མང་གཙོའི་ངོ་བོ་ཚང་བ་ལ་རྒྱབ་སྐྱོར་དང་འགལ་ཟླ་གཉིས་ཀ་དགོས།

རབ་བྱུང་རྣམས་ཀྱིས་ཆབ་སྲིད་ཀྱི་ནང་ཆ་ཤས་ལེན་སྟངས་སྐོར་གསུང་དོན། “རབ་བྱུང་གིས་ཆབ་སྲིད་ཀྱི་ནང་ཆ་ཤས་ལེན་སྐབས་ཁྱིམ་པ་དང་མི་འདྲ་བའི་འདུ་ཤེས་གསལ་པོ་ཞིག་མེད་ན། སྐྱེ་བོ་ཕལ་བ་ཉོན་མོངས་པ་རགས་པའི་དབང་དུ་སོང་བ་ཚོས་བྱེད་སྟངས་ནང་བཞིན་བྱས་ནས་འགྲོ་རྒྱུའི་ཉེན་ཁ་ཆེན་པོ་ཡོད་པ་རེད། དེ་ལྟར་ཕྱིན་པ་ཡིན་ན། རྗེས་མ་གྲྭ་ཚོགས་ཆེན་པོ་ཡོད་པའི་གདན་ས་དེ་ཚོ་ཆབ་སྲིད་པའི་བེད་སྤྱོད་གཏོང་རྒྱུའི་ལག་ཆ། ཆབ་སྲིད་པའི་འོས་ཤོག་ལེན་སའི་མཛོད་ཆགས་སོང་བ་ཡིན་ན། ཏན་ཏན་ཞབས་འདྲེན་ཆེན་པོ་རེད་བསམ་གྱི་འདུག ཆོས་དང་མ་མཐུན་པ་དང་། འདུལ་བ་དང་མ་མཐུན་པ། ཡ་རབས་བཟང་སྤྱོད་དང་མ་མཐུན་པ། དགེ་འདུན་གྱི་ནང་ཁྲིམས་དང་མ་མཐུན་པ། དགེ་འདུན་པའི་གཤིས་སྤྱོད་དང་མ་ཐུན་པ་ཆགས་རྒྱུའི་ཉེན་ཁ་ཡོད་པ་རེད། རབ་བྱུང་དེ་ཚོས་རབ་བྱུང་གི་འདུ་ཤེས་མ་དོར་བའི་ཐོག་ནས་འོས་ཤིང་འཚམས་པའི་སྤྱི་ཚོགས་དང་ཆབ་སྲིད་ཀྱི་ནང་ཆ་ཤས་བཞེས་སྟངས་དེ་མཐའ་གཉིས་སུ་མ་ལྷུང་པ་གནང་དགོས་པ་དེ་གལ་ཆེན་པོ་ཞེ་དྲག་རེད། བར་ལམ་ཞིག་ནས་ང་ལ་དེའི་ཐོག་དམིགས་བསལ་གྱིས་ཚོར་སྣང་ཆེན་པོ་བྱུང་། ཉེ་ཆར་དབུས་སྤྱི་ཁྱབ་འོས་བསྡུ་ལྷན་ཁང་གིས་བཀའ་བློན་དང་སྤྱི་འཐུས་ཀྱི་འོས་ཤོག་གསལ་བསྒྲགས་གནང་བ་རེད། དེའི་སྐབས་གདན་ས་ཁག་གིས་འོས་ཤོག་འཕེན་སྟངས་ཀྱི་འགྲོས་དེ་གོ་སོང་། དེའི་སྐབས་ཡ་མཚན་པོ་དང་ཧང་སང་དགོས་པ་བྱུང་། གྲྭ་པ་ཚོས་འདི་འདྲ་གནང་གི་ཡོད་པ་རེད་དམ། དེ་འདྲ་བྱས་པ་ཡིན་ན་ནམ་རྒྱུན་ང་ཚོས་གྲྭ་པས་ཆབ་སྲིད་ནང་ཆ་ཤས་ལེན་དགོས་པ་རེད་ཅེས་བཤད་སྡོད་པ་དེ་ཆོས་སྲིད་ཟུང་འབྲེལ་ཆགས་ཀྱི་ཡོད་དང་། ཆོས་འགལ་རིང་ལུགས་ཤིག་ཆགས་འགྲོ་ཡི་ཡོད་པའི་ངེས་པ་མི་འདུག་སྙམ་པའི་ཞེད་སྣང་འདྲ་བྱུང་སོང་། ངས་དེ་རིང་ནང་ཚགས་བྱས་ཏེ། ང་རང་ལ་ཚོར་སྣང་བྱུང་བ་དེ་ཞུས་པ་ཡིན་”ཞེས་གསུངས་ཡོད་པ་རེད།

ཟམ་གདོང་རིན་པོ་ཆེས་མང་གཙོའི་ཆབ་སྲིད་ནང་དགག་བྱ་དང་སྐྱོན་བརྗོད་མེད་དུ་མི་རུང་ཡིན་སྐོར་གསུང་དོན། “མང་གཙོའི་ངོ་བོ་ཡོངས་སུ་ཚང་བ་ལ་རྒྱབ་སྐྱོར་དང་འགལ་ཟླ་གཉིས་ཀ་ངེས་པར་དུ་ཡོད་དགོས་པ་ཞིག་རེད། དགེ་འདུན་པའི་ནང་བཀའ་ཤག་སྐབས་བཅུ་གཉིས་པ་དང་བཅུ་གསུམ་པའི་སྲིད་ཇུས་ལ་མོས་མཐུན་མེད་པར་དགག་བྱ་དང་སྐྱོན་བརྗོད་གནང་མཁན་ཚོར་སྔོན་ལ་ཐུགས་རྗེ་ཆེ་ཞུ་རྒྱུ་ཡིན། ཁྱེད་རང་ཚོས་ཐུགས་སྣང་ཆེན་པོས་གཞུང་གི་ལས་དོན་ཐོག་སྐྱོན་དང་ཞན་ཆ་ཡོད་པ་དེ་ཚོ་ཐེར་འདོན་གནང་ནས། སྐྱོན་བརྗོད་གནང་བ་བརྟེན་ནས། དགེ་སྐྱོན་ཡོ་བསྲང་བྱེད་རྒྱུ་དང་། ཞན་ཆ་མེད་པ་བཟོ་རྒྱུར་ཕན་ཐོགས་ཡོད་པ་རེད། ཡང་གནས་ཚུལ་ཁ་ཤས་གསལ་པོ་མ་རྟོགས་ན་གསལ་བཤད་ཞུ་རྒྱུའི་གོ་སྐབས་ཡོད་པ་རེད། དེར་བརྟེན་དགག་བྱ་དང་སྐྱོན་བརྗོད་གནང་མཁན་ཆབ་སྲིད་ཀྱི་ནང་གལ་ཆེ་བའི་ཆ་ཤས་ཤིག་རེད། ཐུགས་རྗེ་ཆེ་ཞུ་རྒྱུ་ཡིན།

རྒྱབ་སྐྱོར་གནང་མཁན་ཚོ་དེ་བས། མི་མང་གི་མང་མོས་ཀྱིས་རྒྱབ་སྐྱོར་མེད་ན། གཞུང་གི་སྲིད་ཇུས་དང་འཛིན་སྐྱོང་ག་རེ་ཡིན་ནའང། ལག་བསྟར་དང་རྒྱུན་སྐྱོང་བྱེད་ཐབས་མེད་པ་རེད། ད་ལྟ་བར་དུ་༧གོང་ས་སྐྱབས་མགོན་མཆོག་གིས་ལམ་སྟོན་གནང་བའི་གཉིས་སྨན་དབུ་མའི་ལམ་གྱི་སྲིད་ཇུས་ཀྱིས་མཚོན་པས། གཞུང་གི་སྲིད་ཇུས་དང་ལས་རིམ་ཚང་མ་གདེང་སྤོབས་ཆེན་པོའི་ཐོག་ནས་ལག་བསྟར་ཞུ་ཐུབ་པ་དེ་མི་མང་གི་ཚད་མཐོའི་མང་མོས་ཀྱི་རྒྱབ་སྐྱོར་ཡོད་པས་ཉེར་ལན་ལ་བརྟེན་ནས་བྱུང་བ་ཞིག་ཡིན་པས། རྒྱབ་སྐྱོར་གནང་མཁན་ཚོར་ཐུགས་རྗེ་ཆེ་ཞུ་བ་དང་། འབྱུང་འགྱུར་ཡང་བཀའ་བློན་ཁྲི་པ་སུ་ཞིག་ཕེབས་ནའང་ད་ལྟ་ནང་བཞིན་རྒྱབ་སྐྱོར་མཐུན་འགྱུར་གནང་རོགས་”ཞེས་གསུངས་ཡོད་པ་རེད།།{jcomments on}