༄༅།།མཐོ་སྒང་ཆོས་པས་འྡིན་པའི་གནམ་རྒྱུད་།

འགྲོ་མགོན་འཕགས་པས་བོད་ཁམས་བཟུང་བའི་དུས་།
ས་འབྲིའི་དབར་ནས་དམག་འཁྲུག་ལན་འགའ་བྱུང་།
དབུས་གཙང་གཉིས་པོ་བྱ་རོག་འུག་པའི་ཚུལ་།
མི་རིགས་གཅིག་པའི་ལ་རྒྱ་ཡི་ནས་བྲལ་།

ས་སྡེའི་དོན་དུ་ཆོས་ཀྱི་མིང་འཁྱེར་ཏེ་།
ཧོར་གྱི་དམག་དཔུང་སྤུན་ཟླའི་ཐོག་དུ་ཕབས་།
ཞིང་བྲན་སྟོང་ཚོ་དོན་མེད་ཚེ་ལས་འདས་།
གོས་སེར་ཅན་ཚོའི་དམག་གི་འབྲས་བུ་ཡིན་།

གཡའ་བཟང་པ་དང་ཕག་གྲུ་སྡེ་བ་གཉིས་།
ས་སྡེའི་དོན་དུ་དམག་འཁྲུག་ལན་གསུམ་བྱས་།
ས་སྐྱའི་སྲིད་དབང་ཕག་གྲུས་ཡོང་སསུ་འཕྲོགས་།
ཆོས་ཀྱི་འགོ་བས་ནང་ཁྲུག་དེ་ལྟར་བྱས་།

ཕག་གྲུ་སྡེ་བ་དམངས་ལ་ཅུང་ཕན་རུང་།
ནང་འཁྲུག་དབང་གིས་སྲིད་དབང་གཞན་ལ་ཤོར་།
ནོར་བུ་བཟང་པོས་བོད་ཀྱི་སྲིད་དམང་བཟུངས།
དེ་ཡི་དབང་གིས་བོད་འབངས་སྡུག་གིས་མནར་།

གཙང་པ་སྡེ་དང་རི་བོ་དགའ་ལྡན་དབར་།
དབང་ཆའི་དོན་དུ་དམག་འཁྲུག་ལན་འགའ་བྱས་།
ཆོས་རྒྱུས་དབར་ནས་ཕྱོགས་་སེམས་དུ་མ་ཡིས་།
ཧོར་གྱི་དམག་དཔུང་སླར་ཡང་བོད་དུ་དྲངས་།

དགའ་ལྡན་པ་ཡིས་གཙང་པའི་སྲིད་དབང་འཕྲོགས།
དཀའ་བརྒྱུད་དགོན་མངས་དགའ་ལྡན་པ་རུ་བསྒྱུར་།
རྙིང་མའི་དགོན་སྡེ་ཐལ་བའི་འདུལ་དུ་བསྒྱུར་།
བླ་དཔོན་དུ་མ་ཕྱི་མའི་ལམ་དུ་བཅུགས་།

དགའ་ལྡན་པ་ཡིས་བོད་ཀྱི་སྲིད་དབང་བཟུང་།
སྲིད་ཀྱི་དོན་དུ་དམར་པོ་རྒྱ་ལ་བརྟེན་།
སྡེ་སྲིད་བཟང་པོ་མགོ་བོ་དྲིག་སྟེ་བསད་།
ས་མཐའི་ཧོར་གྱིས་བོད་ཁམས་སླར་ཡང་བཟུངས་།

དེ་དང་དེ་འདྲའི་གཏམ་རྒྱུད་དུ་མ་ཞིག
རང་གི་ས་སྡེའི་དོན་དུ་བླ་མས་བརྩམས་།
ལ་ཞེན་ཅུང་ཚམ་མེད་པའི་བླ་དཔོན་དག
དག་པ་གངས་རིའི་ལྗོངས་དེར་འཁྲུངས་པ་འཚར་།

ཅོས་པ་འདི་ནི་དུང་དཀར་བློ་བཟང་འཕྲིན་ལས་ཀྱི་གསུང་བརྩོམ་བོད་ཀྱི་ཆོས་སྲིད་ཟུང་འབྲེལ་ལ་བཅད་པ་ལྟ་སྐབས་སུ་འཚོར་སྣང་ཙམ་བྲིས་པའོ་།།