རྒྱ་ནག་གི་ཆབ་སྲིད་སློབ་སྟོན་ཚོགས་ཆུང་ནས་དམག་སྤྱི་ཟུར་པ་མཐོ་ཤོས་གསུམ་ཕྱིར་ཕུད་བཏང་འདུག
སང་ཉིན་ཚེས་༤ ཉིན་རྒྱ་ནག་རྒྱལ་ཡོངས་མི་དམངས་འཐུས་མི་ཚོགས་ཆེན་དང་སྲིད་གྲོས་ཚོགས་ཆེན་གཉིས་ཞེས་པ་འཚོག་རྒྱུ་ཡིན་འདུག་པ་དང་། ཁ་སང་གཟའ་ཟླ་བའི་ཉིན་རྒྱ་ནག་གཞུང་འབྲེལ་གསར་ཁང་གིས་གནས་ཚུལ་སྤེལ་དོན་ལ། རྒྱལ་ཁབ་ཀྱི་ཆབ་སྲིད་སློབ་སྟོན་ཚོགས་ཆུང་ནས་དམག་སྤྱི་ཟུར་པ་མཐོ་ཤོས་གསུམ་ཕྱིར་ཕུད་བཏང་ཡོད་པ་བརྗོད་འདུག
ཕྱི་ལོ་༢༠༢༦ ཟླ་༣ ཚེས་༣ ཉིན་བྷི་བྷི་སི་གསར་ཁང་གིས་གནས་ཚུལ་སྤེལ་དོན་ལ། ཁ་སང་རྒྱ་ནག་གཞུང་འབྲེལ་གྱི་བརྒྱུད་ལམ་ཁག་ནས་གནས་ཚུལ་སྤེལ་དོན་ལ། སང་ཉིན་རྒྱ་ནག་གི་སྲིད་གྲོས་དང་རྒྱལ་ཡོངས་མི་དམངས་འཐུས་མི་༣༠༠༠ ཙམ་ཚང་འཛོམས་ཐོག་ལོ་རེ་ཚོགས་འདུ་དེ་མ་འཚོགས་སྔོན་རྒྱ་ནག་གཞུང་གིས་བཅིངས་འགྲོལ་དམག་གི་སྐམ་དམག་སྤྱི་ཁྱབ་བཀོད་འདོམས་པ་ཟུར་པ་གཙོས་པའི་དམག་དཔོན་ཟུར་པ་གསུམ་རྒྱ་ནག་གི་ཆབ་སྲིད་སློབ་སྟོན་ཚོགས་ཆུང་ནས་ཕྱིར་ཕུད་བཏང་ཡོད་འདུག་ཅིང་། དམག་སྤྱི་ཟུར་པ་དེ་དག་ནི་ཧན་ཝེ་གོ(Han Weiguo)དང་། ཀའོ་ཅིན་(Gao Jin) ལིའུ་ལེ་(Liu Lei)བཅས་གསུམ་པོ་ཡིན་འདུག
དམག་སྤྱི་ཟུར་པ་དེ་དག་ཕྱིར་འཕུད་གཏོང་རྒྱུའི་ཐག་གཅོད་དེ་རྒྱ་ནག་རྒྱལ་ཡོངས་སྲིད་གྲོས་(CPPCC)ཀྱིས་འོས་ཤོག་འཕངས་ཏེ་ཐག་བཅད་ཡོད་པ་བརྗོད་ཡོད་འདུག
དཔོན་རིགས་དེ་དག་གནས་དབྱུང་བཏང་བའི་རྒྱུ་མཚན་ཐད་གཞུང་ཕྱོགས་ནས་འགྲེལ་བཤད་གང་ཡང་བརྒྱབ་མེད་ཀྱང་། དེ་ནི་ཉེ་བའི་བདུན་ཕྲག་ཁ་ཤས་ནང་རྒྱ་ནག་དམག་དཔུང་གི་དཔོན་རིགས་མཐོ་གྲས་ཚོར་དག་ཐེར་དང་གནས་དབྱུང་གཏོང་བའི་ལས་འགུལ་ཤུགས་ཆེ་རུ་ཕྱིན་བཞིན་པའི་སྐབས་དང་བསྟུན་ནས་བྱུང་བ་ཞིག་ཡིན་འདུག
རྒྱ་ནག་གི་འགོ་ཁྲིད་ཞི་ཅིན་ཕིང་གིས་ཕྱི་ལོ་༢༠༡༢ ལོར་སྲིད་དབང་བཟུང་བ་ནས་བཟུང་། རྒྱལ་ཁབ་ཡོངས་ལ་ཁྱབ་པའི་ལྐོག་ཟ་རུལ་སུངས་ལ་རྒོལ་རྡུང་གི་ལས་འགུལ་ཞིག་སྤེལ་བཞིན་ཡོད་ཚུལ་བརྗོད་ཀྱི་ཡོད་ཀྱང་། སྐྱོན་བརྗོད་བྱེད་མཁན་ཚོས་ཁོང་གིས་ལས་འགུལ་དེའི་བརྒྱུད་ནས་རང་གི་སྲིད་དོན་གྱི་ཁ་གཏད་པ་རྣམས་རྩ་མེད་གཏོང་ཐབས་བྱེད་པའི་ལག་ཆ་ལྟ་བུར་སྤྱོད་ཀྱི་ཡོད་པའི་ལྟ་ཚུལ་འཛིན་གྱི་ཡོད་འདུག
ཁྲིམས་བཟོའི་དབང་ཆ་མེད་པའི་ཆབ་སྲིད་སློབ་སྟོན་ལས་ཁུངས་རྒྱ་ནག་མི་དམངས་སྲིད་གྲོས་དང་། དབང་ཚད་མེད་པའི་ཁྲིམས་བཟོ་ལྷན་ཁང་སྟེ་རྒྱལ་ཡོངས་མི་དམངས་འཐུས་མི་ཚོགས་ཆེན་གྱི་འཐུས་མི་༣༠༠༠ ཙམ་གཟའ་འཁོར་འདིར་པེ་ཅིང་དུ་ལོ་རེའི་ཚོགས་འདུ་གཉིས་ལ་འཛོམས་རྒྱུ་ཡིན་པ་དང་། ཚོགས་འདུ་དེ་དག་སང་ཉིན་ནས་འགོ་བཙུགས་ཏེ་གཟའ་འཁོར་གཅིག་ཙམ་གྱི་རིང་འཚོག་རྒྱུ་ཡིན་འདུག
སྲིད་གྲོས་དང་རྒྱལ་ཡོངས་མི་དམངས་འཐུས་མི་རྣམས་ཀྱིས་ནམ་རྒྱུན་རང་ཉིད་ཀྱི་ལོ་ལྔའི་ལས་ཡུན་གཙང་མར་སྐྱེལ་གྱི་ཡོད་པ་དང་། ད་ལྟའི་ལས་ཡུན་དེ་དག་ཕྱི་ལོ་༢༠༢༨ ལོའི་ཟླ་༣ པར་མཇུག་སྒྲིལ་རྒྱུ་ཡིན་པས། ད་ལྟ་ལས་ཡུན་དཀྱིལ་ནས་གནས་དབྱུང་བཏང་བ་དེ་ནི་རྒྱུན་ལྡན་མ་ཡིན་པ་ཞིག་ཡིན་པ་བརྗོད་འདུག
དམག་དཔོན་ཟུར་པ་གསུམ་པོ་དེའི་ཐོག་ཏུ། སྲིད་གྲོས་ཀྱི་ཚོགས་མི་གཞན་འགའ་ཤས་ཀྱང་གཞུང་འབྲེལ་གྱིས་ཕྱིར་ཕུད་བཏང་ཡོད་འདུག་པ་དང་། དེའི་ནང་ལྐོག་ཟ་རུལ་སུངས་ཀྱི་ཉེས་པའི་འོག་ཞིབ་བཤེར་བྱེད་བཞིན་པའི་རྒྱལ་སྲུང་བཟོ་ལས་ཀྱི་དཔོན་རིགས་མཐོ་གྲས་ཀྲང་ཁེ་ཅན་(Zhang Kejian)ཟེར་བ་ཡང་ཡོད་པ་བརྗོད་འདུག
གཟའ་ཟླ་བའི་ཉིན་ཕྱིར་ཕུད་བཏང་བ་དེ་དག་ནི་དཔོན་རིགས་མཐོ་གྲས་རིམ་པས་གནས་དབྱུང་བཏང་བའི་རྗེས་སུ་བྱུང་བ་ཞིག་ཡིན་འདུག འདས་པའི་གཟའ་ཕུར་བུའི་ཉིན་གཞུང་ཕྱོགས་ནས་དམག་དོན་མི་སྣ་༩ ཚུད་པའི་དཔོན་རིགས་༡༩ གནས་དབྱུང་བཏང་བ་བསྒྲགས།
ཕྱི་ཟླ་དང་པོའི་ནང་། རྒྱ་ནག་གི་དམག་དོན་དཔོན་རིགས་མཐོ་ཤོས་ཀྲང་ཡིའུ་ཞ་(Zhang Youxia)དང་ཁོང་གི་གྲོགས་པོ་ལིའུ་ཀྲེན་ལི་(Liu Zhenli)གཉིས་གོ་གནས་ནས་ཕབ་ཡོད་འདུག དམག་དཔོན་དེ་གཉིས་ཀྱིས་སྒྲིག་ཁྲིམས་ཚབས་ཆེན་འགལ་ཡོད་པར་བརྟེན། ཞིབ་བཤེར་བྱེད་བཞིན་ཡོད་པ་རྒྱ་ནག་རྒྱལ་སྲུང་ལྷན་ཁང་གིས་བཤད་ཡོད་འདུག
གསར་འགོད་པ། བསོད་ནམས་ཕུན་ཚོགས།