རྡོར་གདན་སྔ་འགྱུར་རྙིང་མའི་ཆོས་སྒར་གྱི་པདྨ་སམ་བྷ་ཝ་གཙུག་ཁང་ཆེན་པོ་དབུ་འབྱེད།
ཕྱི་ལོ་༢༠༢༦ ཟླ་༡ ཚེས་༢༣ བོད་ཤིང་སྦྲུལ་ཟླ་༡༢ ཚེས་༥ ཉིན། སྔ་འགྱུར་རྡོར་གདན་སྨོན་ལམ་ཆེན་མོ་ཐེངས་༣༧ པ་བོད་ཟླ་༡༢ ཚེས་༡ ནས་༡༠ བར་ཚོགས་བཞིན་པ་དང་སྟབས་བསྟུན་སྔ་འགྱུར་རྒྱལ་ཡོངས་རྡོར་གདན་སྨོན་ལམ་ཆེན་མོའི་ཚོགས་ཆེན་གྱིས་གནས་མཆོག་རྡོ་རྗེ་གདན་གྱི་རྙིང་མ་ཆོས་སྒར་དུ་གསར་བཞེངས་གནང་བའི་པདྨ་སམ་བྷ་ཝ་གཙུག་ལག་ཁང་ཆེན་མོ་ཐོག་བརྩེགས་གསུམ་ཅན་དེ་ཉིད་དབུ་འབྱེད་གནང་སོང་།
དེ་ཡང་ཞོགས་པ་ཆུ་ཚོད་༡༠ པའི་ཐོག་རབ་བྱུང་ངུར་སྨྲིག་གི་སྡེ་རྣམས་གཙུག་ལག་ཁང་གི་འོག་ཤོད་དུས་གསུམ་སངས་རྒྱས་ལྷ་ཁང་དུ་འཚོགས་པ་དང། གོས་དཀར་ལྕང་ལོའི་སྡེ་རྣམས་བར་ཐོག་མཁན་སློབ་ཆོས་གསུམ་ལྷ་ཁང་དུ་འཚོགས། བཙུན་མ་རྣམས་ལ་སུམ་ཐོག་ཐུགས་རྗེ་ཆེན་པོ་འོད་དཔག་མེད་ཀྱི་ལྷ་ཁང་དུ་འཚོགས་ནས་གསོལ་འདེབས་བསམ་པ་ལྷུན་གྲུབ་བསྡུས་པ་དུས་གསུམ་སངས་རྒྱས་གུ་རུ་རིན་པོ་ཆེ་གསོག་གནང་སོང་།
མཛད་སྒོ་དེའི་ཐོག་སྐུ་མགྲོན་གཙོ་བོ་གཙོ་བོ་བྷི་ཧར་མངའ་སྡེའི་སྲིད་སྐྱོང་སྐུ་ཞབས་ཨཱ་རི ཕ་མོ་ཧམ་ མད་ཁན་(Arif Moharmmad Khan) ཕེབས་འདུག་པ་དང་། སྔ་འགྱུར་རྙིང་མ་པའི་རྡོར་གདན་སྨོན་ལམ་ཆེན་མོའི་ཚོགས་གཙོ་དང་ཚོགས་གཞོན་རྣམ་པ་སོགས་སྐྱབས་རྗེ་བླ་ཆེན་རྣམ་པས་དབུས་བླ་སྤྲུལ་མཁན་གསུམ་དང་། འབྲུག་གཞུང་གི་ནང་སྲིད་བློན་པོ་མི་རྗེ་ཚེ་རིང་། འབྲས་ལྗོངས་དགོན་གནས་ལས་ཁུངས་ཀྱི་བློན་ཆེན་སྐུ་ཞབས་བསོད་ནམས་བླ་མ། བལ་ཡུལ་གྱི་སྐུ་ཚབ་བལ་ཡུལ་གྲོས་ཚོགས་ཀྱི་འཐུས་མི་ཟུར་པ་སྐུ་ཞབས་གཟི་པ་ཚེ་རིང་། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་སོགས་སྤྱི་འཐུས་ཁག་ཅིག་དང་། ཆོས་རིག་དྲུང་ཆེ་བདུད་འདུལ་རྡོ་རྗེ་སོགས་སྐུ་མགྲོན་རྣམ་པ་དང་སེར་སྐྱ་མི་མང་ཆིག་ཁྲི་ལྔ་སྟོང་ཙམ་ཕེབས་འདུག
ཆུ་ཚོད་༡༡།༤༣ ཐོག་སྐུ་མགྲོན་གཙོ་བོ་དང་། དམིགས་གསལ་སྐུ་མགྲོན་རྣམ་པས་སྣང་གསལ་མར་མེ་སྒྲོན་འབུལ་ཞུས་རྗེས། སྔ་འགྱུར་རྡོར་གདན་སྨོན་ལམ་ཆེན་མོའི་ཚོགས་གཞོན་༧སྐྱབས་རྗེ་སྨིན་གླིང་མཁན་ཆེན་རིན་པོ་ཆེས་ཕེབས་བསུའི་གསུང་བཤད་གནང་། སྔ་འགྱུར་རྡོར་གདན་སྨོན་ལམ་ཆེན་མོའི་ཚོགས་གཙོ་༧སྐྱབས་རྗེ་ཞེ་ཆེན་རབ་འབྱམས་རིན་པོ་ཆེས་མཛད་སྒོ་དང་འབྲེལ་བའི་གསུང་བཤད་གནང་བ་དང་། རིམ་བཞིན་བལ་ཡུལ་གྱི་སྐུ་ཚབ་བལ་ཡུལ་གྲོས་ཚོགས་ཀྱི་འཐུས་མི་ཟུར་པ་སྐུ་ཞབས་གཟི་པ་ཚེ་རིང་། འབྲས་ལྗོངས་དགོན་གནས་ལས་ཁུངས་ཀྱི་བློན་ཆེན་སྐུ་ཞབས་བསོད་ནམས་བླ་མ། དཔལ་ལྡན་འབྲུག་གཞུང་གི་ནང་སྲིད་བློན་པོ་མི་རྗེ་ཚེ་རིང་བཅས་ནས་གསུང་བཤད་གནང་རྗེས། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་གྱིས་༧གོང་ས་༧སྐྱབས་མགོན་ཆེན་པོ་མཆོག་གིས་བསྩལ་བའི་གསུང་འཕྲིན་སྒྲོག་སྦྱངས་གནང་བ་དང་། སྐུ་མགྲོན་གཙོ་བོ་བྷི་ཧར་མངའ་སྡེའི་སྲིད་སྐྱོང་སྐུ་ཞབས་ཨཱ་རིཕ་མོ་ཧམ་མད་ཁན་(Arif Moharmmad Khan) གྱིས་གསུང་བཤད་གནང་རྗེས། སྔ་འགྱུར་རྙིང་མའི་སྨོན་ལམ་ཆེན་མོའི་ཚོགས་གཙོ་ཟུར་པ་༧སྐྱབས་རྗེ་མཁོ་ཁྱིམ་རིན་པོ་ཆེ་དང། ཚོགས་གཙོ་ཟུར་པ་༧སྐྱབས་རྗེ་རི་མགོ་སྤྲུལ་སྐུ་རིན་པོ་ཆེ། དངུལ་གཉེར་ཟུར་པ་ཨཱ་ཙཱརྱ་གྲགས་པ་བླ་མ་དང། དངུལ་གཉེར་ཟུར་པ་མཁན་པོ་བསོད་ནམས་ཕུར་བུ་ནེ་གི། སྔ་འགྱུར་རིག་མཛོད་རྩོམ་སྒྲིག་ཚོགས་ཆུང་བཅས་ལ་གཟེངས་རྟགས་གནང་སོང་།
གཞན་ཡང་རྩིས་ཞིབ་པ་དང་། ཨར་ལས་བོགས་ལེན་པ། ལྷ་བཟོ། ལྷ་བྲིས། འབུར་རྐོས་པ། ཆོས་སྒར་འགན་འཛིན། ཆོས་སྒར་ལས་བྱེད་དང་རྩིས་པ། ལས་བྱ་སོགས་ལ་ལེགས་སྐྱེས་གནང་རྗེས། སྔ་འགྱུར་རྡོར་གདན་རྙིང་མའི་སྨོན་ལམ་ཆེན་མོའི་ཚོགས་གཞོན་༧སྐྱབས་རྗེ་མཁན་སྤྲུལ་གྱང་ཁང་རིན་པོ་ཆེས་ཐུགས་རྗེ་ཆེ་ཞུ་གསུང་བཤད་གནང་བ་དང། དགེ་འདུན་འདུས་ཚོགས་ནས་སྔ་འགྱུར་བསྟན་རྒྱས་སྨོན་ལམ་གསུང་ཟིན་རྗེས་སྔ་འགྱུར་རྡོར་གདན་རྙིང་མའི་ཆོས་སྒར་གྱི་པདྨ་སམ་བྷ་ཝ་གཙུག་ལག་ཁང་ཆེན་མོའི་དབུ་འབྱེད་མཛད་སྒོ་ལེགས་པར་གྲུབ་ཅིང་། སྐུ་མགྲོན་རྣམ་པར་ཆོས་སྒར་དུ་མཛད་སྒོའི་གསོལ་སྟོན་འདེགས་འབུལ་ཞུས་པ་སོགས་མཛད་སྒོ་ལེགས་པར་གྲུབ་ཡོད་པ་རེད།། གསར་འགོད་པ། བློ་བཟང་རྒྱ་མཚོ།
