རྒྱ་གཞུང་གིས་༧པཎ་ཆེན་རིན་པོ་ཆེ་ཕྱག་ལས་གནང་བཞིན་ཡོད་སྐོར་བརྗོད་འདུག
ཟླ་༥ པའི་ཚེས་༡༩ ཉིན་རྒྱ་ནག་གི་ཕྱི་འབྲེལ་མགྲིན་ཚབ་པས། ༧པན་ཆེན་དགེ་འདུན་ཆོས་ཀྱི་ཉི་མ་རིན་པོ་ཆེ་མཐོ་སློབ་མཐོན་ནས་ད་ལྟའི་ཆར་ཕྱག་ལས་གནང་བཞིན་ཡོད་སྐོར་བརྗོད་འདུག འོན་ཀྱང་དེ་ལས་ལྷག་པའི་གནས་ཚུལ་གང་ཡང་གསལ་བཤད་བྱས་མེད་པ་རེད་འདུག
འདི་ལོར་རྒྱ་ནག་གཞུང་གིས་༧པན་ཆེན་རིན་པོ་ཆེ་བཙན་ཁྲིད་བྱས་ནས་ལོ་ངོ་༢༥ འཁོར་གྱི་ཡོད་པས། བོད་མིའི་སྒྲིག་འཛུགས་དང་གཞུང་འབྲེལ་མིན་པའི་ཚོགས་པ་ཁག བོད་དོན་རྒྱབ་སྐྱོར་བ་སོགས་ཀྱིས་ལས་འགུལ་མང་པོ་ཞིག་སྤེལ་མུས་ཡིན་ཁར། ཁོང་གློད་གྲོལ་གཏོང་དགོས་པའི་དགོས་འདུན་ཤུགས་ཆེན་བཏོན་ཡོད་པ་རེད། དེ་བཞིན་ཚེས་༡༨ ཉིན་ཨ་རིའི་ཕྱི་སྲིད་དྲུང་ཆེ་མེག་པོམ་པཱེ་ཡིས་ཀུན་གཟིགས་པཎ་ཆེན་རིན་པོ་ཆེ་མཆོག་གང་དུ་བཞུགས་ཡོད་མེད་དང་གནས་སྟངས་ཇི་ཡིན་འཛམ་གླིང་མི་མང་ལ་གསལ་བཤད་མཐིལ་ཕྱིན་པ་ཞིག་གནང་དགོས་པའི་རེ་འདུན་ཤུགས་ཆེ་བཏོན་པ་དང་སྦྲགས། རྒྱ་ནག་གཞུང་གིས་བོད་མིའི་ཐུན་མིན་ཆོས་དང་སྐད་ཡིག ཡུལ་གོམས་གཤིས་ལུགས་རྩ་མེད་བཟོ་རྒྱུའི་ལས་འགུལ་མུ་མཐུད་སྤེལ་བཞིན་པ་དེར་ཨ་རིའི་གཞུང་ལ་སེམས་འཚབ་ཆེན་པོ་ཡོད་པ་གསལ་འདོན་བྱས་ཡོད་པ་རེད།
ཚེས་༡༩ ཉིན་རྒྱ་ནག་གི་ཕྱི་སྲིད་མགྲིན་ཚབ་པར་གསར་འགོད་པ་ཞིག་གིས། ཨ་རིའི་ཕྱི་སྲིད་དྲུང་ཆེས་༧པཎ་ཆེན་རིན་པོ་ཆེའི་ཐོག་སྤེལ་བསྒྲགས་གཏམ་ཐོག་དྲི་བ་དྲིས་པར་ལན་དུ། ༧པཎ་ཆེན་རིན་པོ་ཆེ་ལ་རིན་མེད་ཀྱི་དགོས་ངེས་ཤེས་ཡོན་ཐོབ་ཡོད་པ་དང་། མཐོ་སློབ་ཐོན་ནས་ད་ལྟ་ཕྱག་ལས་གནང་བཞིན་ཡོད་སྐོར་ལན་འདེབས་བྱས་ཡོད་འདུག
ད་ལྟའི་ཆར་རྒྱ་ནག་གཞུང་གིས་༧པཎ་ཆེན་རིན་པོ་ཆེའི་གནས་སྟངས་ཐོག་སྐད་ཆ་ཏོག་ཙམ་བཤད་པ་དག་མ་གཏོགས། སྐད་ཆ་དེ་དག་དངོས་ཡོད་ཡིན་མིན་ར་སྤྲོད་བྱེད་ཐབས་མེད་ཁར། ཁོང་སྐུ་འཚོ་བཞུགས་ཡིན་མིན་གྱི་གནས་ཚུལ་ཙམ་ཡང་གསལ་པོ་ཤེས་ཐུབ་ཀྱི་མེད་པ་རེད།།
གསར་འགོད་པ་སྐལ་བཟང་དོན་གྲུབ།
