སྒོར་མོས་ཁྲིད་སོང། ་་་་་་་་་་་་་འཚོ་བའི་མྱོང་སྣང།
༡༽
དེ་རིང་གྲོགས་པོ་ཞིག་དང་གཏམ་གླེང་བྱས་
ཁོ་རྒྱང་རིང་རྒྱང་རིང་ཞིག་ན་སོང་བས
ཁ་པར་འབྱོར་བ་ཐོག་དང་པོ་རེད
མཐའ་མ་ཡང་ཡིན་སྲིད་པ་རེད་ཟེར
༢༽
བདེ་པོ་ཡིན་ནམ་ཟེར་ནས་དྲིས་པས
དོན་མཐུན་གྱི་ལན་ཞིག་གསལ་པོར་གནང
འཚོ་བ་གསར་པ་དེར་སྐྱིད་པོ་འདུག་གམ་དྲིས་པས
ལྷ་ཡུལ་དང་གཅིག་མཚུངས་རེད་འདུག་ཟེར
༣༽
ལས་ཀ་ཅི་ཞིག་བྱེད་ཀྱིན་ཡོད་དམ་ཟེར་དུས
ཙང་ཙིག་རེད་ཟེར
བཤད་མི་ནུས་པ་ཞིག་ཡོད་སྲིད་མོད
ངས་སྐྱར་འདྲི་མ་བྱས
༤༽
ཁྱེད་སླར་ཡང་ཕྱིར་ཡོང་རྒྱུ་ཡིན་ནམ་ཟེར་དུས
ག་བ་ག་བ་ཟེར
ཁྱེད་ཀྱི་སློབ་སྦྱོང་ལོ་མང་བྱས་པ་དེས་ཕན་པ་འདུག་གམ་ཟེར་དུས
ལོ་མང་རིང་དུས་ཚོད་བེད་མེད་དུ་སོང་འདུག་ཟེར
༥༽
བྱས་ན་ཁྱེད་ཀྱི་འཚོ་བ་ཡོངས་སུ་རྫོགས་པ་འགྱུར་ཟིན་ནམ་དྲིས་པས
དེ་རིང་ནས་ང་འཇིག་རྟེན་པ་ཞིག་ཡིན་ཟེར
བསམ་ཡུལ་ལས་འདས་པའི་སྐད་ཆ་ཞིིག་རེད
ངོ་མ་དྲན་མ་མྱོང་བའི་སྐད་ཆ་ཞིག་རེད
༦༽
ཁྱེད་རང་འདི་ཕྱོགས་ནས་ཕྱག་ལས་གནང་ན་ཡང་འགྲིག་འདུག་ཞུས་པར
སྒོར་མོ་སྟོང་ཕྲག་འགའ་ཞིག་ལ་བལྟས་ནས་བསྡད་ན་མི་ཚེ་བེད་མེད་རེད་ཟེར
ད་དུང་ཁྱོད་ཀྱང་འདི་ཕྱོགས་ལ་ཡོང་ན་སྒོར་མོ་ཡག་པོ་ཐོབ་ཀྱི་འདུག་ཟེར
དཀའ་ལས་ཅུང་ཙམ་འདུག་ཀྱང་དེ་ལ་སྐྱོན་མེད་ཟེར
༧༽
ངའི་་མི་ཚེའི་ནང་དེ་འདྲ་ཞིག་རྩ་བ་ནས་དྲན་མ་མྱོང་ལ
རྗེས་སུ་ཡང་ངའི་མི་ཚེའི་ཁ་ཕྱོགས་དེ་འདྲ་ཞིག་རྩ་བ་ནས་ཡིན་མི་སྲིད
སྤྱིར་བཙན་བྱོལ་བའི་ཁོར་ཡུག་གང་དུ་སོང་རུང
ཡོངས་རྫོགས་ཀྱིས་ཕུར་རྒྱུ་ལ་དགའ་ཞིག་དུངས་ནས་འདུག
༨༽
ད་དུང་སེམས་སྐྱོ་བ་ཞིག་ནི་བོད་དགེ་གང་མང་ཞིག་ཕྱི་གླིང་དུ་ཕུར་སོང
ཁོང་ཚོ་སྒོར་མོའི་དོན་དུ་སོང་བའི་རྗེས་སུ
སྒོར་མོས་ཁོང་ཚོ་ཁྲིད་པའི་རྗེས་སུ
ཕ་སྐད་ལ་དུངས་བའི་ཉག་མ་གསར་པ་གང་མང་ཞིག
རེ་བའི་མིག་ཟུང་མཆི་མས་ཁེངས་ནས་ལུས་འདུག
༩༽
དེ་དང་དུས་མཉམ་དུ
ཁོང་ཚོ་དང་འདྲ་བ་གང་མང་ཞིག་གི་སེམས་པ་
ག་ལེར་དེ་ཕྱོགས་ལ་ཤོར་ནས་འདུག
མི་བུ་སྒེར་ཞིག་གི་མི་ཆེ་དང
མི་རིགས་ཤིག་གི་ལས་དབང་ཁོང་ཚོ་དང་འབྲེལ་ནས་ཡོད་པ་མཁྱེན་མི་འདུག
༡༠༽
འགའ་ཞིག་གིས་
སློབ་དཔོན་ལགས་ཟེར་བའི་སྙན་ངག་འདྲ་བྲིས་འདུག
འགའ་ཞིག་གིས་ཁོང་ཚོ་ལ་འཁང་ར་འདྲ་བྱེད་ཀྱིན་འདུག
གང་ལྟར་ཡང་གཅིག་གི་རྗེས་སུ་གཅིག་གིས་འགྲོ་བཞྀན་འདུག
དེས་རྐྱེན་པས
གང་མང་ཞིག་གི་སེམས་ཁོངས་སུ་བག་ཆགས་ངན་པ་ཞིག་བཞག་ནས་འདུག