གཙོག་གཙོག་ལྷན་དུ་འདྲེས་པའི་ཁྲག་རྣག་ཤ་རུས་ཀྱི་ཚོགས་འདི།།

གཅེས་སྲུང་བྱི་དོར་བྱེད་རྟེན་དྲི་བྲལ་ལྷད་མེད་ཅིག་མིན་ཡང་།།

ནད་རིགས་དྲུངས་ནས་འབྱིན་པའི་སྲུང་སྡོམ་སྨན་སྣ་གཉིས་བསྡེབས་ཏེ།།

 ཆོས་འཚོལ་ངལ་བའི་རྔུལ་ནག་ཟིལ་ཐིགས་ཁྲུལ་ཁྲུལ་འདི་སྤྲོ་ཨང་།།

རྩེ་སེམས་གཡེང་བའི་དེད་དཔོན་དབུགས་ཀྱི་བརྗོད་པ་ཡི་ཕུང་པོ།།

འཆལ་གཏམ་ཚོན་གྱི་མ་གོས་ཟོ་བཟང་འཁྱོག་མེད་ཀྱི་གནད་དོན།།

གསེར་མིག་མཚོ་ལ་འཁོར་བཞིན་ཉི་ཟླ་རེས་མོས་ཀྱི་བགྲོད་ལམ།།

སྤྲོ་དགས་འ་འུར་མདུན་མཆོངས་དངངས་ཞེད་ཚོམ་མེད་འདི་སྤྲོ་ཨང་།།

ཟུངས་ཁྲག་ལོང་ལོང་བཞུར་བའི་རྩ་ཕྲ་བརྒྱ་བརྒྱ་ཡིས་བསྡོམས་པའི།།

དམར་པོ་སྲོག་གི་མཱུ་ལ་དྲགས་འགུལ་ཟླུམ་པོ་འདིའི་དབུས་ན།།

ཀུན་གཡོ་སྒྱུ་འཕྲུལ་ཆེ་བའི་གཤོག་བྲལ་འཕུལ་ལྡན་གྱི་རྣམ་རིག།

པོད་ལྔའི་སྐྱེད་ཚལ་ཡོངས་པོར་འཁོར་ལྡིང་རྩིར་སྤྱོད་འདི་སྤྲོ་ཨང་།།

བརྟགས་ཚེ་ཞེ་མེར་ལང་བའི་མི་གཙང་རུལ་དྲི་ཡི་གཏེར་མཛོད།།

བཏང་སྙོམས་ཁེངས་པའི་རྒྱགས་པ་འདེགས་འཇོག་རང་རྐྱ་བའི་ཚུགས་ཐུབ།།ཕྱོགས་ལྷུང་ལྕགས་སྒྲོག་ནག་པོའི་ལྷུ་ཚིགས་གཏུམ་སྤྱོད་དེ་ཆད་པའི།།ཆོས་ཚོགས་ཆགས་མེད་འགྲིམ་པའི་ཁོམ་དལ་འབྱོར་ལུས་འདི་སྤྲོ་ཨང་།།གཡས་འཁྱིལ་དུང་གི་ཆོས་སྒྲ་ཁ་རྩངས་མཚོ་རླབས་བཞིན་རྒོད་པའི།།སྟག་སེང་དམ་སྨྱོན་བརྒྱ་ཕྲག་སྟངས་རྩལ་མཆོང་ལྡིང་གི་གྲལ་ན།།རང་སྐད་རྣལ་མ་སྙིང་རུས་ཡོད་དགུ་རྩལ་སྤྲུགས་དེ་བགྱིས་པས།།སྐབས་འགར་དབུངས་འགག་མི་སྨྲ་དྲང་སྲོང་བརྟུལ་ཞུགས་འདི་སྤྲོ་ཨང་།།མ་རིག་ཚང་ཚིང་སྦུགས་ན་སྐད་ཅོར་སྨེ་ངག་རང་འབྱིན་པའི།།ཐར་འདོད་ཁྲོ་དང་རྨོངས་པའི་གཉའ་གནོན་བཙོན་འོག་གི་སྲུབས་ནས།།རྐང་འཇབ་འགྱུར་ཁུག་ཐབས་ཀྱིས་སྤྲེལ་ལད་འདྲ་ཆག་རེ་འཁྲབ་སྟེ།།རྣམ་ཀུན་དམ་ཆོས་འབད་འབུངས་རྣམ་དཀར་དགེ་སེམས་འདི་སྤྲོ་ཨང་།།   2004-6-16བྲིས།།   དེ་རིང་ཤོག་རྙོག་འགའ་ཞིག་གི་གསེབ་ནས་འདི་རྙེད་སེལ་བྱུང་བས་སྐབས་དེ་དུས་ཀྱི་དཀར་གཙང་གི་སེམས་ཁམས་དང་ཚོགས་ཆོས་ལ་ཧུར་བརྩོན་དེ་དྲན་བྱུང་བ་མ་ཟད་མི་ཤེས་ཀྱང་ཨུ་ཚུགས་སྲ་བརྟན་ལ་ཡི་རང་དང་བཅས་ཡིག་འབྲུ་གཅིག་ཀྱང་མ་བཅོས་པར་རང་སོར་བཀོད་ཡོད།།