སྐྱོ་གདུང་གི་སེམས་གླུ།
སྐྱོ་གདུང་གི་སེམས་གླུ།
_______ཕྱི་མར་བཞུད་བའི་ཡུམ་ཆེན་མཆོག་ལ་མིག་ཆུས་སྐྱེལ་མ་བྱས།
དྲིན་གྱི་བསྐྱངས་པའི་རྒྱང་རིང་ཡུམ་ཆེན་ཁྱེད།།
ཁོ་མོ་ནོར་འཛིན་ལྷ་མོའི་ལྟོ་བར་བསུས།།
བྱམས་བརྩེའི་འཛུམ་གྱིས་ལུས་ཟུངས་རྨང་ནས་གསོ།།
རང་འདོད་སྡོམ་བཙུན་ལམ་བུའི་སྣེ་ལ་བཏང་།།
རྟ་བདུན་ཆི་ལའི་ཕག་ལ་ཉལ་བའི་རྗེས།།
གཅུང་པོས་ཡུམ་ཆེན་གཟུགས་གཞི་མི་བདེ་ཞེས།།
མི་སྙན་ཚིག་ཞིག་ཐོས་འཛིན་དབང་པོར་ལྷུང་།།
སེམས་ཁུང་སྡུག་གི་མུན་པ་སྟུག་པོས་ཁེངས།།
ཉིན་མཚན་ཞིག་གི་འཁོར་བསྐྱོད་ལོ་ལས་རིང་།།
རྒྱུས་མེད་ས་མཐར་སྡུག་གི་ལམ་བུ་བརྟོལ།།
ལྷན་སྐྱེས་ཞལ་གྱི་འཛུམས་མདངས་དྲན་ངོར་འཆར།།
ཅི་བྱ་གཏོལ་མེད་བར་ན་དུས་ཚོད་་འདས།།
རྟ་ལྗང་ཉི་ཟེར་མ་འཕྲོས་ཉིན་གཅིག་ཞོགས།།
གཅེན་པོས་འཛེམ་ཟོན་རོ་འཛིན་གཡོ་བ་ལས།།
ཡུམ་ཆེན་འཇིག་རྟེན་ཕ་རོལ་གཤེགས་པ་ཐོས།།
ཁོ་མོ་སྡུག་གི་མིག་ཆུའི་མཚོ་མོ་འཁྱིལ།།
བདག་ཆེད་དཀའ་སྡུག་དང་ལེན་ཡུམ་ཆེན་ཁྱེད།།
ང་ཡི་ཚེ་གང་སྒུག་ཅིང་བཙལ་ཡང་རུང་།།
ཁྱེད་ཉིད་མཇལ་བའི་སྐལ་བ་མ་མཆིས་ལ།།
ཁོ་མོ་ཉམ་ངའི་དྭ་ཕྲུག་ཞིག་ལ་འགྱུར།།
ཁྱེད་ཉིད་དྲན་གདུང་ན་ཟུག་རེ་རེ་ཡི།།
དམར་ཆུང་སྙིང་ལ་རལ་གྲིས་བསྣུན་དང་མཚུངས།།
གཉིད་མེད་ཟ་བཅུད་རོ་བརྒྱ་མི་ཚོར་ཞིང་།།
མིག་ཟུང་མུ་ཏིག་རྡོག་པ་ཆད་མེད་ལ།།
ཁྱེད་ཉིད་བཀའ་དྲིན་དྲན་ངོར་ཡལ་མི་སྲིད།།
ཡུམ་ཆེན་བསླབ་བྱ་བདུད་རྩི་ཟིལ་མ་དེ།།
ཁོ་མོའི་སྙིང་དབུས་དཀྱིལ་ལ་བཞད་ནས་ཡོད།།
ཁྱེད་ཉིད་བློ་བདེ་བག་ཕེབས་པར་འཚལ།།
