ཧོང་ཀོང་སློབ་ཕྲུག་ཚོགས་པའི་མང་གཙོའི་སྒེར་ལངས་ལ་རྒྱབ་སྐྱོར།
བོད་དང་ཧོང་ཀོང་། ཡུ་གུར། སོག་པོ་སོགས་རྒྱ་མིའི་འོག་ནས་དཀའ་སྡུག་མྱོང་མཁན་གཅིག་པ་ཡིན་དུས། ཚང་མའི་ནུས་པ་མཉམ་སྤུངས་ཐུབ་ཆེད་དུ་རྒྱབ་སྐྱོར་ལས་འགུལ་སྤེལ་བ་ཡིན་སྐོར་གསུངས་སོང་།
ཟླ་འདིའི་ཕྱི་ཚེས་༢༦ ཉིན་གྱི་སྔ་དྲོར་དྷ་ས་མེག་གྷན་གྱི་དབུས་སུ། བོད་རང་བཙན་སློབ་ཕྲུག་ཚོགས་པས། ཕྱི་ལོ་༢༠༡༤ ལོའི་ཕྱི་ཟླ་༩ པའི་ཕྱི་ཚེས་༢༦ ཉིན་ཧོང་ཀོང་དུ། ཉི་གདུགས་ཀྱི་ལས་འགུལ་སྤེལ་ནས་ལོ་ངོ་བཞི་འཁོར་བའི་ཉིན་མོ་དང་སྟབས་བསྟུན། དེར་རྒྱབ་སྐྱོར་མཚོན་ཆེད་དུ་པར་རིས་ཀྱི་ལས་འགུལ་ཞིག་སྤེལ་སོང་ཞིང་། སྐབས་དེར་ཉི་གདུགས་ཀྱི་ལས་འགུལ་མཚོན་པའི་པར་རིས་དང་། སྤྱི་ཚོགས་དྲ་རྒྱ་ཨིན་ས་ཊ་གྷི་རམ་གྱི་པར་རིས་བཅས་ཀྱི་གཤམ་དུ། རྒྱ་ནག་གི་དབང་སྒྱུར་འོག་ནས་ཧོང་ཀོང་མི་མང་གི་ཆབ་སྲིད་ཀྱི་ཐོབ་ཐང་རྣམས་ཉེན་ཁའི་གནས་སུ་གྱུར་ཡོད་སྟབས། ཧོང་ཀོང་མི་མང་ལ་གདུང་སེམས་མཉམ་བསྐྱེད་ཞུ་ཞེས་འཁོད་འདུག
དེ་ཡང་ལས་འགུལ་གོ་སྒྲིག་པ་བོད་རང་བཙན་སློབ་ཕྲུག་ཚོགས་པའི་རྒྱུན་ལས་རྒྱལ་མཚན་གྱིས་ལས་འགུལ་གྱི་དགོས་དམིགས་སྐོར་གསར་འགོད་པར་བརྗོད་དོན་དུ་“ལས་འགུལ་འདི་སྤེལ་དགོས་པའི་རྒྱུ་མཚན། ཧོང་ཀོང་གི་མི་ཡིན་ན་རེད། ང་ཚོ་བོད་པ་ཡིན་ན་རེད། ང་ཚོ་ཚང་མ་རྒྱ་མིའི་འོག་ནས་མྱོང་གི་ཡོད་པ་གཅིག་པ་ཡིན་པས། ང་ཚོས་ཁོང་ཚོར་རྒྱབ་སྐྱོར་མཚོན་ཆེད་དུ་པར་རིས་ཀྱི་ལས་འགུལ་འདི་སྤེལ་བ་ཡིན་”ཞེས་བརྗོད་བྱུང་བ་མ་ཟད། ལས་འགུལ་དེ་བརྒྱུད་ནས་ནུས་ཤུགས་མཉམ་སྤུངས་བྱེད་ཐབས་སུ་བརྩོན་གྱི་ཡོད་སྐོར་དུ་“ཧོང་ཀོང་དང་། ཡུ་གུར། སོག་པོ་བཅས་ཚང་མ་འཐབ་གྲོགས་འདྲ་པོ་ཡིན་དུས། ཚང་མས་ནུས་ཤུགས་གཅིག་ཏུ་སྤུངས་ནས་རྒྱ་མིར་བརྡ་ལན་སྤྲད་ན་རེད། རྒྱ་མིར་སོ་སོའི་རང་དབང་རང་བཙན་གྱི་ཆེད་དུ་རྩོད་ན་རེད། ནུས་ཤུགས་མཉམ་དུ་སྤུངས་ཐུབ་ཐབས་སུ་འབད་བརྩོན་བྱེད་ཀྱི་ཡོད་”ཅེས་དང་། ཧོང་ཀོང་གི་ལས་འགུལ་དེ་ནི་ན་གཞོན་རང་གིས་དངས་བླངས་ཐོག་སྤེལ་བའི་ལས་འགུལ་ཞིག་ཡིན་པ་དང་། དེར་རྒྱབ་སྐྱོར་བྱེད་དགོས་སྐོར་སོགས་བརྗོད་བྱུང་།
གཞན་ཡང་ལས་འགུལ་སྐབས་སྤེལ་བའི་བསྒྲགས་གཏམ་ནང་“རྒྱལ་ཁབ་གཅིག་ལ་ལམ་ལུགས་གཉིས་ཀྱི་སྒྲིག་གཞིའི་འོག་ནས། རྒྱ་ནག་དམར་ཕྱོགས་གཞུང་ལ་མ་ལྟོས་པར་ཧོང་ཀོང་ལ་རང་གི་སྲིད་གཞུང་གི་ས་ཁུལ་ཡོངས་ལ་འཛིན་སྐྱོང་བྱེད་པའི་ཐོབ་ཐང་ཡོད། དོན་དངོས་སུ་ཧོང་ཀོང་གི་མི་མང་རྣམས་ནི་རྒྱ་ནག་གི་སྒྲིག་སྲོལ་རྩ་འཛུགས་ཀྱི་དངངས་སྐྲག་ཁྲོད་ན་ལྷག་ཡོད། དེར་བརྟེན་ཧོང་ཀོང་གི་དབུ་ཁྲིད་དམ་པ་ན་ཊྲན་ལཱོ་དང་། ཨེ་ལེ་ཁུ་སུ་ཆོ། ཇཱོ་ཞོ་ཝང་སོགས་ཀྱིས་མང་གཙོ་དང་འཛམ་གླིང་ཡོངས་ཁྱབ་ཀྱི་འོས་བསྡུའི་ཐོབ་ཐང་གི་ཆེད་དུ་འཐབ་རྩོད་བྱས་ཡོད་པ་རེད། དེ་འདྲ་ཡིན་དུས་ང་ཚོས་ངེས་པར་དུ་ཧོང་ཀོང་གི་མི་མང་ལ་རྒྱབ་སྐྱོར་བྱེད་དགོས་”ཞེས་འཁོད་འདུག །
གསར་འགོད་པ་བཀྲ་ཤིས་དོན་གྲུབ།
