ལྷ་ས་ཁུལ་གྱི་དགོན་སྡེ་ཁག་ཅིག་སྒོ་འབྱེད་རྒྱུ་ཡིན་པའི་གསལ་བསྒྲགས་སྤེལ་འདུག
རྒྱ་ནག་གཞུང་ནས་རྒྱལ་སྤྱིའི་ནང་དུ་ཏོག་དབྱིབས་ནད་དུག་ལ་འཐབ་རྒོལ་གྱི་གྲུབ་འབྲས་ཐོན་ཡོད་པའི་རྣམ་པ་སྟོན་ཐབས་བྱེད་བཞིན་ཡོད་པ་ལྟར། བོད་ཀྱི་རྒྱལ་ས་ལྷ་ས་ཁུལ་གྱི་དགོན་སྡེ་སོགས་ཆོས་ལུགས་ཀྱི་བྱེད་སྒོ་སྤེལ་ཡུལ་མང་པོ་ཞིག་སྒོ་འབྱེད་རྒྱུ་ཡིན་པའི་གསལ་བསྒྲགས་སྤེལ་འདུག
དེ་ཡང་བོད་ནང་གི་ཀྲུང་གོའི་བོད་ལྗོངས་དྲ་བའི་ཐོག་ཏུ་སྤེལ་བའི་གནས་ཚུལ་ཞིག་ནང་དུ། ལྷ་ས་གྲོང་ཁྱེར་ནང་བསྟན་མཐུན་ཚོགས་ཀྱིས། ཟླ་༣ པའི་ཚེས་༣༡ ཉིན་ནས་ལྷ་ས་གྲོང་ཁྱེར་ལྟེ་བ་ནས་ཐག་རིང་བའི་དགོན་སྡེ་སོགས་ཆོས་ལུགས་བྱེད་སྒོ་སྤེལ་ཡུལ་༢༡༤ སྒོ་ཕྱར་རྒྱུ་གཏན་འཁེལ་བྱུང་ཡོད་སྐོར་བསྒྲགས་འདུག འོན་ཀྱང་ཏོག་དབྱིབས་ནད་དུག་ལ་དོགས་ཟོན་ཆེད་དུ། དགོན་པའི་སྒོ་ནས་ཚ་བ་བལྟ་བ་སོགས་སྔོན་འགོག་གི་ལས་དོན་སྤེལ་དགོས་པའི་གསལ་བསྒྲགས་སྤེལ་འདུག
དེ་ཡང་གསལ་བསྒྲགས་དེའི་ནང་། “སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གལ་ཆེའི་གསུང་བཤད་དང་མཛུབ་སྟོན་གྱི་དགོངས་དོན་ལག་བསྟར་དོན་འཁྱོལ་གཏིང་ཟབ་དང་། ལྗོངས་ཏང་ཨུད་དང་ལྷ་ས་གྲོང་ཨུད་ཀྱི་བཀའ་བཀོད་གསར་པ་དང་རེ་བ་གསར་པ་ལག་བསྟར་དོན་འཁྱོལ་བྱ་ཆེད། ལྷ་ས་གྲོང་ཁྱེར་ནང་བསྟན་མཐུན་ཚོགས་ཀྱིས་གྲོང་ཁྱེར་ཡོངས་ཀྱི་བོད་བརྒྱུད་ནང་བསྟན་གྱི་ཆོས་ལུགས་བྱེད་སྒོ་སྤེལ་ཡུལ་གྱི་གནས་སྟངས་དང་། གཞི་ཁྱོན། ཤུགས་རྐྱེན། དེ་བཞིན་རིམས་ནད་སྔོན་འགོག་ཚོད་འཛིན་སོགས་ལ་གཞིགས་ཏེ། རིམ་གྱིས་སྒོ་ཕྱེ་བའི་རྩ་དོན་ལྟར། སྔོན་ལ་ཐག་རིང་དང་། དེ་ནས་རྫོང་གྲོང་། དེ་རྗེས་ལྟེ་བའི་གྲོང་ཁྱེར་(ཁྲེན་ཀོན་ཆུས་)བཅས་ཀྱི་གོ་རིམ་ལྟར། ཞིབ་འཇུག་བྱས་རྗེས། འབྲས་སྤུངས་དགོན་དང་། སེ་ར་དགོན། དགའ་ལྡན་དགོན། མཚུར་ཕུ་དགོན། གཙུག་ལག་ཁང་བཅས་དང་། སྟོད་ལུང་བདེ་ཆེན་ཆུས་མངའ་ཁོངས་ཀྱི་སྐྱོར་མོ་ལུང་དང་། སྟག་ལུང་བྲག གཞོང་པ་ལྷ་ཆུ། དགའ་གདོང་དགོན། སྟག་རྩེ་ཆུས་མངའ་ཁོངས་ཀྱི་གསང་སྔགས་དགོན། ལྷུན་གྲུབ་རྫོང་མངའ་ཁོངས་ཀྱི་དགའ་ལྡན་ཆོས་འཁོར། མལ་གྲོ་གུང་དཀར་རྫོང་མངའ་ཁོངས་ཀྱི་ཀ་ཚལ་དགོན་དང་། དམ་ཆེན་ལྷ་ཁང་། སྙེ་མོ་རྫོང་གི་བེེ་རོ་གོང་འོག་དང་། སྣེའུ་ཁུལ་གསར་གྱི་ཉི་མ་ཐང་དགོན། གསང་ཕུ་དགོན། སྤེ་སེར་དགོན། རྣམ་རྒྱལ་སེར་ཁང་། མཚམས་ཁུང་མ་ཎི་ལྷ་ཁང་། སྐར་ཆུང་ལྷ་ཁང་། མཁའ་འགྲུལ་ཁུལ་གསར་གྱི་རྣམ་རབ་དྭགས་པོ་གྲྭ་ཚང་བཅས་དང་། ཁྲེན་ཀོན་ཆུས་མངའ་ཁོངས་ཀྱི་དགོན་སྡེ་ཁག་ཕུད། ཐག་རིང་བའི་ཆོས་ལུགས་བྱེད་སྒོ་སྤེལ་ཡུལ་༢༡༤དེ་དག་༢༠༢༠ལོའི་ཟླ་༣ པའི་ཚེས་༣༡ ཉིན་ནས་སྒོ་ཕྱེ་རྒྱུའི་གཏན་འཁེལ་བྱས་པས། རྒྱ་ཆེའི་དད་ལྡན་མང་ཚོགས་ཚོས་བདེ་ཐང་གི་ངོ་སྤྲོད་དང་ཡུལ་མིའི་ཐོབ་ཐང་ལག་ཁྱེར་བསྣམས་ཏེ་ཆོས་མཇལ་ལ་ཕེབས་ན་འགྲིག འོན་ཀྱང་། གནས་སྐབས་རིང་དད་ལྡན་མང་ཚོགས་འདུ་འཛོམས་ཆེ་བའི་ཆོས་ལུགས་བྱེད་སྒོ་སྤེལ་མཚམས་འཇོག་བྱེད་རྒྱུ་རེད་འདུག
དགོན་པ་ཁག་གིས་མུ་མཐུད་ཕྱི་ནས་མི་འགོ་བ་དང་། ནང་དུ་མི་ཁྱབ་པའི་ལས་དོན་གྱི་རྩ་དོན་ལྟར། དགོན་པའི་གཟིམ་སྒོ་ནས་ཚ་བ་བལྟ་བ་དང་། ཁ་རས་རྒྱག་པ། དུག་སེལ་བྱེད་པ། མཁའ་རླུང་འགྲོ་བསྐྱོད་ལེགས་པོ་ཡོང་བ་སོགས་སྔོན་འགོག་ཚོད་འཛིན་གྱི་ལས་དོན་ཡག་པོ་སྤེལ་ནས། གནས་ཚུལ་གང་ཡང་མི་ལྷགས་པའི་འགན་སྲུང་བྱེད་དགོས།
རྫོང་གྲོང་དང་གྲོང་ཁྱེར་མངའ་ཁོངས་ཀྱི་ཆོས་ལུགས་བྱེད་སྒོ་སྤེལ་ཡུལ་ཁག་སྒོ་ཕྱེ་ཆོག་པའི་དུས་ཚོད་ནི་རིམས་ནད་སྔོན་འགོག་ཚོད་འཛིན་ལས་དོན་གྱི་གནས་ཚུལ་ལ་གཞིགས་ཏེ་སྤྱི་བསྒྲགས་སྤེལ་རྒྱུ་ཡིན་པས། རྒྱ་ཆེའི་དད་ལྡན་མང་ཚོགས་ཀྱིས་དགོངས་བཞེས་དང་རྒྱབ་སྐྱོར་གནང་རོགས་ཞུ་རྒྱུ་ཡིན་ལ། སྤྱི་བསྒྲགས་འདི་ཕན་ཚུན་བརྡ་ལན་སྤྲོད་རོགས་ཞུ་རྒྱུ་ཡིན།”ཞེས་འཁོད་འདུག
ད་ལྟའི་ཆར་རྒྱལ་སྤྱིའི་རྒྱལ་ཁབ་མང་ཆེ་བའི་ནང་ཏོག་དབྱིབས་ནད་དུག་ཁྱབ་བརྡལ་དང་དེ་ལ་བརྟེན་ནས་ཚེ་སྲོག་ཤོར་བའི་ཁ་གྲངས་མང་དུ་འགྲོ་བཞིན་ཡོད་ཀྱང་། རྒྱ་ནག་གཞུང་གིས་སྤེལ་བའི་གསལ་བསྒྲགས་ཁག་གི་ནང་། ཏོག་དབྱིབས་ནད་དུག་གི་གནས་སྟངས་ཡག་ཏུ་འགྲོ་བཞིན་ཡོད་ཁར། ས་གནས་ཁག་ཅིག་ཏུ་བཟོ་གྲྭ་སོགས་ཀྱི་ལས་དོན་བསྐྱར་དུ་འགོ་འཛུགས་བྱས་ཡོད་པ་དང་། ནད་དུག་གི་ལྟེ་གནས་ཝུ་ཧན་གྲོང་ཁྱེར་ཡང་མྱུར་དུ་ཡོངས་རྫོགས་སྒོ་འབྱེད་བྱེད་རྒྱུ་ཡིན་པའི་གནས་ཚུལ་སྤེལ་བཞིན་ཡོད་པ་རེད། །
གསར་འགོད་པ་སྐལ་བཟང་དོན་གྲུབ།
