ཁྱོད་ནི་ནམ་ཡང་གཟིམ་མེད་ཀྱི་མར་མེ་རྐང་གཅིག
གངས་རིར་བཅིངས་པའི་ཁྱོད་ཀྱི་བརྩེ་སེམས་ཕྲ་མོ
མར་མེ་རྐང་གཅིག་སྤྲུལ་ཏེ་ལྷམ་མེར་འབར་སོང
ལོ་རྒྱུས་དེབ་ཐེར་ངོས་ན་ཁྱོད་ནི་ནམ་ཡང་
འོད་ཏུ་འཚེར་བའི་གཟིམ་མེད་མེ་ལྕེ་ཟླུམ་པོ
ཁ་བའི་གླེགས་བམ་ཅིག་གི་གཟུགས་སུ་སྤྲུལ་ཏེ
དུས་རབས་ཤིག་གི་ལོ་རྒྱུས་རྡོ་རིང་བཙུགས་སོང
ཁྱོད་ཀྱི་སྙིང་སྟོབས་དགུང་དུ་འཕྱུར་བའི་མེ་ལྕེས
སྡུག་ཅན་ཀླ་ཀློའི་སྙིང་ཁམས་ཚལ་བར་གཤགས་ཅིང
རིགས་མཐུན་སྤུན་ཟླ་སྟོང་གི་ལས་དབང་ནག་པོ
དཀར་དམར་འོད་ཐིག་ཅིག་གིས་དགུང་དུ་བཏེགས་སོང
རིང་ནས་མཛའ་མཐུན་འབྲེལ་འདྲིས་ཟབ་པའི་གྲོགས་གཅིག
རྒྱ་གར་རང་དབང་སླར་གསོའི་དུས་དྲན་ཉིན་མོར
མ་བསྒྲིགས་རང་འགྲིགས་ངང་གིས་ཁྱོད་ཀྱི་འབོད་སྒྲས
མགོ་ནག་མི་ཡི་རང་དབང་རྟེན་འབྲེལ་འགྲིག་སོང
གོ་ལ་རིལ་མོ་མེ་ལྕེའི་ཞལ་ཏུ་བསྟུམས་ཏེ
འོད་ཀྱིས་ཉི་ཟླའི་འབར་བའི་ཟེར་ལ་མགྲན་ཀྱང་
ཁྱོད་ཀྱི་སྙིང་སྟོབས་དགུ་འགྱུར་འབར་བའི་གཟི་ལ
མགྲན་པའི་ནུས་པ་བསྐལ་བའི་མཐར་ཡང་ཕྲ་སོང
༢༠༡༡ལོའི་ཕྱི་ཟླ་༠༨པའི་ཚེས་༡༥ལ་རྒྱལ་གཅེས་སྐུ་གཤེགས་དཔའ་བོ་རྟའུ་ཚེ་དབང་ནོར་བུས་རང་ལུས་མེར་སྒྲོན་ཏེ་རང་དབང་གི་འབོད་སྒྲ་སྒྲོག་པའི་དྲན་རྟེན་གྱི་ཚུལ་དུ་ཕུལ།
