ལོ་༩༠ ལས་བརྒལ་བ་རྣམས་ཚེ་རིང་པོར་གནས་ཐབས་སུ་ལུས་སྦྱོང་ལས་ཆང་རག་གལ་ཆེ་ཟེར།
ལོ་ན་༩༠ ལས་བརྒལ་བའི་བགྲེས་སོང་རྣམས་དུས་མིན་འཆི་བའི་འཇིག་ཉེན་ལས་ཐར་པར་ལུང་སྦྱོང་བྱེད་པ་ལས་ཆང་རག་མང་ཉུང་རན་པ་ཞིག་བཏུང་ན་ཕན་ཐོགས་ཆེ་བ་ཡོད་པ་ཉམས་ཞིབ་ཀྱི་གྲུབ་དོན་སྙན་ཐོ་ཞིག་ནང་འཁོད་ཡོད་འདུག
ཟླ་འདིའི་ཕྱི་ཚེས་༢༡ ཉིན་ཨ་རིའི་གསར་ཁང་ཆི་ཀཱ་གྷོ་ཊྲི་བྷུམ་(Chicago Tribune)ཞེས་པས་གནས་ཚུལ་སྤེལ་བ་ལྟར་ན། ཨ་རིའི་མངའ་སྡེ་ཊེཀ་ས་སི་(Texas) ནང་འཚོགས་པའི་ཚན་རྩལ་རིག་པའི་མདུན་སྐྱོད་སྐོར་གྱི་ལོ་འཁོར་ལྷན་ཚོགས་ཞིག་གི་ཐོག ཀཱལ་ལི་ཧྥོ་ནི་ཡ་གཙུག་ལག་སློབ་གཉེར་ཁང་གི་དབང་རྩའི་ཚན་རིག་པ་ལྕམ་ཁཱི་ལོ་ཌི་ཡ་ཀཱ་ཝ་སིས་ཕྱི་ལོ་༢༠༠༣ ནས་བཟུང་ལོ་ན་༩༠ ནས་༩༩ བར་གྱི་བགྲེས་སོང་༡,༧༠༠ ཡི་ཚེ་ཚད་ལ་ཉིན་རེའི་བྱ་བཞག་ཁྲོད་ཀྱི་གོམས་གཤིས་ཀྱི་ཤུགས་རྐྱེན་ཐོག་ཉམས་ཞིབ་བྱས་ཡོད་འདུག་ཅིང་། མོའི་ཉམས་ཞིབ་ནང་ཉིན་ལྟར་ཆང་རག་ཤེལ་ཕོར་གཉིས་རེ་འཐུང་མཁན་བགྲེས་སོང་རྣམས་ཀྱིས་དུས་མིན་འཆི་བའི་འཇིག་ཉེན་བརྒྱ་ཆ་༡༨ ཉུང་འཕྲི་བྱེད་ཐུབ་ཀྱི་ཡོད་པ་དང་། དེ་བཞིན་ཉིན་ལྟར་ལུས་སྦྱོང་སྐར་མ་༡༥ ནས་༤༥ བར་བྱེད་མཁན་རྣམས་ཀྱིས་དུས་མིན་འཆི་བའི་འཇིག་ཉེན་བརྒྱ་ཆ་༡༡ ཉུང་འཕྲི་བྱེད་ཐུབ་ཀྱི་ཡོད་པ་བཅས་ཀྱི་གྲུབ་དོན་བྱུང་ནས། ལོ་ན་༩༠ ལས་བརྒལ་བའི་བགྲེས་སོང་རྣམས་ཚེ་རིང་དུ་གནས་པར་ལུང་སྦྱོང་ལས་ཆང་རག་མང་ཉུང་རན་པ་ཞིག་བཏུང་ན་ཕན་ཐོགས་ཆེ་བ་ཡོད་པ་ཉམས་ཞིབ་ཀྱི་གྲུབ་དོན་སྙན་ཐོའི་ནང་བཀོད་ཡོད་འདུག་ཅིང་། ལྕམ་ཁཱི་ལོ་ཌི་ཡ་ཀཱ་ཝ་སིས་“འདིའི་ཐོག་ང་ལ་འགྲེལ་བཤད་མེད། འོན་ཀྱང་། ཆང་རག་མང་ཉུང་རན་པོ་འཐུང་བ་ལ་བརྟེན་ནས་ཚེ་རིང་དུ་གཏོང་ཐུབ་པར་ཡིད་ཆེས་བརྟན་པོ་ཡོད་”ཅེས་བརྗོད་ཡོད་འདུག
དེ་བཞིན་རྒྱགས་ནད་མ་པར་ལུས་ཀྱི་ལྗིད་ཁོག་ཅུང་ཚད་ལས་བརྒལ་བ་ཡོད་པ་ལ་བརྟེན་ནས་དུས་མིན་འཆི་བའི་འཇིག་ཉེན་བརྒྱ་ཆ་༣ ཉུང་འཕྲི་བྱེད་ཐུབ་ཀྱི་ཡོད་སྐོར་འདུག་ཅིང་། གནད་དོན་དེའི་ཐོག་ལྕམ་ཁཱི་ལོ་ཌི་ཡ་ཀཱ་ཝ་སིས་“ལོ་ན་གཞོན་དུས་སུ་སྐམ་པོ་ཡིན་ན་དེ་ངན་པ་ཞིག་མིན་ཡང་། རྒས་འཁོགས་ཆགས་དུས་སྐམ་པོ་ཡིན་པ་དེ་ནི་ཧ་ཅང་ངན་པ་ཡིན་”ཞེས་བརྗོད་ཡོད་འདུག
གཞན་ཡང་བགྲེས་སོང་ཉིན་ལྟར་ཆུ་ཚོད་༢ ལྷག་རིང་དགའ་ཕྱོགས་འདྲ་མིན་གྱི་ཐོག་བྲེལ་བ་བྱས་ནས་དུས་ཚོད་སྐྱེལ་བཞིན་པ་ཚོས་དུས་མིན་འཆི་བའི་འཇིག་རྐྱེན་བརྒྱ་ཆ་༢༡ ཉུང་འཕྲི་བྱེད་ཐུབ་ཀྱི་ཡོད་འདུག་པ་དང་། དེ་བཞིན་ཉིན་ལྟར་འཚིག་ཇ་ཕོར་པ་༢ རེ་ཉིན་འཐུང་བཞིན་པ་ཚོས་དུས་མིན་འཆི་བའི་འཇིག་ཉེན་བརྒྱ་ཆ་༡༠ ཉུང་འཕྲི་བྱེད་ཐུབ་པ་བཅས་ཉམས་ཞིབ་ཀྱི་གྲུབ་དོན་སྙན་ཐོའི་ནང་འཁོད་ཡོད་འདུག་པ་དང་། གོམས་གཤིས་ཀྱིས་ཚེ་ཚད་ལ་ཤུགས་རྐྱེན་ག་འདྲ་ཞིག་ཐེབས་ཀྱི་ཡོད་མེད་ཐད་ཞིབ་ཕྲའི་བརྟག་དཔྱད་ད་དུང་བྱེད་དགོས་ཀྱི་ཡོད་སྐོར་འདུག །
གསར་འགོད་པ་བཀྲ་ཤིས་དོན་གྲུབ།
