རྒྱ་ནག་ལ་ཉེན་བརྡ།
དེ་ཡང་དབྱིན་ལེན་དུ་རྟེན་གཞི་བྱས་ཡོད་པའི་འཇིགས་སྐུལ་རིང་ལུགས་པར་ཉམས་ཞིབ་བྱེད་མཁན་ཚོགས་པ་ཞིག་གིས་གནས་ཚུལ་མཁོ་སྤྲོད་བྱེད་སྐབས། ཨ་ལི་ཁེ་ཌ་འཇིགས་སྐུལ་རིང་ལུགས་ཚོགས་པས་རྒྱ་ནག་ལ་འཇིགས་སྐུལ་བྱས་པ་ཐོག་མ་ཡིན་ཞིང༌། འཇིགས་སྐུལ་བྱེད་དོན་ཡང་བདུན་སྔོན་མ་ཁ་ཆེ་བ་མང་པོའི་སྲོག་ཤོར་ཡོད་པའི་མ་ཚད། རྒྱ་ནག་གཞུང་གིས་ཁ་ཆེའི་ཆོས་ལུགས་ལ་འཇིགས་སྐུལ་བྱས་ནས། ཁ་ཆེའི་ལྷ་ཁང་༢༠ ལྷག་ཙམ་སྒོ་བརྒྱབ་ནས་དེང་སྐབས་ཁ་ཆེ་བ་ཚོས་ཆོས་བྱེད་འདོད་ཀྱང་བྱེད་ས་མེད་པའི་རྐྱེན་གྱིས། དཀའ་ངལ་མང་པོ་འཕྲད་བཞིན་ཡོད་པ་རེད་ཅེས་བརྗོད་ཡོད་པ་རེད།
ཉེ་དུས་ཁ་ཆེའི་རྒྱལ་ཁབ་མི་འབོར་མང་ཤོས་ཨིན་རྡུ་ནེ་ཤི་ཡའི་མི་མང་པོས་རྒྱ་ནག་ལ་ངོ་རྒོལ་གྱི་ཁྲོམ་སྐོར་གཞི་རྒྱ་ཆེན་པོ་བྱས་ཡོད་ཅིང༌། དེ་བཞིན་འཛམ་གླིང་ཁ་ཆེའི་རྒྱལ་ཁབ་ཁག་གིས་ཤིན་ཅང་གི་གནད་དོན་ལ་དོ་སྣང་ཤུགས་ཆེ་རུ་འགྲོ་བཞིན་ཡོད་པས། རྒྱ་ནག་གཞུང་གིས་དྲག་པོའི་དམག་དཔུང་བཏང་ནས་ཤིན་ཅང་གི་ས་ཁུལ་ཁག་ལ་དམ་དྲག་ཤུགས་ཆེ་རུ་བཏང་ཡོད་པ་རེད།།
