ཐེ་ཝན་དུ་རྒྱ་ནག་དང་འབྲེལ་བའི་ཚོགས་འདུར་བོད་དོན་ངོ་སྤྲོད།
ཐེ་ཝན་ནང་སྐབས་བརྒྱད་པའི་འགོ་འཁྲིད་ཀྱི་ཚོགས་འདུ་དང་། རྒྱ་ནག་མང་གཙོ་ཅན་ཏུ་འགྱུར་རྒྱུ། ཞེས་པའི་རྒྱལ་སྤྱིའི་བགྲོ་གླེང་ཚོགས་འདུ་དངོས་གཞི་ཕྱི་ཟླ་ ༤ ཚེས་ ༢༧ སྔ་དྲོ་ཐེ་པེ་གྲོང་ཁྱེར་ཨོ་ཐན་གསོལ་མགྲོན་ཁང་དུ་འགོ་འཛུགས་བྱས་ཡོད་པ་རེད།
དབུ་འབྱེད་མཛད་སྒོར་སྐུ་མགྲོན་གྱི་གཙོ་བོ་ཐེ་ཝན་གྲོས་ཚོགས་འཐུས་མི་དང་། ཨ་རིའི་གྲོས་ཚོགས་འཐུས་མིའི་དམིགས་བསལ་སྐུ་ཚབ། བོད་མི་མང་སྤྱི་འཐུས་ཚོགས་ཀྱི་ཚོགས་གཙོ་སྤེན་པ་ཚེ་རིང་སོགས་་སྐུ་མགྲོན་གཙོ་བོ་ཁག་གིས་གསུང་བཤད་གྲུབ་རྗེས། ༧གོང་ས་མཆོག་ལ་ཇི་ལྟར་གསོལ་འདེབས་ཞུས་པ་ལྟར་ཚོགས་འདུར་ཆེད་དུ་བསྩལ་བའི་བཀའ་སློབ་བརྙན་འཕྲིན་ཐོག་བསྟན་ཡོད་པ་རེད།
ཕྱི་དྲོ་ཚོགས་ཐེངས་དང་པོའི་བགྲོ་གླེང་ཚོགས་འདུ་ནི་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་འགོ་འཁྲིད་བརྗེ་པོ་བརྒྱབ་པའི་རྗེས་མང་གཙོ་ཅན་དུ་འགྱུར་ཐབས་སྐོར་གྱི་བརྗོད་གཞིའི་ཐོག་རྒྱ་ནག་སྐམ་ས་ནས་ཕེབས་པའི་ཁྲིམས་རྩོད་པ་སོགས་ཀྱིས་གསུང་བཤད་གནང་བ་མ་ཟད། སྐུ་ཚབ་དོན་གཅོད་ཟླ་བ་ཚེ་རིང་གིིས་བོད་མིས་རང་ལུས་མེར་སྲེག་སྐོར་ངོ་སྤྲོད་གནང་ཡོད་པ་རེད།
ཕྱི་ཚེས་༢༨ སྔ་དྲོ་ཚོགས་ཐེངས་བཞི་པའི་བགྲོ་གླེང་ཚོགས་འདུ་ནི། བོད་མིར་འཕྲད་པའི་འཇིག་ཉེན་དང་དེ་འགོག་ཐབས། ཞེས་པའི་བརྗོད་གཞིའི་ཐོག་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་གིས་རྒྱལ་ཕྲན་མཉམ་འབྲེལ་ལམ་ལུགས་ནི་བོད་མིར་འགྲུབ་ཐུབ་པའི་འདེམས་ཁ་ཞིག་ཡིན་ནམ་ཞེས་པའི་ཐོག་གཏམ་བཤད་དང། ཕྱི་དྲིལ་དྲུང་ཆེ་བཀྲ་ཤིས་ཕུན་ཚོགས་ཀྱིས་དབུས་བོད་མིའི་སྒྲིག་འཛུགས་ཀྱི་དབུ་མའི་ལམ་གྱི་སྲིད་བྱུས། བོད་ཀྱི་སྲིད་བྱུས་ཉམས་ཞིབ་ཁང་གི་དྲུང་འཕར་འཕགས་པ་ཚེ་རིང་གིས་མིག་སྔར་རྒྱ་ནག་གཞུང་གིས་བོད་ཐོག་འཛིན་པའི་སྲིད་བྱུས། ཨ་རི་ཧ་ཝ་ཌི་གཙུག་ལག་སློབ་གྲྭའི་ཉམས་ཞིབ་པ་བསྟན་འཛིན་བདེ་སྐྱིད་ཀྱིས་བོད་རྒྱ་འབྲེལ་ལམ་གོང་འཕེལ་གཏོང་རྒྱུར་འབད་བརྩོན་བྱེད་དགོས་སྐོར། ཐེ་ཝན་རྒྱལ་སྤྱིའི་ཉེས་ཡངས་ཚོགས་པའི་ཚོགས་མི་བཀྲ་ཤིས་ཚེ་རིང་གིས་ཁྱིམ་དུ་ལོག་རྒྱུའི་སེམས་ནང་གི་སྐད་ཆ། ཞེས་པའི་བརྗོད་གཞིའི་ཐོག་གཏམ་བཤད་གནང་ཡོད་པ་རེད།
ཉིན་དེའི་ཚོགས་འདུ་འགོ་འཛུགས་བྱས་པ་དང་། ཚོགས་ཞུགས་པ་རྒྱ་ནག་སྐམ་ས་ནས་ཡོང་བའི་གཞོན་སྐྱེས་ཤིག་ཡར་ལངས་ཏེ། དེ་རིང་གི་བརྗོད་གཞི་ནི་བོད་ཀྱི་སྐོར་ཡིན་པས། བོད་ནང་བོད་མི་བརྒྱ་སྐོར་ལྷག་གིས་རང་ལུས་མེར་སྲེག་བཏང་ཡོད་པས། ཁོང་རྣམ་པར་ཚོགས་བཅར་ཡོངས་ཀྱིས་མྱ་ངན་སྐར་མ་གཅིག་ཞུ་རྒྱུའི་གྲོས་གཞི་བཏོན་པར། ཚོགས་འདུ་གཙོ་སྐྱོང་གནང་མཁན་གྱིས་མོས་མཐུན་གནང་སྟེ་ཚང་མ་སྐུ་བཞེངས་ཐོག་མྱ་ངན་སྐར་མ་གཅིག་ཞུས་གྲུབ་རྗེས་བགྲོ་གླེང་དངོས་གཞི་འགོ་འཛུགས་བྱས་ཡོད་པ་རེད།
འདྲི་བ་དྲིས་ལན་སྐབས་ཚོགས་ཞུགས་རྣམས་ཀྱིས་དོ་སྣང་ཆེན་པོས་གནད་དོན་མང་པོའི་ཐོག་དྲི་བ་གནང་བ་ཁག་ལ་གསུང་བཤད་གནང་མཁན་རྣམས་ཀྱིས་རེ་རེ་བཞིན་ལན་འདེབས་གསལ་བཤད་གནང་བ་དང་། ཕྱི་དྲོ་ཚོགས་ཐེངས་ལྔ་པ་སོག་པོའི་གནད་དོན་སྐོར་ཕྱི་དྲིལ་དྲུང་ཆེ་བཀྲ་ཤིས་ཕུན་ཚོགས་ཀྱིས་གཙོ་སྐྱོང་གནང་ཡོད་པ་རེད།
ཐེངས་འདིའི་ཚོགས་འདུར་རྒྱ་ནག་སྐམ་ས་ནས་ཁྲིམས་རྩོད་པ་སོགས་མི་སྣ་གང་ཙམ་ཕེབས་ཡོད་སྟབས། ཕྱི་ཚེས་ ༢༨ དགོང་དྲོ་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་དང་རྒྱ་ནག་ནས་ཕེབས་པའི་མི་སྣ་བཅུ་གྲངས་ཤིག་དང་མཉམ་ཟུར་དུ་བཞུགས་མོལ་ཚོགས་འདུ་ཞིག་འཚོགས་ནས། ཆུ་ཚོད་བཞི་ཙམ་རིང་ཕན་ཚུན་གོ་བསྡུར་གནང་སྟེ་བོད་ཀྱི་གནད་དོན་རྒྱ་ནག་མི་མང་གིས་ཤེས་རྟོགས་ཡོང་སླད་མུ་མཐུད་ཕྱག་ལས་གནང་རྒྱུའི་ལས་དོན་མང་པོ་ཞིག་གྲོས་འཆམ་བྱུང་ཡོད་པ་རེད།
གཞན་ཡུ་གུར་དང་། སོག་པོ། ཧོང་ཀོང་ནས་ཡོང་བའི་ཚོགས་ཞུགས་པའི་ལྷན་བསམ་ཚུལ་བརྗེ་ལེན་གྱི་གོ་སྐབས་མང་པོ་བྱུང་བ་དང། ཚོགས་འདུའི་ཐོག་གངས་ལྗོངས་དཔེ་སྐྲུན་ཁང་ནས་འདོན་སྤེལ་བྱས་པའི་བོད་དོན་སྐོར་གྱི་དེབ་བརྒྱ་ལྷག་དང་། དྲིལ་བསྒྲགས་ཡིག་ཆ། ཐེ་ཝན་ནང་བཟོ་སྐྲུན་བྱས་པའི་བཙན་བྱོལ་བོད་མིའི་ལོ་རྒྱུས་ཀྱི་གློག་བརྙན་འོད་སྡེར་ཕྱོགས་སྒྲིག དུས་དེབ། སྲིད་སྐྱོང་གི་གསུམ་དུས་གསུང་བཤད། དེ་བཞིན་ཕྱི་དྲིལ་ལས་ཁུངས་ནས་དཔར་སྐྲུན་བྱས་པའི་དབུ་མའི་ལམ་ངོ་སྤྲོད། ༸གོང་ས་མཆོག་གི་བཀའ་སློབ་སོགས་ཚོགས་ཞུགས་རྣམས་ལ་འགྲེམས་སྤེལ་ཞུས། ཐེངས་འདིའི་ཚོགས་འདུར་བོད་མི་དང་། ཤར་ཏུར་ཀི་སི་ཐན། སོག་པོ། ཐེ་ཝན། མ་ཀའུ། རྒྱ་ནག་སོགས་ནས་ཚོགས་བཅར་མི་གྲངས་༨༠ ཙམ་ཡོད་པ་དང་། ཚོགས་འདུའི་རིང་བོད་དོན་ངོ་སྤྲོད་ཤུགས་ཆེན་བྱུང་ཡོད་པ་རེད།
གཞན་ཡང་དོན་གཅོད་ལས་ཁུངས་དང་ས་གནས་བོད་རིགས་ཚོགས་པས་གོ་སྒྲིག་ཐོག་ཕྱི་ཚེས་ ༢༧ དགོང་དྲོར། ཐེ་ཝན་བོད་ཀྱི་སྐུ་ཚབ་དོན་ཁང་གི་ནང་ཆོས་འཛིན་ཁང་དུ་ས་གནས་བོད་མི་དང་རང་གཞུང་མཛད་གཙོ་རྣམ་པ་ཐུགས་འཕྲད་གནང་བ་དང་། གཙོ་བོ་བོད་མི་ཚོའི་བསམ་འཆར་ཉན་རྒྱུ་དང་། དོགས་འདྲི་ཁག་ལ་བོད་མི་མང་སྤྱི་འཐུས་ཚོགས་གཙོ་དང་། ཕྱི་དྲིལ་དྲུང་ཆེ་རྣམ་གཉིས་ཀྱིས་ལན་འདེབས་དང་གསལ་བཤད་གནང་ཡོད། །
གནས་ཚུལ་ཡོང་ཁུངས་tibet.net
