྔོན་འགྲོ། བླ་མ་མཆོད་པ། འཇམ་དཔལ་མཚན་བརྗོད་དང་། བཟང་སྤྱོད་སྨོན་ལམ། མཇུག་ཏུ་རིས་མེད་བསྟན་རྒྱས་སྨོན་ལམ་དང་། དཔལ་ཇོ་ནང་བའི་སྨོན་ལམ་རྒྱལ་བ་རྒྱ་མཚོ་དང་དུས་འཁོར་སྨོན་ལམ། ༸གོང་ས་ལྷ་མིའི་རྣམ་འདྲེན་༸རྒྱལ་དབང་ཐམས་ཅད་མཁྱེན་པའི་ཞལ་གསུང་བྱིན་རླབས་ཅན་ཇོ་ནང་བསྟན་པ་རྒྱས་པའི་སྨོན་ལམ་སོགས་བཏོད་ཡོད་འདུག
སྨོན་ལམ་ཉིན་གསུམ་པའི་ཉིན་རྒྱབ་དུ་དཔལ་དུས་ཀྱི་འཁོར་ལའི་བླ་མ་མཆོད་པའི་སྒོ་ནས་ཚོགས་མཆོད་རྒྱས་པ་དང་། ཇོ་ནང་རྒྱལ་ཚབ་རིན་པོ་ཆེ་མཆོག་གིས་མང་ཚོགས་ལ་ནང་ཆོས་ངོ་སྤྲོད་དང་། སྨན་བླའི་མདོ་ཆོག་གི་སྒོ་ནས་ཚེ་དབང་གནང་གྲུབ་རྗེས་ཐེངས་དང་པོའི་མོན་ཇོ་ནང་དགོན་པའི་རིས་མེད་སྨོན་ལམ་ཆེན་མོ་མཇུག་ལེགས་པར་གྲུབ་ཡོད་འདུག །
གསར་འགོད་པ་ཆོས་ཉིད་འོད་ཟེར།