རྒྱ་ནག་གཞུང་གི་གནོན་ཤུགས་འོག་འགུལ་གཟུགས་གློག་བརྙན་ཞིག་སྟོན་མ་ཐུབ་པ།
རྒྱ་གཞུང་གི་གནོན་ཤུགས་འོག་རྒྱ་ནག་ནས་བཟོ་སྐྲུན་བྱས་པའི་འགུལ་གཟུགས་གློག་བརྙན་རྨད་དུ་བྱུང་བ་ཞིག་རྒྱལ་སྤྱིའི་ཕུལ་བྱུང་འགུལ་གཟུགས་གློག་བརྙན་དུས་སྟོན་ཐོག་སྟོན་མ་ཐུབ་པ་ཆགས་ཡོད་འདུག
ཟླ་འདིའི་ཕྱི་ཚེས་༡༤ ཉིན་སྦི་སྦི་སི་གསར་ཁང་གིས་གནས་ཚུལ་སྤེལ་གསལ་ལྟར་ན། ཧྥ་རན་སིའི་གྲོང་ཁྱེར་ཨེན་སི་རྒྱལ་སྤྱིའི་འགུལ་གཟུགས་གློག་བརྙན་དུས་སྟོན་ཐོག རྒྱ་ནག་ནས་བཟོ་སྐྲུན་བྱས་པའི་འགུལ་གཟུགས་གློག་བརྙན་ཉི་མ་སྐྱིད་པོ་ཡོང་བར་ཤོག་(Have A Nice Day) ཅེས་པ་དེ་སྟོན་འཆར་བྱས་ཡོད་ཀྱང་། དེར་རྒྱ་ནག་གཞུང་གི་གནོན་ཤུགས་བྱུང་ནས་གློག་བརྙན་དུས་སྟོན་དེ་ནས་ཕྱིར་འཐེན་བྱེད་དགོས་ཁེལ་ཡོད་འདུག
དེ་ཡང་འགུལ་གཟུགས་གློག་བརྙན་དེ་ཕྱིར་འཐེན་བྱེད་དགོས་ཁེལ་བའི་གནད་དོན་གྱི་ཐོག ཨེན་སི་རྒྱལ་སྤྱིའི་འགུལ་གཟུགས་གློག་བརྙན་དུས་སྟོན་གྱི་གོ་སྒྲིག་པ་ཕེ་ཊིག་ཨེ་ཝི་ནོ་ཞེས་པས། འགུལ་གཟུགས་གློག་བརྙན་དེ་ད་ཐེངས་ཀྱི་འགུལ་གཟུགས་གློག་བརྙན་དུས་སྟོན་ཐོག་བསྟན་ཚེ་བཟོ་སྐྲུན་བྱེད་མཁན་གྱི་རུ་ཁག་དེར་ཉེན་ཁ་ཡོད་པ་དང་། བཟོ་སྐྲུན་རུ་ཁག་ཉེན་གནས་སུ་བསྐྱལ་རྒྱུའི་ཐོབ་ཐང་ཁོང་ཚོར་མེད་སྐོར་བརྗོད་ཡོད་འདུག དེ་བཞིན་གློག་བརྙན་བཟོ་སྐྲུན་གྱི་སྦྱིན་བདག་ཡཱང་ཆེན་ཞེས་པས་སྦི་སྦི་སི་གསར་ཁང་ལ། འགུལ་གཟུགས་གློག་བརྙན་དེ་ནི་མི་མང་གི་མངོན་འདོད་དང་། ལས་དབང་གི་སྐོར་ཡིན་ལ། དེར་རྒྱ་ནག་གི་གློག་བརྙན་བཟོ་གྲྭ་ཚོ་ངེས་པར་དུ་སྤོབས་པ་སྐྱེ་དགོས་པ་ཡིན་པ་དང་། དེ་ཆབ་སྲིད་དང་འབྲེལ་བ་གཏན་ནས་མེད་སྐོར་བརྗོད་པ་མ་ཟད། ཁོ་རང་གི་རུ་ཁག་གིས་འགུལ་གཟུགས་གློག་བརྙན་དེ་ཕྱིར་འཐེན་བྱེད་རོགས་ཞེས་ཨེན་སི་གློག་བརྙན་གོ་སྒྲིག་པར་བརྗོད་པ་ཡིན་སྐོར་བརྗོད་ཡོད་འདུག
ཧྥ་རན་སི་རུ་འགུལ་གཟུགས་གློག་བརྙན་དེ་སྟོན་རྒྱུར་རྒྱ་གཞུང་གིས་གནོན་ཤུགས་སྤྲོད་ཀྱི་ཡོད་མེད་ལ་མ་ལྟོས་པར། ཡཱང་ཆེན་གྱིས་རྒྱ་ནག་གི་ལྟད་མོ་བ་ཚོས་ལོ་འདིར་རྒྱ་ནག་གི་གློག་བརྙན་ཁང་ནས་ལྟད་མོ་དེ་མཐོང་ཐུབ་པའི་རེ་བ་ཡོད་སྐོར་བརྗོད་ཡོད་འདུག
ཉེ་ཆར་ནས་བཟུང་རྒྱ་ནག་གཞུང་གིས་རྒྱ་ནག་གི་གློག་བརྙན་རྣམས་ཕྱིའི་རྒྱལ་ཁབ་ཁག་ནང་སྟོན་རྒྱུར་དོ་དམ་ནན་པོ་བྱེད་ཀྱི་ཡོད་ཁར། རྒྱ་ནག་གི་གློག་བརྙན་ག་འདྲ་ཞིག་ཡིན་རུང་རྒྱལ་སྤྱིའི་གློག་བརྙན་དུས་སྟོན་ཞིག་གི་ཐོག་སྟོན་པར། རྒྱ་ནག་གཞུང་གི་ཆོག་མཆན་ངེས་པར་དུ་ཡོད་དགོས་པ་དང་། འགུལ་གཟུགས་གློག་བརྙན་དེ་རྒྱལ་སྤྱིའི་ཐོག་སྟོན་རྒྱུར་རྒྱ་ནག་གཞུང་འབྲེལ་གྱི་ཆོག་མཆན་མེད་སྐོར་ཡང་གྲགས་བཞིན་ཡོད་འདུག
ཡང་ཨེན་སི་རྒྱལ་སྤྱིའི་འགུལ་གཟུགས་གློག་བརྙན་དུས་སྟོན་གོ་སྒྲིག་པ་རྣམས་ཀྱིས་ཉི་མ་སྐྱིད་པོ་ཡོང་བར་ཤོག་ཅེས་པའི་འགུལ་གཟུགས་གློག་བརྙན་དེ་ཕྱིར་འཐེན་བྱེད་རྒྱུ་ནི། ཁོང་ཚོར་བཙན་བཀའ་བཏང་ནས་བྱུང་བ་ཞིག་ཡིན་སྐོར་དང་། གཞུང་གི་གནོན་ཤུགས་ལ་བརྟེན་ནས་རྨད་དུ་བྱུང་བའི་གློག་བརྙན་དེ་འདི་ལོའི་དུས་སྟོན་ཐོག་སྟོན་མ་ཐུབ་པར་བློ་ཕམ་བྱུང་སྐོར། དེ་བཞིན་གང་མགྱོགས་རྒྱལ་སྤྱིའི་ལྟད་མོ་བ་ཚོས་འགུལ་གཟུགས་གློག་བརྙན་དེ་བལྟ་ཐུབ་པ་ཡོང་རྒྱུའི་རེ་བ་བྱེད་ཀྱི་ཡོད་སྐོར་བཅས་བརྗོད་ཡོད་འདུག །
གསར་འགོད་པ་བཀྲ་ཤིས་དོན་གྲུབ།
