ཁེ་ཕན་མི་འདྲ་བའི་ཤུགས་ལྡན་གྱི་རྩོད་རྙོག
དང་པོ་ཁེ་ཕན་དང་འབྲེལ་ནས་ཞི་འཇམ་མི་ཐུབ་པ་དེ་ལ་མཚོན་ན་ཕྱོགས་གཉིས་ནས་ཡོང་བཞིན་ཡོད་པ་དང༌། གཙོ་ཆེ་ཤོས་ནི་དོལ་རྒྱལ་ཁ་ཁྱེར་བ་རྣམས་ཡིན་པ་དང༌། ཁོང་རྣམས་ཀྱི་ངོས་ནས་རང་ངོས་ནས་འདོར་ཐབས་མེད་པའི་ཁེ་ཕན་ཞིག་ཡོད་པ་དངོས་ཡོད་གནས་ཚུལ་རེད། རྒྱུ་མཚན་ནི་ལོ་འདིར་རྒྱ་ནག་གཞུང་དང་ལག་འབྲེལ་གྱིས་བོད་དོན་ཛ་དྲག་གཉན་འཕྲང་གི་དུས་སྐབས་ཤིག་ཏུ༸གོང་ས་མཆོག་ལ་སྐུར་འདེབས་བྱེད་པ་ཙམ་དུ་མ་ཟད། དངོས་སུ་ངོ་རྒོལ་སྐད་འབོད་བྱེད་མཁན་ཡང་བྱུང་བ་སོགས་ཕྱོགས་གང་ཐད་ནས་བསམ་ཡང་དོལ་རྒྱལ་གྱི་རྩོད་རྙོག་གཅིག་པུའི་ཆེད་དུ་མིན་པར་ད་དུང་རྒྱབ་ལྗོངས་རིང་པོ་ཞིག་ཡོད་པ་དངོས་ཡོད་གནས་ཚུལ་རེད། དེར་བརྟེན་ཁོང་ཚོས་འཐོབ་བཞིན་པའི་ཁེ་ཕན་དེ་མ་ཆད་ཀྱི་བར་དུ་རྩོད་རྙོག་དེ་ཡང་མཚམས་འཇོག་མི་སྲིད་པ་ཞིག་རེད། དོན་དངོས་ཐོག་མི་འདི་དག་ནི་བོད་པའི་བླ་བཙོང་དང༌། རྐང་འདྲེན་ངོ་མ་དག་རེད།
ཕྱོགས་གཅིག་ནས་དོལ་རྒྱལ་ལ་ངོ་རྒོལ་བྱེད་མཁན་ཡིན་པའི་མིང་ཐོག་ནས་ལས་འགུལ་འདྲ་མིན་སྤེལ་བ་དང༌། གསལ་བསྒྲགས་འདྲ་མིན་སྤེལ་བྱེད་མཁན་ཁག་ཅིག་ཀྱང་ཡོང་གི་འདུག ཁོང་ཚོ་ལ་མཚོན་ནའང་ཁེ་ཕན་ཞིག་གི་ཆེད་དུ་དམིགས་བཞིན་ཡོད་པ་ལྟ་བུ་འདུག དོན་དངོས་ཁོང་ཚོས་དོལ་རྒྱལ་རྗེས་འབྲངས་པ་རྣམས་ལ་ངོ་རྒོལ་བྱས་པ་ལས། དོལ་རྒྱལ་མི་བསྟེན་མཁན་གྱི་གནད་ཡོད་མི་སྣ་མང་པོ་ཞིག་ལའང་དངོས་ཤུགས་བརྒྱུད་གསུམ་ནས་མཚན་སྨོད་བྱས་པ་མང་བ་སོགས་ཡང་སྙིང་ཁོང་ཚོས་ཅི་ཞིག་དམིགས་བཞིན་ཡོད་མེད་ཀྱང་བཤད་དཀའ་བ་ཞིག་རེད། སྐབས་རེ་ན་ཚ་དེ་དག་ཁང་ཚན་བར་གྱི་རྩོད་རྙོག་ཅིག་ལ་བརྟེན་ནས་ཡོང་བཞིན་ཡོད་པ་ལྟ་བུ་དང༌། སྐབས་རེ་ཆོལ་ཁའི་ན་ཚ་ཞིག་ལ་བརྟེན་ནས་ཡོང་བཞིན་ཡོད་པ་ལྟ་བུ་དང༌། སྐབས་རེ་གང་ཟག་སྒེར་ཁག་ཅིག་དུས་རྒྱུན་སྣང་བར་མི་འགྲོ་བའི་རྒྱུ་མཚན་ལ་བརྟེན་ནས་མི་དེ་དག་བཙན་ཐབས་ཀྱིས་དོལ་རྒྱལ་རྗེས་འབྲངས་པ་དང་མཉམ་དུ་སྦྱར་ཐབས་བྱེད་པ་ལྟ་བུ་དང༌། སྐབས་རེ་དོལ་རྒྱལ་རྗེས་འབྲངས་པ་རྣམས་ལ་ངོ་རྒོལ་བྱེད་ཀྱི་ཡོད་པའི་བཟོ་ལྟ་བསྟན་ན་ཅི་ཞིག་གི་ཁེ་ཕན་འཐོབ་སྲིད་པའི་རེ་བ་བརྒྱབ་པ་མིན་ནམ་བསམ་པ་ཡང་ཡོང་གི་འདུག དཔེར་ན་སྔོན་མ་བྷེལ་ཀོབ་གཞིས་རྙིང་མཉམ་འབྲེལ་དྲུང་ཆེ་བཟའ་མི་གཉིས་ལ་དོལ་རྒྱལ་རྗེས་འབྲངས་པ་རྣམས་ཀྱིས་ཉེས་རྡུང་བཏང་བར་བརྟེན། བོད་གཞུང་གིས་ཁོང་ཨོ་སི་ཊོ་ལི་ཡའི་སྐུ་ཚབ་དོན་གཅོད་ཁང་གི་དྲུང་ཆེར་གནས་སྤོས་བཏང་བ་མ་ཟད། བཟའ་ཟླ་བུ་ཕྲུག་དང་བཅས་པ་དེར་བཏང་བ་རེད། ཉེ་བའི་ལོ་གཅིག་གི་སྔོན་ལ་ཁོང་སྐུ་གཤེགས་པའི་སྐབས་བོད་གཞུང་གི་དྲ་བརྙན་བརྒྱུད་ནས་ཁོང་ཁྱབ་བསྒྲགས་ཤུགས་ཆེ་གནང་བ་ཡོད་པ་དང༌། སྐབས་དེ་ཤེད་ཅིག་ཏུ་བཀའ་ཟུར་ཟླ་བ་ཚེ་རིང་མཆོག་ཀྱང་སྐུ་གཤེགས་ཡོད་ནའང༌། བོད་གཞུང་གི་ཁྱབ་བསྒྲགས་གནང་སྟངས་ལ་ཁྱད་པར་ཆེན་པོ་ཤོར་ཡོད་པ་སོགས་ལ་བརྟེན་མི་མང་ནང༌། འདི་ལྟ་བུའི་ཧུར་བརྩོན་པ་ཐོན་ཐུབ་ན་ཁེ་བཟང་རག་རྒྱུའི་རེ་བ་རྒྱག་མཁན་ཡང་ཡོད་མི་སྲིད་པ་གཏན་ནས་མ་རེད། གང་ལྟར་༸གོང་ས་མཆོག་གིས་ལྷག་བསམ་རྣམ་དག་གིས་བོད་མི་རིགས་ཀྱི་འཕྲལ་ཕུགས་བདེ་སྡུག་གི་ཆེད་དུ་བླང་དོར་ལམ་སྟོན་གནང་ཡང༌། བོད་མི་རིགས་བསོད་ནམས་དམན་ནས་ཡང་དག་པའི་ལམ་སྟོན་ལག་བསྟར་མི་བྱེད་པ་དང༌། ཁག་ཅིག་གིས་ལག་བསྟར་བྱེད་མཁན་གྱི་ཧུར་བརྩོན་པ་ཡིན་མདོག་གིས་དོལ་རྒྱལ་མི་བསྟེན་མཁན་གྱི་མཁན་པོ་དང༌། དོལ་རྒྱལ་དང་འབྲེལ་བ་མེད་པའི་དགེ་བསྐོས། དོལ་རྒྱལ་ལ་ངོ་རྒོལ་བྱེད་མཁན་གྱི་དགེ་བཤེས་སོགས་གནད་མང་པོ་ཞིག་དེའི་ཁོངས་སུ་སྦྱར་གང་ཐུབ་བྱེད་མཁན་འདི་དག་ཀྱང༌། དོལ་རྒྱལ་རྗེས་འབྲངས་བ་རྣམས་དང་བསྡུར་ན་ཉེས་པ་ཆུང་ནའང༌། དོན་དངོས་བོད་ཀྱི་རྩ་དོན་དང་ནང་ཁུལ་གྱི་མཐུན་འབྲེལ་མ་གནོད་སྐྱོན་གཏོང་བའི་སྐབས་འཚོལ་རིང་ལུགས་པ་ཁག་ཅིག་ཡིན་པར་ངོས་འཛིན་བྱེད་བཞིན་ཡོད། ངས་བལྟས་ན་གང་ལྟར་ཁེ་ཕན་མི་འདྲ་བ་མ་གཏོགས་ཁེ་ཕན་རེ་དམིགས་བཞིན་ཡོད་པ་ལྟ་བུ་ཞིག་ཏུ་མཐོང་གི་འདུག རི་བོ་དགེ་ལྡན་པའི་གདན་ས་ཁག་ལ་མཚོན་ན་དོལ་རྒྱལ་བསྟེན་ཕྱོགས་ཀྱི་སྐོར་དབྱེ་འབྱེད་གཙང་སེལ་གནང་ཟིན་པས། ད་དུང་ཡང་གཙང་མ་ཆགས་མེད་མདོག་མདོག་གིས་ཕྱི་དཀྲུག་གིས་རྔ་ཆུང་དང༌། ནང་དཀྲུག་གིས་ཌ་རུ་བྱས་བསྡད་ན་མཐའ་གཅིག་ཏུ་ངོ་རྒོལ་ཡོད་ལ། དོན་དངོས་འདི་ལྟར་བྱས་ནས་ང་ཚོའི་སྤྱི་ཚོགས་འདི་ནང་མི་མཐུན་པ་ཆགས་ན་ཡང་སྙིང་བོད་མི་ལ་དགོས་པ་དེ་ཆགས་པ་རེད་དམ། ཡང་ན་རྒྱ་མི་ལ་དགོས་པ་དེ་ཆགས་པ་རེད། མདོར་བསྡུས་ན་སུ་ལ་དགོས་པ་དེ་ཆགས་ཀྱི་རེད། བསམ་བློ་གཏོང་དགོས་པ་རེད།