བོད་ཀྱི་རིག་གཞུང་གང་རེད་དམ།
ངས་ཁོང་ལ་བོད་མི་རིགས་འདི་ལ་སྐད་དང་ཡི་གེ་མེད་སོང་བ་ཡིན་ན། བོད་འདི་འཇིགས་ཚར་བ་རེད་ཅེས་བློ་ཐག་ཆོད་པོའི་སྒོ་ནས་བཤད་དུས་སུ། ཁོས་དེ་ནི་ང་རང་གི་བསམ་ཚུལ་དེ་ནོར་བ་རེད། བོད་ཀྱི་སྐད་དང་ཡི་གེ་འཇིགས་ཀྱང་བོད་མི་རིགས་འཇིགས་ཀྱི་མ་རེད། ད་ལྟའི་ཆར་སྐད་དང་ཡི་གེ་འཇིགས་ན་ཡང་དེ་ལ་སྐྱོན་ཆེན་པོ་མེད། དཔེར་ན་ཨིས་སུ་རལ་ལྟ་བུ་རེད། ཁོང་ཚོའི་སྐད་དང་ཡི་གེ་འཇིགས་ནས་རྗེས་སུ་རང་བཙན་ཐོབ་རྗེས་སུ་སྐད་དང་ཡི་གེ་རྗོའི་ཆོས་ལུགས་ཀྱི་ཡི་གེ་ལ་དཔེ་བཞག་ནས་བཟོས་པ་རེད་ཟེར་ནས་ཨུ་ཚུགས་བྱེད།
ལྷག་པར་དུ། ངས་ཁོང་ལ་བོད་ཀྱི་སྐད་དང་ཡི་གེ་མེད་སོང་བ་ཡིན་ན། བོད་ལ་རང་དབང་དགོས་དོན་མི་འདུག་ལ། བོད་མི་རིགས་ཟེར་ནས་ད་ལྟའི་ཆར་འུ་ཅག་གིས་སྐད་རྒྱག་དགོས་དོན་མི་འདུག ད་དུང་། བོད་ཡིག་དང་བོད་སྐད་སྤྱོང་སའི་ཁོར་ཡུག་ཆེད་དུ་དཀའ་ལས་བརྒྱབ་སྟེ་བཟོ་དགོས་དོན་མེད། སྐད་ཡིག་གཞན་གྱི་སྟེང་ནས་ལས་ཀ་རག་གི་ཡོད། རྒྱ་ནག་གིས་ཀྱང་བོད་མི་དག་གིས་རྒྱ་ཡིག་ཤེས་པ་དང་རྒྱ་སྐད་རྒྱག་ཐུབ་པ་སོགས་ བྱུང་བ་ཡིན་ན་ཁོང་ཚོས་ལས་ཀ་ཡང་སྤྲོད་ཀྱི་ཡོད། བོད་མི་རྒྱ་ལ་འགྱུར་ཚུལ་ནི་དེ་རེད་ཅེས་བཤད་པ་ཡིན། བོད་མི་ཕྱི་མི་རུ་འགྱུར་ཚུལ་ཡང་དེ་རེད་ཅེས་ཞུས་པ་ཡིན།
ཁོང་གིས་དེས་ན་ནམ་ཞིག་ཁྱེད་རང་གི་བུ་རྒྱུད་ཀྱིས་བོད་སྐད་དང་བོད་ཡིག་གཏན་ནས་མ་ཤེས་པ་ཡིན་ན། ཁྱེད་རང་དེ་བོད་མ་རེད་ཟེར་གྱི་ཡིན་ནམ་ཟེར། ངས་ཁོང་ལ་དེ་ཡིན་ལན་དུ་ཡིན། ང་རང་གི་ཤ་ནས་ཆད་པའི་བུ་ཕྲུག་ཡིན་ཡང་། ཁོ་མོ་བོད་ཀྱི་མི་མིན། ཁོ་མོ་ནི་སྐད་དང་ཡི་གེ་གང་ལ་འཐིམ་ནས་ཡོད་ན་དེ་ཡི་རིགས་ཡིན་པ་ལས། བོད་མི་མིན།
མཐའ་དོན་ངེད་གཉིས་ཀྱིས་བགྲོ་གླེང་དང་འབྲེལ་བའི་རྩོད་པ་ཡུན་རིང་བྱས་མཐར། བོད་ཀྱི་རིག་གཞུང་ནི་ནང་ཆོས་མིན་པ་དང་། བོད་ཀྱི་སྐད་དང་ཡི་གེ་མིན་པ། ༧རྒྱལ་བ་རིན་པོ་ཡི་གསུངས་ཆོས་དག་མིན་པ་ཁོང་གིས་སེམས་ཐག་ཆོད་པོས་སྒོ་ནས་ཡང་ཡང་གསུངས་ཀྱི་འདུག སྤུན་ཟླ་ཚོ། ཁྱེད་ཅག་གིས་བོད་ཀྱི་རིག་གཞུང་ཟེར་བ་ཅི་འདྲ་ཞིག་ལ་ངོས་འཛིན་གནང་གི་ཡོད་དམ།