སློབ་ཐོན་ལས་མེད་གྱེན་ལངས་ཀྱི་འཇིགས་སྐྲག
མཐོ་རིམ་སློབ་གྲྭ་ཁག་ནས་ཡོང་བའི་སློབ་ཐོན་པ་ཚོས། ལས་ཀའི་དམིགས་ཡུལ་ཆེན་པོ་འཛིན་མི་རུང་བ་དང༌། རྒྱལ་ས་ཆེ་ཁག་ཏུ་ལས་མེད་བྱས་ནས་སྡོད་པ་ལས། དམག་སྒར་དུ་འཛུལ་ཞུགས་བྱེད་པའམ། ཡང་ན་དམར་ཕྱོགས་ཚོགས་པས་བཀོད་སྒྲིག་བྱས་པའི་གྲོང་གསེབ་ཁག་ཏུ། ཡི་གེ་དང་དེབ་རིགས་ཚོང་ཟོག་སོགས་སྐྱེལ་ལེན་གྱི་ལས་ཀ་བྱེད་ན་བཟང་ཚུལ་བཤད་ཡོད་པ་རེད།
དེང་སྐབས་རྒྱ་ནག་ཏུ་གློག་ཀླད་དང་ཚན་རིག འཕྲུལ་ལས་སྡེ་ཚན་སོགས་ནས་སློབ་ཐོན་པ་ཧ་ཅང་མང་བ་དང༌། དཔེར་ན། ཕྱི་ལོ་ ༢༠༠༨ སློབ་ཐོན་པ་ས་ཡ་ ༡ ཙམ་བྱུང་ཡོད་པ་རྣམས་ད་དུང་ཡང་ལས་མེད་ཡིན་པ་དང༌། ཕྱི་ལོ་ ༢༠༠༩ སློབ་ཐོན་པ་ས་ཡ ༦་༡ ཙམ་བྱུང་ཡོད་པ་རྣམས་ལས་མེད་ཤ་སྟག་ཡིན་པའི་གནས་ཚུལ་ཐོན་ཡོད་པ་རེད། རྒྱ་ནག་དམར་ཕྱོགས་ཚོགས་པས་ལོ་ན་དར་ལ་བབས་པའི་སློབ་ཐོན་པ་ཚོར་ཧ་ཅང་དོ་སྣང་བྱེད་བཞིན་ཡོད་པ་དང༌། དཔལ་འབྱོར་ཉམས་གུད་ཀྱིས་རྐྱེན་བྱས་ཏེ་རྒྱ་ནག་གི་གྲོང་ཁྱེར་ཁག་ཏུ། སློབ་ཐོན་ལས་འཚོལ་བ་ས་ཡ་མང་པོས་ཆར་པ་དང་གངས་ལྷག་ཇི་ཙམ་ཆེ་རུང༌། ལས་འཚོལ་ལས་ཁུངས་སུ་ལས་ཀ་འཚོལ་ཆོག་པའི་ལག་འཛིན་རྒྱ་སྒོར་ ༢༠ ཅན་ཞིག་རེ་བཟུང་ནས། ཉིན་མཚན་དབྱེ་བ་མེད་པ་ལས་ཀ་འཚོལ་བཞིན་ཡོད་པའི་གནས་ཚུལ་ཐོན་ཡོད་པ་རེད།
