༄༅། །ས་སྐྱ་ཕུན་ཚོགས་ཕོ་བྲང་བདག་ཆེན་འཇིགས་བྲལ་ཕྱོགས་ལས་རྣམ་རྒྱལ་དཔལ་བཟང་པོ་མཆོག་དགུང་གྲངས་གྱ་ལྔ་བཞེས་པ་ལ་བརྟན་བཞུགས་གསོལ་འདེབས
ཀ་དག་ཀུན་བཟང་དགོངས་པ་ཟང་ཐལ་གདོད་མའི་མགོན་པོ་མི་ཡི་གཟུགས།། ཁ་དོག་ཡེ་བྲལ་མཚན་མའི་མ་དམིགས་ལྷུན་གྲུབ་བདེ་བ་ཆེན་པོའི་མདངས།། ག་ན་སྦྱོར་བའི་ཚོགས་རྗེའི་ཚོགས་བདག་འཇིགས་བྲལ་སེང་གེའི་ཟུར་ཕུད་ཅན།། ང་ཅག་སྟོན་པ་མཚུངས་མེད་དཔལ་ལྡན་བདག་ཆེན་ལྷུན་པོ་རྒྱལ་གྱུར་ཅིག །།
ཅ་ཅོའི་ངག་ཚིགས་དབྱིངས་སུ་དག་པ་བརྒྱད་ཁྲི་བཞི་སྟོང་སྙིང་པོའི་བཅུད།། ཇ་ཆང་ལོངས་སྤྱོད་འདོད་ཡོན་ལམ་ཁྱེར་ཐ་མལ་སྣང་བ་རིང་ནས་འགོག ། ཆ་སྤྱད་མཚར་དགུའི་སྤྲོས་པ་ཀུན་བྲལ་ཞི་བ་དུལ་བ་སེམས་དཔའི་གཙོ།། ཉ་གང་ཟླ་བའི་དཀྱིལ་འཁོར་འཛིན་པ་ཕུན་ཚོགས་ཕོ་བྲང་ཞབས་བརྟན་གསོལ།། ཏ་ཞིས་རྒྱ་མཚོའི་སྐྱེ་འགྲོ་ལས་ཅན་གདུལ་བྱའི་སྣོད་དུ་སྐལ་བ་བཟུང་།། ཐ་དད་མི་འབྱེད་ཆོས་ཀྱི་བགོ་བཤའ་ཤེས་ལྡན་གང་ཟག་ཀུན་ལ་གདམས།། ད་ལྟའི་དུས་སྙིགས་དུས་ཀྱི་འདྲེན་པ་བླ་མེད་ཐེག་ཆེན་སློབ་དཔོན་མཆོག ། ན་འཆིའི་ཟློས་གར་ཆུ་སྤྲིན་གཉེར་མའི་རི་མོ་དང་བྲལ་ཞབས་བརྟན་གསོལ།། པ་ཏྲ་ལྟ་བུའི་ཀུན་རྟོག་ཀུན་བྲལ་བཞི་བཅོམ་དྲུག་ལྡན་སྲིད་ཞིར་འདས། ཕ་རོལ་གཡེང་བའི་འདུ་འཛིའི་འཆིང་ཐག་ཐོབ་དང་གོ་སའི་གཡུལ་ལས་རྒྱལ།། བ་ལང་རྫི་བོའི་ངང་ཚུལ་ཇི་བཞིན་ཆབ་སྲིད་ཆོས་པར་སྤྱན་ཆབ་ཉིལ།། མ་ལུས་འགྲོ་ཀུན་བྱམས་བརྩེའི་སྐྱོང་བཞིན་ཉི་མའི་གཉེན་ཁྱེད་ཞབས་བརྟན་གསོལ།། ཙ་ཀི་ལིའི་མཆོག་གསུམ་ལྡན་རྡོར་འཛིན་ཀྱཻ་རྡོར་རོལ་བའི་དབྱིངས་དང་མཉམ།། ཚ་གྲང་མི་བཟད་སྡིག་སྒྲིབ་ཀུན་འཇོམས་ཀུན་རིག་ཐུགས་ཀྱི་ཆུ་རྒྱུན་བསིལ།། ཛ་ཡའི་བསྟན་པ་གངས་རིའི་ལྗོངས་ནས་ནུབ་གླིང་ཡུལ་གྲུར་འདྲེན་མཛད་པ།། ཝ་ཤིན་ཁྲོན་འདིར་ཆོས་ཀྱི་འོད་སྣང་སྡེ་ཚོགས་བསྐྲུན་མཁས་ཞབས་བརྟན་གསོལ།། ཞ་ཉེའི་ལྕགས་བཞིན་ཡོན་ཏན་ཀུན་བསྡུད་ཡིད་བཞིན་དབང་རྒྱལ་ཆོས་ཀྱི་རྗེ།། ཟ་མ་ཏོག་གི་མདོ་སོགས་གཉན་པོའི་གསང་རྒྱའི་དགོངས་དོན་ཐུགས་སུ་ཆུད།། འ་ཅག་ལས་འཕྲོས་སྨོན་ལམ་དུས་སྨིན་ཁ་བའི་རྡུལ་བརྩེགས་དམུས་ལོང་དང་།། ཡ་མཚན་ལྟ་སྤྱོད་ལོག་སྤྱོད་དམུ་རྒོད་མ་ལུས་འདུལ་ཁྱེད་ཞབས་བརྟན་གསོལ།། ར་གན་གསེར་རྫུ་ཟོག་པོའི་གང་བའི་དུས་སྙིགས་རྒུད་པའི་མཐའ་འདི་ལ།། ལ་ལུང་སྟོད་སྨད་བཤད་སྒྲུབ་འཛིན་མཁས་བླ་རུང་ཆོས་གྲྭ་ཆེན་མོ་ནས།། ཤ་བེམ་ཚུལ་བཟུང་ཆོས་སྐུའི་སྟོན་པ་ཨཱ་བྷྱའི་ཐུགས་དང་དབྱེར་མེད་འདྲེས།། ས་སྟེང་རྒྱལ་བསྟན་ཡོངས་ཀྱི་མངའ་བདག་འདྲེན་པ་རྣམས་གཉིས་ཚེ་རབས་བསྙེན།། ཧ་རི་ལྷ་ཡི་ལྗོན་པས་ཇི་བཞིན་ཁྱེད་བརྟེན་འགྲོ་རྒྱུན་རླན་པར་བྱེད།། ཨ་མ་གཅིག་པུའི་བུ་ཕྲུག་ལྟ་བུར་ཉེ་རིང་མེད་པར་ཀུན་ལ་སྙོམས།། ཧ་ཅང་དྭངས་བས་དད་ཕྱག་དང་བཅས་བདག་སེམས་སྤྲོ་བའི་ཞུ་འབོད་འདི།། ཨ་དོན་སྐྱེ་མེད་རོལ་བའི་ཀློང་ནས་གསན་ཅིང་དགོངས་ཏེ་དགྱེས་བཞུགས་གསོལ།། ཞེས་༠༡/༠༩/༡༣ལ་རྨོངས་རྒན་གྱི་ན་བ་དབང་ཆེན་གྱིས་སྦྱར་བའོ།།